သဵုချဳ၊ နဝ်ဝေမ်ဗာ ၉
သမ္မတရုယှာ ဗလာဒဳမာပူတေန် ပ္တိုန်လဝ်ဂုဏ်စရာဲ ကုဒဝ်နေဝ်ထြာပ် ဂွံဇၞးလဝ် ပေါဲရုဲမာဲသမ္မတအမေရိကာန်ဂှ်တုဲ သွက်ဂွံသဳကၠဳကုညးဂှ် နကဵုမဝ်သကိုဝ် ဒှ်ဒၟံၚ်ဒတုဲရောၚ် ပ္ဍဲဂိတုနဝ်ဝေမ်ဗာ ၇ တေံ ဟီုလဝ်ရ။
ဒဝ်နေဝ်ထြာပ်ဝွံ အခိၚ်သၟာသၞာတ်မွဲတၠ ကၠတ်ပန်ညးဂှ် ဟိုတ်ဒၟါနူကလေၚ်ခၠေဝ်ကၠုၚ် သီုသတ္တိတံဂှ်တုဲလေဝ် သမ္မတ ပူတေန် ဟီုထိုၚ်သးလဝ်ရ။
သမ္မတထြာပ်ဝွံ ပ္ဍဲဂိတုဂျူလာၚ်တေံ အခိၚ်ဟီုတွံစန်ဒက်ဒၟံၚ်မာဲ ပ္ဍဲတွဵုရးပါန်သေဝ်ဗေနဳယျာဂှ် အခိၚ်သၟာသၞာတ်မွဲတၠ ဂ္စါန်ကၠတ်ပန်ဂှ် ကလေၚ်ခၠေဝ်ကၠုၚ်လဝ် ညံၚ်တြုံဍာံဍာံမွဲဂှ် ပူတေန် ဟီုလဝ်ရ။
ဣဏံဝွံ ကြဴနူသွဟ်ပေါဲရုဲမာဲ အမေရိကာန်တိတ်ကၠုၚ်တုဲဂှ် ဒှ်ဂလာန် ပူတေန် ဟီုဂးကၠုၚ်ဂတးညးဂမၠိုၚ် ကိုပ်ကၠာအိုတ်ရ။
အခိၚ်ကာလစန်ဒက်မာဲတေံ ညံၚ်ပရေၚ်ဆက်ဆောံ ကုရုယှာ ဂွံခိုဟ်အာဂှ် ဒက်ပ္တန်အာဏောၚ်တုဲ ပေါဲပၞာန်ယူကရုၚ် ဂွံတုဲဒှ်ဂှ် ကၠောန်အာဏောၚ် ထြာပ် ဟီုလဝ်ရ။
ဂလာန်ထြာပ် ဟီုဂးကၠုၚ်သာ်ဏံဂှ် ထေက်ကဵုဒးစွံအာရီုဏောၚ် ပူတေန် ဟီုလဝ်တုဲ ဒုၚ်တၠုၚ်လဝ်ဆန္ဒ မိက်ဂွံကလေၚ်ဒက်ပ္တန်ပရေၚ်ဆက်ဆောံၜါဍုၚ်ဂှ်ရ။
ထြာပ်ဂှ်တှ်ေ အခိၚ်ကာလစန်ဒက်မာဲတေံဂှ် ယဝ်ရညးဂွံဒုၚ်ရုဲစှ် နဒဒှ်သမ္မတမ္ဂး ကၠောန်အာ ညံၚ်ပေါဲပၞာန်ယူကရုၚ် ဂွံတုဲဒှ်အာ အပ္ဍဲပွိုၚ် ၂၄ နာဍဳဂှ်ဏောၚ် ဟီုလဝ်ကီုလေဝ် ကြဴနူပၞာန်ဂၠးကဝ်ဒုတိယတုဲ ပ္ဍဲကဵုယူရောပ် ပေါဲပၞာန်ဇၞော်အိုတ်မွဲ မက္တဵုဒှ်ဒၟံၚ်ဂှ် ညးပတုဲဒှ်အာပၞာန်ဏံ သာ်လဵုရောဟီုဂှ် ဟွံဂွံတီကေတ် ဗွဲလစှ်ေဏီရ။
ယဝ်ရထြာပ် ဟီုကၠုၚ် ဂွံဆဵုဂဗသဳကၠဳမ္ဂး မုကၠောန်အာရော စပ်ကဵုသၟာန်ဏံတုဲ နကဵုသမ္မတ ပူတေန်ဂှ်တှ်ေ ဂွံသဳကၠဳ ကုအလဵုအသဳထြာပ်ဂှ် ဒှ်ဒၟံၚ်ဒတုဲရောၚ် ဟီုရ။
ထြာပ်ဝွံ ဒှ်ဒၟံၚ်အေဂျေန် ဒးဒုၚ်ဓလီုလဝ်သြဇာရုယှာဏောၚ် ပ္ဍဲကဵုမဳဒဳယျာဍုၚ်ပလိုတ်တံ ထ္မံက်ထ္ၜးဒၟံၚ်တံဂှ် ပူတေန် ကေုာံ ထြာပ်တံ တးပါဲလဝ်ရ။
ထြာပ်ဝွံ နူသၞာံ ၂၀၁၇ စဵုကဵု ၂၀၂၁ အပ္ဍဲအာယုက် သမ္မတပထမဂှ် လစွံစိုတ်လ္တူရုယှာ ကြံၚ်မ္ၚိုဟ်လဝ်ဂှ် သၞာဲဒဴရုယှာဂမၠိုၚ် ဟီုရ။
ပ္ဍဲပေါဲရုဲမာဲအမေရိကာန် သၞာံ ၂၀၂၄ ကဵု ပ္ဍဲကဵုပေါဲရုဲမာဲသမ္မတ တၞဟ်သ္အာၚ်တံဂှ် နကဵုရုယှာ လုပ်စိုပ်အကြာ ပထုဲပလာပ်ကၠုၚ် ဟွံမွဲတုဲ ညံၚ်ဂွံထုဲထံၚ်ရုသံၚ်အာ ရန်တၟံသာ်ဏံတုဲ တြးပရိုၚ်ဗၠေတ်တံဂှ်လေဝ် ဟွံမွဲပုဟ်ဂှ် က္ဍိုပ်သ္ကိုပ်နန်ကရေမ္မလေန် ဟီုလဝ်ရ။
နကဵုရုယှာ သွက်ဂွံကလေၚ်ဒက်ပ္တန် ပရေၚ်ဆက်ဆောံ ကုအမေရိကာန်ဂှ် ဂွံသဳကၠဳအာ ဒှ်ဒၟံၚ်ဒတုဲကီုလေဝ် တန်တဴဒၟံၚ် လ္တူအလဵုအသဳဝါယှေန်တာန်ဏောၚ်ဂှ် ပူတေန် ဟီုလဝ်ရ။
Ref: Reuters