ကျောန်သု၊ နဝ်ဝေမ်ဗာ ၃
ရးတၞၚ်သဳ ပွိုၚ်ဍုၚ်ကျောန်သု ပ္ဍဲကဵုကွာန်(ကျောက်ပိတ်) ဂှ် ဂကောံရပ်လွဟ်မွဲဂကောံ ရပ်ဒက်ဂစိုတ်လဝ် သ္ကိုပ်အုပ်ဓုပ်မွဲတၠကဵု ကောန်အရာပ်မွဲတၠဂှ် ဂွံတီကေတ် ဇရေၚ်ညးဒေသတံကဵု ဂကောံဇြဟတ်ပၠန်ဂတးတံရ။
တုဲကၠုၚ် ပ္ဍဲဂိတုအံက်တဝ်ဗာ ၂၆ အခိၚ်ဗ္တံဂှ် ဂကောံရပ်လွဟ်မွဲဂကောံ ရပ်ဒက်ဂစိုတ်လဝ် သ္ကိုပ်အုပ်ဓုပ်ကွာန်(ကျောက်ကုန်း) ကဵု မၞိဟ်တြုံမွဲတၠ နူကဵုကွာန်(ရွှေဂဲညို) တံရ။
ကွာန်(ကျောက်ပိတ်) ကဵု ကွာန် (ကျောက်ကုန်း) တံဝွံ နွံပ္ဍဲဂကောံကွာန် (ကော်ဇယာ) ပွိုၚ်ဍုၚ်ကျောန်သုတုဲ (ရွှေဂဲညို) ဂှ်တှ်ေ ဒှ်အပိုၚ်ပွိုၚ်ဍုၚ်(ဘုတ်ပြၚ်း) တုဲ ခြာဒၟံၚ်ကဵု ကွာန်(ကျောက်ပိတ်) ဗၞတ် ၆ မိုၚ်ရ။
အတိုၚ်ဂလာန် ညးဒေသတံဂှ်မ္ဂး မၞိဟ်ပန်တၠ ကၟာတ်လဝ်မုက်မတ် ရပ်လဝ်လွဟ်ဂှ် စိုပ်ကၠုၚ် နကဵုဂၠုၚ်ဍောတ်ၜါမတုဲ ကၠုၚ်စိုပ်ရပ်ဒက်ဏာလဝ် သ္ကိုပ်အုပ်ဓုပ် ဥူအံၚ်ဇြဝ်ကဵု ဥူဂျံၚ်ခံၚ်တံရ။
ကြဴနူဂှ်တုဲ ပ္ဍဲကဵုဗ္တံ ရပ်ဒက်ဏာလဝ် သ္ကိုပ်အုပ်ဓုပ်ကွာန်(ကျောက်ကုန်း) ဥူအံၚ်ဇြဝ်ဂှ်ရ ပန်ဂစိုတ်လဝ် ပ္ဍဲကဵုဒဒန်ကွာန် (ကျောက်ပိတ်) နကဵုသေနာတ်ရောၚ် သ္ဂးရ။
ဇွရုပ် ဥူကျံၚ်ခံၚ် ကောန်ကွာန်ယှိုဲဂေဝ်ညဵု (ရွှေဂဲညို) ဂှ်တှ်ေ ပ္ဍဲဂိတုအံက်တဝ်ဗာ ၂၉ တေံ ဂွံကလေၚ်ဆဵုလဝ် နကဵုဗီုပြၚ်က္ဍိုပ်အာတၞဟ် ဇကုအာတၞဟ် ပ္ဍဲကဵုဂကောံကွာန်(ကော်ဇယာ) ဒေသကော် (မြစ်လေးဆုံ) ဂှ် ဂွံတီကေတ် အတိုၚ်ဂလာန်ဒပ်ပၠန်ဂးတဖျေံသ္ဇိုၚ်ဒေသတံရ။
ကောန်သ္ဂံၚ်ပၠန်ဂတး ဂကောံစဵုဒၞါညးဍုၚ်ကွာန် ပွိုၚ်ဍုၚ်ကျောန်သု မွဲတၠဂှ်တှ်ေ ပ္ဍဲပွိုၚ်ဍုၚ်ကျောန်သုဂှ် ဂကောံရပ်လွဟ် (ဒေါၚ်းနက်) မွဲဂကောံ ချဳဒရာၚ်ဒၟံၚ် မွဲဒမြိပ်ဂှ်နွံတုဲ ပ္ဍဲကဵုကွာန်တံဂှ်လေဝ် တြးလိက်တုဲ ပ္ဍဲကဵုဂၠုၚ် သွံရာန်ဒၟံၚ်ကပေါတ် ပ္ဍဲကဵုဍုၚ်သေံတံဂှ် အာတ်မိက်ဒၟံၚ်သြန်တံ နွံဒၟံၚ်ရောၚ် သ္ဂးရ။
သ္ကိုပ်အုပ်ဓုပ်ကွာန် (ကျောက်ကုန်း) ကဵု ကောန်ကွာန် (ရွှေဂဲညို) ဥူကျံၚ်ခံၚ် ဒးဒုၚ်ဂစိုတ်လဝ်တံဂှ် ဂကောံရပ်လွဟ်လဵု မူဟိုတ် ဂွံရပ်ဒက်ဂစိုတ်လဝ်ရောဟီုဂှ် ဟွံဂွံတီကေတ်ဏီရ။
တုဲကၠုၚ် ပ္ဍဲဂိတုသေပ်တေမ်ဗာ ၃၀ တေံဂှ်လေဝ် ဂကောံရပ်လွဟ်ဟွံတီယၟုမွဲဂကောံ ပန်ဂစိုတ်လဝ် က္ဍိုပ်သ္ကိုပ်ပၞာန်မၚ်ကွာန် ကွာန်ချံၚ်ကျဳဝ ဂကောံကွာန်(မဲတော) ပွိုၚ်ဍုၚ်ကျောန်သု ဥူမျဵုမေန်ထိုက်ဂှ် ဂွံတီကေတ်ရ။
ပရိုၚ်−သြၚ်လောန်တိုၚ်(မ်)
ဗီု−CJ