လ္ဂုၚ်၊ နဝ်ဝေမ်ဗာ ၈
အပ္ဍဲကဵုပရေၚ်ဆဵုဂဗ ကုက္ဍိုပ်သ္ကိုပ်ပၞာန် သ္ကိုပ်ပၞာန်ဇၞောန် မေန်အံၚ်လှာၚ်ဂှ် သ္ကိုပ်ဝန်ဇၞော်ကြုက် လဳကဳကျာန် ရီုဗၚ်အာ ကံၚ်ဇြဳပၞာန်ဏောၚ်ဂှ် ကဵုလဝ်ကတိရ။
ဣဏံဝွံ ကံၚ်ဇြဳပၞာန် မ္ဒးဆောံလေၚ်ဒၟံၚ်တိဍာ် အပ္ဍဲပၞာန်အပ္ဍဲဍုၚ် အကာဲအရာမပရေံစှ်ေကၠုၚ်ဒၟံၚ်ဂှ် ညံၚ်ဂွံညိၚ်ဝတ်တန်ကြန်ဂှ် ဒှ်လက္ချန် အလဵုအသဳဗေကျေန် ပ္တိတ်ဒၟံၚ်ဇြဟတ်မွဲရ။
သွက်ပရေၚ်ပ္ညဳပ္ညပ် စပ်ကဵုပရေၚ်ဍုၚ်ကွာန်၊ သွက်အကာဲအရာ အပြံၚ်အလှာဲတံ ဂွံတောတက်ကၠုၚ်ဂှ် ကြုက် ရီုဗၚ်ထံက်ဂလာန် ကုဍုၚ်ဗၟာဏောၚ် သ္ကိုပ်ဝန်ဇၞော် လဳကဳကျာန် ဟီုလဝ် အပ္ဍဲကဵုပရေၚ်ဆဵုဂဗ ပ္ဍဲဂိတုနဝ်ဝေမ်ဗာ ၆ ပ္ဍဲဍုၚ်ကူမေန် မတန်တဴဗွဲဒိုဟ်နေရတိ ဍုၚ်ကြုက်ဂှ်ရောၚ် ထ္မံက်ထ္ၜးလဝ် ပ္ဍဲပရိုၚ် သေန်ဟွာရ။
နူကဵုကိုန်စဳမာန်ပရေၚ်ပိုန်ဒြပ်တံကဵု One Belt One Road တံဂှ်မွဲကဆံၚ် ညံၚ်ဒတုဲဖဵုပရေၚ်ပိုန်ဒြပ်ညးတံ မနွံဒၟံၚ်ပ္ဍဲဍုၚ်ဗၟာတံ ဂွံတောတက်ကၠုၚ် သွက်ဂွံကၠောန်အာဂှ်လေဝ် ကြုက် ဒှ်ဒၟံၚ်ဒတုဲဂှ် သ္ကိုပ်ဝန်ဇၞော် လဳကဳကျာန် ဟီုရ။
က္ဍိုပ်သ္ကိုပ်ပၞာန် မေန်အံၚ်လှာၚ်ဂှ်တှ်ေ စဵုဒၞါကဵုအာ ဒတုဲဖဵုပရေၚ်ပိုန်ဒြပ် ဍုၚ်ကြုက် မၞုံဒၟံၚ်ပ္ဍဲဍုၚ်ဗၟာတံဂှ်ဏောၚ် ဒဒှ်ရကဵုလဝ်ကတိဂှ် ထ္မံက်ထ္ၜးလဝ် ပ္ဍဲတၚ်လလောၚ်တြး ကံၚ်ဇြဳပၞာန်မွဲဂှ်ရ။
က္ဍိုပ်သ္ကိုပ်ၜါတၠဝွံ သွက်ဂွံကလေၚ်စအာ ပရေၚ်သွံရာန်ဗၞိက်ပယျဵု မဒးဒေါအ်ဒေၚ်လဝ် ဟိုတ်နူပေါဲဗ္တိုက် သ္ကာတ်မြဟ်ဒၟံၚ်တံဂှ်လေဝ် သဳကၠဳလဝ်ဂှ် ဂွံတီကေတ်ရ။
ဣဏံဝွံ ဒပ်ပၞာန် ပလှ်ဖျေံ အလဵုအသဳကောန်အရာပ်တုဲ ကြဴနူသီကေတ်အဝဵုတုဲဂှ် ဒှ်လၟေၚ်တရဴကြုက် က္ဍိုပ်သ္ကိုပ်ပၞာန် သ္ကိုပ်ပၞာန်ဇၞောန် မေန်အံၚ်လှာၚ် အလန်ကၠာအိုတ်ရ။
အမေရိကာန်ဂှ်တှ်ေ ကမၠောန်ကီု၊ ပူဂဵုကီု မဆက်စပ်ဒၟံၚ်ကဵု ဒပ်ပၞာန်တံဂှ် ကၟာတ်လဒဵုကေတ်လဝ်အရေဝ်တုဲ နကဵုကံၚ်ဇြဳပၞာန် ယဝ်ရဟွံကၠောန်သ္ပ အပြံၚ်အလှာဲလွေဟ်ဒဳမိုဝ်ကရေဇြဳမ္ဂး ထပ်တုဲဒးဒုၚ်ဂိအာမံၚ်ဏီဏောၚ်ဂှ် သမ္မတဂျဵုဗိုၚ်ဒေန် ကဵုလဝ်သတိရ။
ရုၚ်ဝန်ကဵုအရီုဗၚ်ကြုက် ပ္ဍဲဍုၚ်မာန္တလေဝ် ဒးဒုၚ်ဗ္တိုက် ဖံက်ခတိုဟ်တုဲ ဂွံၜိုတ်သတ္တာဟညိညဂှ် ပရေၚ်ဆဵုဂဗသာ်ဏံ မံက်တိတ်ကၠုၚ်လဝ်ရ။
ပရေၚ်ဗ္တိုက် ရုၚ်ဝန်ကဵုအရီုဗၚ်ဏံဂှ် ညးလဵုမွဲ ကလိလောန်လဝ်ရောဟီုဂှ် ဟွံဂွံတီကေတ် သောၚ်ၚ်ကၠးကၠးကီုလေဝ် အလဵုအသဳဗေကျေန်ဂှ်တှ်ေ သွက်ဂွံဂၠိုက်ဂၠါဲစၟဳတ်ကဵုဂှ် အာတ်မိက်လဝ်ရ။
လၟေၚ်ဒဒှ်ဏံဂှ်ဝွံ ပ္ဍဲကဵုကလေၚ်ထိၚ်ပ္ညဳ ပရေၚ်ဆက်ဆောံ အကြာအလဵုအသဳကြုက်၊ ကံၚ်ဇြဳပၞာန် ကေုာံ ဒပ်ပၠန်ဂတးတံဂှ် လၟေၚ်ဒဒှ်ဏံ ထ္မံက်ထ္ၜးဒၟံၚ် တၚ်ကော်ဆဴ ကြုက်မဒးဆေၚ်ဒၟံၚ်မုက်ဂှ်ရ။
ဟိုတ်နူဒုၚ်တဲဆဵုဂဗလဝ် က္ဍိုပ်သ္ကိုပ်ပၞာန် သ္ကိုပ်ပၞာန်ဇၞော် မေန်အံၚ်လှာၚ်တုဲ ဂကောံဇြဟတ် နွံပၟိက်ဒဳမဝ်ကရေဇြဳတံကဵု ဂကောံရပ်လွဟ်ကောန်ဍုၚ်အရၚ်လ္ၚဵုတံ ပါ်ပါဲလဝ် အလဵုအသဳဗေကျေန်ရ။
ယဝ်ရကြုက်ကဵုကၠုၚ်ဇြဟတ် ညးတံ သ္ဂောံဒေါအ်ဒေၚ် ပရေၚ်ဗ္တိုက်ဒၟံၚ် ကံၚ်ဇြဳပၞာန်တံဂှ်မ္ဂးလေဝ် အံၚ်ဇၞးဟွံသေၚ်ပုဟ်ဂှ် ဂကောံဇြဟတ်ပၠန်ဂတးဗၟာတံ ဟီုဂးလဝ်ရ။
ကံၚ်ဇြဳပၞာန်ဝွံ သီုဒေသပယျဵု ဗွဲမဂၠိုၚ် မပါလုပ် တိဍာ်ကၟိန်ဍုၚ် ၈၆ တၟံကၠံဂှ် ဒးဗလးလဝ်တဲဂှ်ရ နကဵုသ္ကိုပ်ဗိုလ်ပၞာန်ဂမၠိုၚ် လလအ်ၜိုတ်လဵု ဆက်ကေတ်အာအဝဵုမာန်ရောဟီုဂှ် ဒှ်ဒၟံၚ်သ္ဇက်ဒးပ္တိတ်သၟာန်ရ။
Ref: Bloomberg News