မတ်မလီု၊ နဝ်ဝေမ်ဗာ ၁
ပ္ဍဲတွဵုရးဍုၚ်မန် နကဵုဟိုတ်ကပေါတ်ဗၞိက်ဟွံလုပ်သၞောဝ်ဂှ် ဂကောံပံၚ်ကောံကံၚ်ဇြဳပၞာန်တံ ရပ်ဒက်ဒၟံၚ် ကပေါတ်ဗၞိက်သေံတံ အဆက်က်ဂှ်ရ ကပေါတ်ဗၞိက်ဂမၠိုၚ် ပိုတ်အိုတ်ကၠုၚ်မာန်ရောၚ် သၟာဗၞိက်ဂမၠိုၚ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ကံၚ်ဇြဳပၞာန်ဝွံ တုဲကၠုၚ်ဂိတုအံက်တဝ်ဗာ သတ္တာဟဒုတိယတေံတုဲ ကပေါတ်ဗၞိက်သေံ လုပ်စိုပ်ကၠုၚ် အပ္ဍဲတွဵုရးဍုၚ်မန်တံဂှ် မ္ၚးနူသၞေဟ်ကၚ်စၟဳတ်တံဂှ် ဗက်ရပ်ဒက်ဒၟံၚ် စဵုကဵုရုၚ်ကြိုၚ်စွံကပေါတ် ဂိုဝ်ဒံၚ်တံဂှ်တုဲ သီကေတ်ဒၟံၚ် ကပေါတ်ဗၞိက်တံရ။
ပ္ဍဲကဵုဏံ ပ္ဍဲဂိတုအံက်တဝ်ဗာ ၂၈ တေံ ပ္ဍဲကဵုသၞေဟ်ကၚ်စၟဳတ်ပ္ၚ နွံလ္တူဂၠံၚ်ကွဳစက် ဇြပ်ဗု−ရေဝ်ဂှ် သီလဝ် သီုကဵုကွဳစက်ဗၞိက် ဖ္ဍိုက်ပ္တိုန်နၚ်တံကဵု ကပေါတ်ဗၞိက်သေံနာနာ ၚုဟ်မးမၞုံ ၜိုတ် ၂၀၀ ကိုဋ်ဒ္ကေဝ်ပြၚ်ဂှ်ရ။
ပ္ဍဲကဵုတ္ၚဲဂှ်ရ ပ္ဍဲကဵုဗ္ဒိုပ်စၟဳတ် မယာန်ချံၚ်ဂှ် ထပ်သီလဝ် ကပေါတ်ဗၞိက်စၞစသုၚ်သေံ ၜါသာ် ၚုဟ်မးမၞုံ ၆၅ ကိုဋ်ဒ္ကေဝ် ဂှ်ကဵု ကွဳစက်ဗၞိက် ဖ္ဍိုက်ပ္တိုန်နၚ်တံဂှ်ရ။
သၟာဗၞိက်မွဲတၠဂှ်တှ်ေ အပ္ဍဲဒေသ ရပ်ဒက်ဒၟံၚ် ကပေါတ်ဗၞိက်သေံတံကီုလေဝ် သၞေဟ်ကၚ်ကံၚ်ဇြဳပၞာန် မွဲဒမြိပ်ဂၠံၚ်တံဂှ်တှ်ေ ကေတ်လှုဲတုဲ ဗလးကဵုဒၟံၚ်ဂှ်ရ ပရေၚ်သွံရာန်ဗၞိက် ဟွံလုပ်သၞောဝ်တံ ကၠေံအာဟွံသေၚ်ပုဟ်ဂှ် ဟီုရ။
“ ဗလးတိဏံဂှ်တှ်ေ ဒးကဵုအာဒၟံၚ် ဖအိုတ်ရ။ ဒှ်ဒၟံၚ်ဇာတ် ဒးကဵုအာဒၟံၚ် အဓိကဂှ်ရ ပရေၚ်သွံရာန်ဟွံလုပ်သၞောဝ်ဏံ ဒှ်ကၠုၚ်ရ။ လုကဴသၞေဟ်ကၚ်တံဏံ ကေတ်ဒၟံၚ်လှုဲဂှ်တှ်ေ ပရေၚ်ဟွံလုပ်သၞောဝ်တံဏံ ဆလအ်မှ ကၠေံအာဟွံသေၚ်ပုဟ်။ ဟိုတ်ဂှ်ရ ပရေၚ်သွံရာန်ဗၞိက်ဏံဂှ် ဟွံကၠေံအာပုဟ်။ ဂွံထ္မံက်ရုပ်ရဴ ညံၚ်ရဴသၞောတ် ပ္ဍဲကဵုဍုၚ်သ္အာၚ်တံဂှ် တိဍာ်ဍေံတံဂှ်လေဝ် ဒးနွံကဵု သၞောဝ်ဓဝ်အုပ်ဓလီုတံဏောၚ်။ သၞောဝ်ဓဝ်အုပ်ဓလီုဟွံမွဲတှ်ေ မၞိဟ်သၟဝ်တံဏံဂှ် ဒးဖေက်ဒၟံၚ် သီုၜါလ္ပာ်ဟဂှ်ရဏောၚ်” သာ်ဝွံ သ္ဂးရ။
ကံၚ်ဇြဳပၞာန်ဝွံ ပ္ဍဲကဵုသၞေဟ်ကၚ်စၟဳတ် ပံက်လဝ် နကဵုဟိုတ်ပရေၚ်ဂီုကၠီုဂှ် ရပ်ဒက်စၟဳတ်ဒၟံၚ် ကပေါတ်ဗၞိက်သေံတံသၟးဟွံက လုပ်စိုပ်ရပ်ဒက်ဒၟံၚ် သီုကဵုရုၚ်ဒေၚ် အပ္ဍဲဒေသတံ၊ ဂိုဝ်ဒံၚ်တံ၊ စဵုကဵုဖျာ သွံပရးတံဂှ် ကြပ်အရိုဟ်ဒဒှ်တ္ၚဲရ။
ကပေါတ်ဗၞိက်သေံတံဂှ် နကဵုဟိုတ်ဗၞိက်ပၠောပ် ဟွံလုပ်သၞောဝ်ဂှ် လ္ပာ်ကံၚ်ဇြဳပၞာန် ဗက်ရပ်ဒက်ဒၟံၚ်တုဲ အပ္ဍဲဒေသ ကပေါတ်ဗၞိက်သေံ မၞိဟ်အရပ်စပ်ဂၠိုၚ်တံ ပိုတ်သ္ကုတ်ကၠုၚ်မာန်ရောၚ် သၟာဗၞိက်ဂမၠိုၚ် ဟီုအိုတ်ရ။
တၠပညာပရေၚ်ပိုန်ဒြပ်မွဲတၠဂှ်တှ်ေ ကံၚ်ဇြဳပၞာန် ဟွံဖျေံကဵုလာၚ်ဇြေန်ဗၞိက်ပၠောပ် သွက်ကပေါတ်ဗၞိက်သေံတံဂှ်တုဲ လုပ်စိုပ်ဒၟံၚ် နူကဵုဂၠံၚ်ဓလုက်တုဲ ဟိုတ်နူရပ်ဒက်ဒၟံၚ်သာ်ဏံဂှ်ရ ဗွဝ်ဖျာကၠေံတုဲ ၚုဟ်ထပ်သၠုၚ်တိုန်မာန်ရောၚ် ဟီုရ။
“ ဂၞန်မွဲဂှ်တှ်ေ အာဒး ဇြဟတ်သွံတံဏောၚ်။ တြးကပေါတ်ဗၞိက်တံ မုတံဂှ် ကၠေံအာ အကြာဗွဝ်ဖျာရဏောၚ်။ ကၠေံအာတုဲ မုဆက်ဒှ်ရောဟီုတှ်ေ ဖျာဒမၠုက်ဂှ်တှ်ေ ဟွံကၠေံအာပုဟ်။ ဆ္ဂး ရပ်ဒက်ဒၟံၚ်တံ နွံဂှ်ရ ကပေါတ်တံဏံ ကၠေံအာ နူကဵုဗွဝ်ဖျာတုဲ ၝမံက်ကၠုၚ်တံဏံဂှ် ၚုဟ်တိုန်အာဏောၚ်” သာ်ဝွံ သ္ဂးရ။
ဒုက္ဍိုပ်သ္ကိုပ်ပၞာန် ဒုသ္ကိုပ်ပၞာန်ဇၞော် သဵုဝေန်ဂှ်တှ်ေ မ္ၚးနူကဵုဂၠံၚ်တရဴသွံရာန်ဗၞိက်ဒေသပယျဵုတံဂှ် လုပ်စိုပ်စၟဳတ်ကေတ်အာအရေဝ် ကုပရေၚ်သွံရာန်ဗၞိက်ဟွံလုပ်သၞောဝ်တံ စဵုကဵုအပ္ဍဲရုၚ်ကြိုၚ်စွံကပေါတ် အပ္ဍဲဍုၚ်တံကဵု စဵုကဵုအပ္ဍဲဗွဝ်ဖျာတံဏောၚ် ကြဴနူဟီုဂးတုဲ စနူဂိတုအံက်တဝ်ဗာ သတ္တာဟဒုတိယတုဲ ရပ်ဒက်ကၠုၚ်ဒၟံၚ် ကပေါတ်ဗၞိက်သေံတံ အဆက်က်ရ။
ဟိုတ်နူပရေၚ်သွံရာန်ဗၞိက်ဟွံလုပ်သၞောဝ်တံတုဲ ပရေၚ်ကၠောန်ပ္တိတ်ဗၞိက် တၠကမၠောန် ကၠောန်ဒၟံၚ်ကမၠောန် ကၠောန်ပ္တိတ်ဗၞိက်အပ္ဍဲဍုၚ်တံကဵု ပရေၚ်ပြိုၚ်ပ္ကာန်အပ္ဍဲဗွဝ်ဖျာတံ ယအ်စှ်ေအာမာန်ဂှ်ရ တာဒၞါစဵုဒၞါအာ ပိုတ်တ်သ္ကုတ်တ်ဏောၚ်ဂှ် ဟီုကြီုလဝ်ရ။
တွဵုရးဍုၚ်မန်ဝွံ ကပေါတ်ဗၞိက်စၞစသုၚ်သ္ဇိုၚ်၊ ဗၞိက်မၞိဟ်အရပ်စပ်၊ ဂဥုဲဇဗ၊ ဗၞိက်ပယျေဝ်၊ ကပေါတ်ဗၞိက်အရပ်စပ် ပရေၚ်သိုၚ်ခၞံတံ ပါလုပ်သီုကဵု ကပေါတ်ဗၞိက်အရပ်စပ်နာနာ နူကဵုဍုၚ်သေံတံဂှ် ဒှ်တွဵုရး ဒးပၠောပ်ပ္တိုန်ရပ်စပ်ဒၟံၚ်မွဲရ။
ပရိုၚ်−သြၚ်လောန်တိုၚ်(မ်)
ဗီု−CJ