မတ်မလီု၊ နဝ်ဝေမ်ဗာ ၃
ပ္ဍဲတွဵုရးဍုၚ်မန် ပ္ဍဲကဵုရာသဳဗြဲကျာတၟးဏံမံက် သၞာံဏံဂှ် ပၟတ်ဓာတ်လလဳ ပိုတ်ကၠုၚ်ဒၟံၚ် အခိၚ်ဗွဲမလအ်လတုဲ ကမၠောန် SME အဇာဍောတ်၊ အဇာလဒေါဝ်တံကီု သီုကဵုကမၠောန်သီုဖအိုတ် ဂွံဂေတ်ဂြိပ်ဂှ် ဒှ်ဒၟံၚ်အခက်အခုဲရောၚ် တၠကမၠောန်ဂမၠိုၚ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
အပ္ဍဲဒေသဂှ် အခိၚ်ကသီုတုဲကၠုၚ်တေံ မွဲတ္ၚဲတှ်ေ ဂွံလဝ်ပၟတ် ၜိုတ်ပွဳပွိုၚ် ၁၂ နာဍဳကီုလေဝ် အခိၚ်လၟုဟ် မွဲတ္ၚဲဂှ်တှ်ေ ဂွံမံၚ် ဗၞတ် ၈ နာဍဳဓဝ်ရ။
မွဲတ္ၚဲ ဂွံမံၚ်ပၟတ် ၜိုတ် ၈ နာဍဳကီုလေဝ် အခိၚ်ဂွံပၟတ်ဓာတ်လလဳ ဟွံမှာန်ကီု၊ ပၟတ်ပိုတ်ကၠုၚ် အခိၚ်ဗွဲမလအ်လကီု၊ ဗီုမိက်ဂွံကဵု ကဵုဒၟံၚ်တုဲ ကမၠောန်ဂွံဂေတ်ဂြိပ်ဂှ် ဒးဂဗဒၟံၚ်အခက်အခုဲရ။
တၠကမၠောန် SME မွဲတၠဂှ်တှ်ေ ဟိုတ်နူဟွံဂွံပၟတ် ဗီုကၠာတေံဂှ်ရ ကမၠောန်ဂမၠိုၚ်ဂှ်တှ်ေ ဒးဂေတ်ဂြိပ်ဒၟံၚ်ကဵု ကၠေၚ်စက်တုဲ ခရိတ်အိုတ်တံ သာဂၠိုၚ်ကၠုၚ်ဂှ်ရ ယဝ်ရထပ်ပ္တိုန်ၚုဟ် ဗၞိက်ပ္တိတ်တံဂှ်ပၠန်မ္ဂး ညးမစသုၚ်ရပ်စပ်တံရ ဒးဇီုကပိုက်ဏောၚ်ဂှ် ဟီုရ။
“ဟွံဂွံပၟတ်ဓာတ်လလဳမ္ဂး သွက်ကမၠောန်ဂှ် ဒှ်အခက်အခုဲရဏောၚ်။ ဒးဂေတ်ဂြိပ်ဒၟံၚ်ကဵု ကၠေၚ်စက်ဟီုတှ်ေ ခရိတ်အိုတ်တံဂှ် ဂၠိုၚ်ကၠုၚ်ရ။ ခရိတ်အိုတ်ကၠောန်ပ္တိတ်ဗၞိက်တံ မုကၠောန်န်ရ ယဝ်ရခရိတ်အိုတ်တံ ဂၠိုၚ်ကၠုၚ်မ္ဂး သွက်သၟာကမၠောန်တံဂှ်တှ်ေ ညးတံ ပ္တိုန်ၚုဟ်တွဵုဏောၚ်။ လၟုဟ်လေဝ် ထပ်ပ္တိုန်ဒၟံၚ်ဖိုဟ်ရ။ အေ ဂှ်တှ်ေ ညးမရပ်စပ်စသုၚ်တံရ ဒးဇီုကပိုက်ပၠန်” သာ်ဝွံ သ္ဂးရ။
သ္အာၚ်နူဂှ်ပၠန် ပၟတ်ဂှ်တှ်ေ ကမၠောန်မွဲမွဲ ဂွံဂေတ်ဂြိပ်ဂှ် ဒှ်တၚ်နွံပၟိက်သ္ဇိုၚ်ဂှ်ရ ပ္ဍဲရာသဳဗြဲကျာတၟးသာ်ဏံ ပိုတ်သ္ကုတ်ကၠုၚ် ပရေံပရေံဂှ်ရ ကမၠောန်ဂွံဂေတ်ဂြိပ်လၟေၚ်ၚ်ရဂှ် ဝါတ်ဂါတ်ကၠုၚ်ဂှ် ညးဆက်ဟီုရ။
မွဲလ္ပာ်ဂှ်တှ်ေ ကံၚ်ဇြဳပၞာန်ဝွံ ပ္ဍဲကဵုဒၞါဲဒေသကွတ်စက် လ္ဂုၚ်တံဂှ်လေဝ် ကၠာတေံ မွဲတ္ၚဲ ကဵုကၠုၚ်ဒၟံၚ်ပၟတ် ၈ နာဍဳဂှ် စနူဂိတုနဝ်ဝေမ်ဗာ ၁ တုဲ မွဲတ္ၚဲ ကဵုဒၟံၚ် ၜိုတ် ၄ နာဍဳရတုဲ ပ္ဍဲဒေသတၞဟ်ဟ်တံဂှ်လေဝ် ဖအောန်ဖျေံကၠုၚ် အခိၚ်ကဵုပၟတ်ဓာတ်လလဳတဂှ် ဂွံတီကေတ်ရ။
တၠကမၠောန် SME မွဲတၠပၠန်ဂှ်လေဝ် မွဲတ္ၚဲ ဂွံမံၚ် ပၟတ် ၄ နာဍဳဓဝ်ရတှ်ေ သွက်ပရေၚ်ကၠောန်ပ္တိတ်ဗၞိက်ဂှ် စိုပ်ကၠုၚ်အကာဲအရာ ပရေံပရေံတံဏောၚ်တုဲ ယဝ်ရခရိတ်ကၠောန်ပ္တိတ်တံ သၠုၚ်မ္ဂး ၚုဟ်ဗၞိက်တံလေဝ် ဇၞော်သၠုၚ်ကၠုၚ်ဏောၚ်ဂှ် ဟီုရ။
“လၟုဟ်ဂှ်တှ်ေ မိၚ်ဗရုဍေံတံဟီုတှ်ေ မွဲတ္ၚဲဂှ် ကဵု ၄ နာဍဳရဏောၚ်။ ပိုတ်အာ ပွိုၚ် ၂၀ နာဍဳဏောၚ်ဟီုတှ်ေ စိုပ်အာအကာဲအရာပရေံ ကွေံကွေံမွဲမာန်ဏောၚ်။ ပၟတ်ဓာတ်လလဳ ပိုတ်ဂၠိုၚ်ကၠုၚ်ဟီုတှ်ေ ပရေၚ်ကၠောန်ပ္တိတ်တံလေဝ် စှ်ေကၠုၚ်တွဵုဏောၚ်။ မွဲပၠန်ဂှ် သုၚ်စောဲစက်ပၟတ်တံဂၠိုၚ်ကၠုၚ်တုဲ ခရိတ်ကၠောန်ပ္တိတ်တံ သၠုၚ်တိုန်ကၠုၚ်ဂှ်ရ ၚုဟ်ဗၞိက်ဇၞော်သၠုၚ်တံဂှ်လေဝ် အာဇီုကပိုက်ကီုဏောၚ်။ အရာတံဏံဂှ်တှ်ေ ဒှ်ပြသၞာ ဆက်စပ်ဒၟံၚ်ဖအိုတ်ဏောၚ်” သာ်ဝွံ သ္ဂးရ။
ကံၚ်ဇြဳပၞာန် ဖအောန်ဖျေံကၠုၚ် အခိၚ်ကဵုပၟတ်တံကီုလေဝ် ပွမသၠုၚ်ပ္တိုန်ကဆံၚ် ရုၚ်စက်ကဵုဇြဟတ်ဓာတ်တံ၊ လာၚ်ဇြဟတ်ဓာတ်တံကီု၊ သၠဲပ္တိုန်ဒက်ပ္တန်တုဲ အရာမပြုပြေၚ်ထိၚ်ဒဝ်တံဂှ်လေဝ် ဒးရေၚ်တၠုၚ်ဒၟံၚ် နကဵုပရေၚ်ဓလိုက်တမ်ရိုဟ် အပ္ဍဲဍုၚ်၊ မ္ၚးဍုၚ်တံဂှ်ရ ထ္ၜးဟိုတ်ကဵုခရိတ်ကၠောန်ပ္တိတ်ဗၞိက် သၠုၚ်တိုန်ဂှ်တုဲ စနူဂိတုသေပ်တေမ်ဗာ ၁ တုဲကၠုၚ်တေံတုဲ သၠုၚ်ပ္တိုန်ကံက်လဝ် ၚုဟ်ပၟတ် ဗၞတ်ၜါဆရ။
အတိုၚ်တၚ်လလောၚ်တြး ဌာနဓာတ်လလဳသၟဝ်တဲကံၚ်ဇြဳပၞာန် ပ္ဍဲဂိတုမေ ၁ တေံဂှ်မ္ဂး တၚ်နွံပၟိက်ဇြဟတ်ဓာတ်လလဳ အလုံဍုၚ်မွဲဂှ်ဝွံ နွံၜိုတ် ၅၅၀၀ မဂ္ဂါဝပ်ကီုလေဝ် နတဲဏံဂှ်တှ်ေ မွဲတ္ၚဲဂှ် ပ္တိတ်ဂွံမံၚ် ၜိုတ် ၂၈၀၀ မဂ္ဂါဝပ်ရမာန်တုဲ တၚ်နွံပၟိက်ဇြဟတ်ဓာတ် ၜိုတ် ၅၀ တၟံကၠံရ ကဵုပၟတ်ဓာတ်လလဳမာန်ဂှ် သ္ဂးလဝ်ရ။
ပ္ဍဲတွဵုရးဍုၚ်မန်ဂှ်တှ်ေ ပ္ဍဲလက်ထက်အလဵုအသဳတုဲကၠုၚ်တေံဂှ် ဂွံကၠုၚ်လဝ် ပၟတ်ဓာတ်လလဳ လၟေၚ်တ္ၚဲမှာန်န်ကီုလေဝ် လက်ထက်ကံၚ်ဇြဳပၞာန် အပ္ဍဲကာလ ဗ္ဒါဲ ၄ သၞာံဏံ မ္ၚးနူဟွံဂွံပၟတ်မှာန်န်ဂှ် ဂွံဒၟံၚ်ကဵုသ္ကုတ်အခိၚ်သၟး မဒှ်ရ။
ပရိုၚ်−သြၚ်လောန်တိုၚ်(မ်)
ဗီု−CJ