ဇြပ်ဗု၊ နဝ်ဝေမ်ဗာ ၁
ဂကောံရီုဗၚ်ပရေၚ်မၞိဟ် (ပိုင်ရှင်မဲ့) ဖျေံသ္ဇိုၚ်ဍုၚ်ဇြပ်ဗု တွဵုရးဍုၚ်မန်ဂှ် ကြဴနူဥက္ကဌဂကောံ ကေုာံ ကောန်ဂကောံလ္ၚဵု ဒးဒုၚ်ရပ်ပံက်ဂဗုတ်တုဲဂှ် ပလီုထောံလဝ် ဂကောံဂှ်ယျဂှ် ညးမစုက်လုက်ကဵု ဂကောံဂှ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ဥက္ကဌ ဂကောံရီုဗၚ်ပရေၚ်မၞိဟ် (ပိုင်ရှင်မဲ့) ဥူယျေဝ်မေန်ထိုက် မပါလုပ် ကောန်ဂကောံဒ္စိတ်တၠဂှ် အပ္ဍဲဂိတုသေပ်တေမ်ဗာ တုဲကၠုၚ်တေံ ဒပ်ကံၚ်ဇြဳပၞာန် ရပ်ဒက်စၟဳတ်ဒၟံၚ် အဆက်က်ရ။
ကြဴနူဂှ်တုဲ ကလေၚ်ဗလးကဵုလဝ် ကောန်ဂကောံတြဴတၠကီုလေဝ် ပ္ဍဲဂိတုအံက်တဝ်ဗာ ၉ ဂှ် ပံက်လဝ်ဂဗုတ် ကေတ်လဝ်အရေဝ် ဥက္ကဌဂကောံ ဥူယျေဝ်မေန်ထိုက်၊ ကောန်ဂကောံ ကိုဝ်ပူတူ ကဵု ကိုဝ်ဝေန်ကျဳတံ နကဵုသၞောတ်ဗ္တိုက်သ္အးပွပကီုပရာပ် ၝောံပိုဒ် ၅၀ ညရ။
ဥက္ကဌဂကောံကီု သီုကောန်ဂကောံပိတၠဂှ် ကံၚ်ဇြဳပၞာန် ပံက်လဝ်ဂဗုတ် နကဵုသၞောတ်ဗ္တိုက်သ္အးပွပကီုပရာပ်ဂှ်ရ ဂကောံဂွံဆက်ဂေတ်ဂြိပ် ဒှ်ဟွံမာန်ရတုဲ အတိုၚ်ဆန္ဒ ကောန်ဂကောံဂမၠိုၚ်ကဵု ညးတၠဒါန်တံဂှ်တုဲ မ္ဒးပလီုထောံလဝ် ဂကောံဝွံရ။
ကြဴနူပလီုထောံဂကောံဂှ်တုဲဂှ် ယာန်ဖ္ဍိုက်မၞိဟ်ယဲ သုၚ်စောဲဒၟံၚ် ပ္ဍဲဂကောံ ပန်ဖ္ဍိုက်ဂှ် ကဵုလဝ်ဒါန် ဇရေၚ်ဂကောံရီုဗၚ်မှာဇန် လ္တူဍုၚ်တံတုဲ စမြိုၚ်ရုၚ်ဂှ်လေဝ် သရိုဟ်ထောံလဝ်ယျဂှ် သ္ဂးရ။
ကပေါတ်ကညောတ်ပရိဘောဂ ရပ်စပ်အပ္ဍဲရုၚ်ဂမၠိုၚ်၊ ပၚ်ကာ၊ ခုၚ်စပုၚ်၊ ဍာ်နုၚ်ထုၚ်၊ သဵုလာ၊ ကပေါတ်အရပ်စပ်ပ္ဍဲဒၞါဲဟံၚ်ပြာ်တံ သီုဖအိုတ်ဂှ် အခိၚ်ကောန်ဂကောံဂမၠိုၚ် ဒးဒုၚ်ရပ်ဂှ် သ္ကိုပ်အုပ်ဓုပ်အရာပ်အံၚ်မၚ်္ဂလ ဥူမေန်အံၚ်ကဵု ကောန်ရဲဂမၠိုၚ် သီဏာလဝ်တုဲ ဒဵုကဵုတ္ၚဲဏံ ကလေၚ်ကဵုလဝ် ဟွံမွဲဏီပုဟ်ဂှ် ဂွံတီကေတ်ရ။
ဥက္ကဌဂကောံ ဒးဒုၚ်ပံက်ဂဗုတ်ဂှ်ကီု သီုကဵုကောန်ဂကောံပိတၠဂှ် နူဒၞါဲစၟဳတ်၊ ဗ္ဒိုပ်ဗၠာဲသၟိၚ်ဇြပ်ဗု နူဏံမွဲကဆံၚ် ပြံၚ်လှာဲရပ်ချုက်လဝ် ပ္ဍဲထံၚ်မတ်မလီုတုဲ ဒးဆေၚ်ဒၟံၚ်မုက် ကုဂဗုတ် ပ္ဍဲရုၚ်သၞောဝ်ဓဝ် ခရိုၚ်မတ်မလီုရ။
ကံၚ်ဇြဳပၞာန်ဂှ်တှ်ေ ဥက္ကဌဂကောံ ကေုာံ ကောန်ဂကောံပိတၠ ရပ်ဒက်ပံက်လဝ်ဂဗုတ်ဂှ်ဝွံ စောဲစပ်လဝ် နကဵုဟိုတ် ထံက်ပၚ်သြန် ဇရေၚ်ဂကောံဒပ်စဵုဒၞါညးဍုၚ်ကွာန် PDF တံရ။
ဂကောံရီုဗၚ်ပရေၚ်မၞိဟ် (ပိုင်ရှင်မဲ့) ပလီုထောံဂှ်ဝွံ သၞာံ ၂၀၁၈ တေံ ပ္တိုန်လဝ်စရၚ်ယၟုဂကောံ ဇရေၚ်အလဵုအသဳတွဵုရးဍုၚ်မန်တုဲ ကၠောန်ကၠုၚ်လဝ် ကမၠောန်ရီုဗၚ်ဟံၚ်ပြာ် ကုမၞိဟ်ယဲကာတၟေၚ် ကေုာံ မၞိဟ်ယဲဇီုကပိုက်ဒး အပ္ဍဲဒေသတံဂှ်ရ။
ပ္ဍဲတွဵုရးဍုၚ်မန် အပ္ဍဲကာလသီအဝဵုဏံ ကောန်ဂကောံရီုဗၚ်ပရေၚ်မၞိဟ်တံ ဒးဒုၚ်ရပ်ဒက်စၟဳတ်ဒၟံၚ် မွဲဏှမွဲဏှတုဲ ပ္ဍဲကဵုဏံ ကောန်ဂကောံရီုဗၚ်ပရေၚ်မၞိဟ် ၜါတၠ နူကဵုပွိုၚ်ဍုၚ်ဇြပ်ဗုကဵု ပွိုၚ်ဍုၚ်မုဟ်ဍုၚ်တံဂှ် ကံၚ်ဇြဳပၞာန် ဖျေံလဝ်ဒုဟ်ဒဏ် ဒဏ်ထံၚ်တံရ။
ပရိုၚ်−သြၚ်လောန်တိုၚ်(မ်)
ဗီု− ဂကောံရီုဗၚ်ပရေၚ်မၞိဟ် (ပိုင်ရှင်မဲ့)