နေဗျဳဒဝ်၊ နဝ်ဝေမ်ဗာ ၉
စပ်ကဵုပ္ကောံကၠုၚ်ဒၟံၚ်ကောန်ဒပ်တၟိတၟိ ဟိုတ်နူနွံပၟိက်ကဵုဇြဟတ်ပၞာန်ဂှ်တုဲ ဟိုတ်ဟွံမွဲမွဲသာ် ကုညးဟွံလုပ်ယိုက်လျိုၚ်ပၞာန်တံဂှ် သွက်ဂွံကေတ်ဒုဟ် ဗွဲမဗဗွဲကဵုသၞောဝ်ဂှ် ဥက္ကဌ ဂကောံကော်ဘိက်တိုန်တန်ဗ္တောန်ကွတ်ပၞာန်−ဗဟဵု ဟီုရ။
ပ္ဍဲကဵုကောံဓရီုပ္ညဳပ္ညပ်ကမၠောန် ဂကောံကော်ဘိက်တိုန်ဗ္တောန်ကွတ်ပၞာန်ကံၚ်ဇြဳပၞာန် မကၠောန်ဗဒှ်လဝ် ပ္ဍဲဂိတုနဝ်ဝေမ်ဗာ ၇ တေံဂှ် သ္ကိုပ်ဗိုလ်ဇၞော် ဥူတေန်အံၚ်သာန် သီုဒှ်ဥက္ကဌဂကောံ သီုဒှ်ဝန်ဇၞော်ကာစဵုဒၞါဂှ် ဟီုလဝ်ရ။
နကဵုဂကောံကော်ဘိက်တိုန်တန်ဗ္တောန်ကွတ်ပၞာန် ရးဒေသ ကေုာံ တွဵုရးတံဂမၠိုၚ် ပါလုပ်သီုကဵုကံၚ်ဇြဳနေဗျဳဒဝ်ဂှ် ညးစုတ်စရၚ်တုဲဒှ်ဂမၠိုၚ် ဟိုတ်ဟွံမွဲမွဲသာ် ဟွံလုပ်ကေတ်တာလျိုၚ်တံဂှ် ဒးကေတ်အာအရေဝ် ဗွဲမဗဗွဲကဵုသၞောဝ်ဏောၚ်ဂှ် သ္ဂးရ။
ညးစမ်ၜတ်ဂဥုဲအံၚ်ဇၞးအာတုဲ ဟိုတ်ဟွံမွဲမွဲသာ် ဟွံလုပ်ကေတ်လျိုၚ်တံဂှ်ကီု၊ ညးစိုပ်ဘာတန်ဗ္တောန်တံတုဲမှ ဟွံတိုန်တန်ဗ္တောန် မသက္ကုဟိုတ်တံဂှ်ကီု ကုပူဂဵုတံဏံဂှ် သွက်ဂွံကေတ်အာဒုဟ်ဒဏ် ဟီုလဝ်ကီုလေဝ် နကဵုၝောံပိုဒ်လဵု ကေတ်အာဒုဟ်ဏောၚ်ဟီုဂှ် ဟွံဟီုဏာလဝ်ရ။
သ္အာၚ်နူဂှ်ပၠန် ပ္ဍဲကဵုတန်ဗ္တောန်လၟေၚ်ၚ်တံဂှ် သွက်ဂွံရေၚ်တၠုၚ်ကဵု ညံၚ်ဂွံဍိုက်ပေၚ်ကဵု တၚ်ရန်တၟံမစၟတ်လဝ်တံဂှ် ဥက္ကဌ ဂကောံကော်ဘိက်တိုန်တန်ဗ္တောန်ကွတ်ပၞာန်−ဗဟဵု ဝန်ဇၞော်ကာစဵုဒၞါဂှ် ဖ္တိုက်ဖ္အောဝ်လဝ်ရ။
ညးဍုၚ်ကွာန်ဒေသမန်မွဲတၠဂှ်တှ်ေ ကုသၟတ် အယုက် ၁၈ လ္ပာ်လ္တူ အယဲဒးကတ်ဗ္တောန်ပညာတံ၊ အယဲဒးလုပ်ကၠောန်ကမၠောန်တံ လုပ်ပၞာန် အပ္ဍဲပၞာန်အပ္ဍဲဍုၚ်ဂှ်ဝွံ သွက်ကၟိန်ဍုၚ်ကီု သွက်ဂြောဝ်ဂတာကီု ဟွံပြေပြံၚ်ပုဟ်ဂှ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
“လလောၚ်တြး သာ်ဏံခ္ဍၚ် ဍုၚ်ကွာန်ဂှ် ကြေပ်ဂြတ်ကၠုၚ်ခ္ဍၚ်ရောၚ် ညာတ်ကေတ်ရ။ အဓိကဂှ်တှ်ေ တမ်ရိုဟ်မၞိဟ်ရဏောၚ်။ ညးသၟတ်တံဂှ်တှ်ေ အခိၚ်လၟုဟ် ဒှ်အယဲဒးလုပ်ကၠောန်ကမၠောန် ဒးကတ်ဗ္တောန်ပညာ ၁၈ သၞာံလ္ပာ်လ္တူဟီုဂှ် ဒှ်မၞိဟ်ကၟိန်ဍုၚ်ဏံ မ္ဒးသ္ပပဓာန်ဂှ် အာလုပ်ပၞာန် ပ္ဍဲပၞာန်အပ္ဍဲဍုၚ်ဏံတုဲ ဒးသၠးကၠေံအခိၚ်ညးတံ ဘဝညးတံဏောၚ်ဟီုဂှ် လ္ပာ်လဵုရံၚ်ၚ် ဟွံပြေပြံၚ်မံၚ်ပုဟ်။ ရံၚ်အာလ္ပာ်ဂြောဝ်ဂတာညးမ္ဂးလေဝ် ဟွံပြေပြံၚ်တုဲ သွက်ကၟိန်ဍုၚ်လေဝ် ဟွံပြေပြံၚ်ပုဟ်။ ဟိုတ်ဂှ်ရ နကဵုဂကောံအလဵုအသဳမဆက်စပ်ဂမၠိုၚ် ယဝ်ထပ်ရုဲစှ် အစဳဇန်ခိုဟ်နူဏံမွဲဏောၚ်ဟီုမ္ဂး သာပြေပြံၚ်ညးသ္ကအ်ဏောၚ်ဂှ် နကဵုညးဍုၚ်ကွာန်မွဲတၠ ညာတ်ကေတ်ရ” သာ်ဝွံ သ္ဂးရ။
လ္ဂောံကဵုသၞောဝ်ယိုက်ဂၠေၚ်လျိုၚ်ပၞာန်ဂှ်တုဲ အခိၚ်ဂကောံကော်ဘိက်တိုန်တန်ဗ္တောန်ကွတ်ပၞာန်တံ ကော်ကၠုၚ်သွက်ဂွံစုတ်စရၚ်ဂှ် ဟွံကၠုၚ်စိုပ် ဒှ်အာလဝ်ကီု၊ ပ္တိုန်လဝ်စရၚ်တုဲ နကဵုညးဟွံဒုၚ်စမ်ၜတ်ဂဥုဲတံဂှ် ဒဏ်ထံၚ်ပိသၞာံကဵုဒှ်၊ ဒဏ်သြန်ကဵုဒှ် ဟွံသေၚ်မ္ဂး သီုဒဏ်ၜါသာ်ကဵုဒှ် ဒးဒုၚ်ကေတ်ဒုဟ်မာန်ဏောၚ် စၞောန်ပျးလဝ်ရ။
ပ္ဍဲဂိတုဖေဖဝ်ဝါရဳ သၞာံဏံဂှ် သၞောဝ်ယိုက်ဂၠေၚ်လျိုၚ်ပၞာန် ကံၚ်ဇြဳပၞာန် ပၠောပ်လဝ်လမျီုဂှ်ဝွံ ဒဵုကဵုအခိၚ်လၟုဟ် လလောၚ်ပ္တိတ် နဲသၞောဝ်ဥပဒေ ဟွံမာန်ဏီကီုလေဝ် သွက်တန်ဗ္တောန်ကွတ်ပၞာန်တံဂှ် ပကောံကၠုၚ်ဒၟံၚ် ကောန်ဒပ်တၟိတၟိတံ နကဵုနဲကဲနာနာသာ်ရ။
အခိၚ်လၟုဟ် ကလိဂွံလဝ် နဲသၞောဝ်ဥပဒေယိုက်ဂၠေၚ်လျိုၚ်ပၞာန် (မူအပြောံ အဋ္ဌမ) ဂှ်တုဲ ဗွဲမဗဗွဲကဵုလၟေၚ်ကမၠောန်တံဂှ် ပ္တိုန်ထ္ၜးအဆံၚ်ၚ်တုဲ လလောၚ်ပ္တိတ်ကဵုအာ နဲသၞောဝ်ဥပဒေတံဂှ်ဏောၚ် သ္ကိုပ်ဗိုလ်ဇၞော် တေန်အံၚ်သာန် သ္ဂးရ။
ပ္ဍဲရးဒေသ ကေုာံ တွဵုရးဂမၠိုၚ် အခိၚ်ကော်ကၠုၚ်ဂွံယိုက်လျိုၚ်ပၞာန်တံဂှ် ကော်ကၠုၚ် နကဵုဗွဲအဓမ္မ ညံၚ်ဟွံဂွံဒှ် ဒးရှ်ေသှ်ေ လၟေၚ်ကမၠောန် တၚ်စၞောန်ပၟိၚ်တံဂှ်ဏောၚ် ဟီုရ။
ဆ္ဂး ပ္ဍဲဗလးတိဏံဂှ်တှ်ေ စန်ဒက်ကဵုသြန်ကီု၊ ရပ်ကော်အတေၚ်အဓမ္မကီု၊ ပတေၚ်ဂရတ်ရပ်ကော်ကၠုၚ် နကဵုနဲကဲတံဏံဂမၠိုၚ် ပကောံကၠုၚ်ဒၟံၚ်ညးယိုက်လျိုၚ်ပၞာန်တံဂှ်ရောၚ် လိက်ဒုၚ်စဳရေၚ် ဂကောံလ္ၚတ်ကေၚ်ကာဗၟာ ကေုာံ ပဋိပက္ခ BACS ထ္မံက်ထ္ၜးလဝ်ရ။
မွဲလ္ပာ်ဂှ်ပၠန် ပ္ဍဲကဵုညးစှ်ေနူတန်ဗ္တောန်ယိုက်လျိုၚ်ပၞာန် ဒးဒုၚ်ပလံၚ်လဝ်မုက်ပၞာန်တံဂှ် မၞိဟ်ဇီုကပိုက်ချိုတ်တံကဵု မၞိဟ်ဂြိပ်တိတ်တံလေဝ် နွံဒၟံၚ် ဗွဲမဂၠိုၚ်ဂၠေၚ်တုဲ လၟိဟ်ချိုတ်တ်ပၠိုတ်တ်ဂှ်တှ်ေ ကံက်ကပှ်ဟွံမာန်ဏီပုဟ်ဂှ် BACS သ္ဂးလဝ်ရ။
သၟာပရေၚ်ဍုၚ်ကွာန်ဝှ်ကြံၚ် ဥူဖေတာန်ဂှ်တှ်ေ သွက်ဂွံလုပ်ပၞာန်ဂှ် လုကဴကော်ကၠုၚ်ဒၟံၚ်ဗွဲအဓမ္မမ္ဂး ကောန်ဒပ်တၟိတၟိတံလေဝ် ဂြိပ်တိတ်အာ ညံၚ်ရဴကောန်ဒပ်တြေံတြေံတံအိုတ်ဏောၚ်ဂှ် ဟီုရ။
“ကၠောန်ကၠုၚ်ဒၟံၚ် နကဵုဗီုပြၚ်ကော်ကေတ်ဗွဲအဓမ္မတံဂှ်မ္ဂး ပြသၞာဏံဂှ် ဆက်နွံဒၟံၚ်ဏောၚ်။ ကောန်ဒပ်တြေံတြေံ နွံဒၟံၚ်တုဲတုဲတံရဂှ် ဗ္စူအလာံဗုတံ ဂြိပ်တိတ်တံ အခိၚ်ကၠောန်ဒၟံၚ်အိုတ်ဂှ် ကောန်ဒပ်တၟိတံဂှ်တှ်ေ ဂွံကွာ်ဗက်အာ ဂၠံၚ်ဏံဂှ် လောဲသွာအာရ။ နူတမ်တေံဂှ်လေဝ် စိုတ်လုပ်စဟွံသေၚ်တုဲ ဂေတ်ဒၟံၚ်အကြာဏံရဏောၚ်ဂှ် အဲထေၚ်ကေတ်ရ” သာ်ဝွံ သ္ဂးရ။
အခိၚ်လၟုဟ် တန်ဗ္တောန်ကွတ်ပၞာန် ကံၚ်ဇြဳပၞာန်ဂှ်ဝွံ ပံက်လဝ် စဵုကဵုလၟေၚ် ၆ တုဲ သွက်လၟေၚ်ဂတဂတတံဏံဂှ် ညံၚ်လၟိဟ်မၞိဟ်မစၟတ်လဝ် ဂွံဍိုက်ပေၚ်ဂှ် ကဵုလဝ်စၞောန် ကုဂကောံကော်ပကောန်ပၞာန် မဆေၚ်စပ်တံရ။
အတိုၚ်တၚ်နၚ် BACS ဂှ်မ္ဂး နူကဵုတန်ဗ္တောန်ကွတ်ပၞာန် လၟေၚ် ၁ စဵုစိုပ် လၟေၚ် ၅ လၟိဟ်မၞိဟ် ဟွံအောန်နူကဵု ၂၁၀၀၀ ဒးဒုၚ်ပ္ကောံပလဝ်ကောန်ဒပ်တုဲ လၟိဟ်ညးမစှ်ေနူတန်ဗ္တောန် ၁၃၀၀၀ ပြၚ် နူကဵု ၃ လၟေၚ်ဂှ် ဒးဒုၚ်ပလံၚ်ဏာလဝ် မုက်ပၞာန်တေံဂှ် ဂွံတီကေတ်ရ။
ပရိုၚ်−သြၚ်လောန်တိုၚ်(မ်)
ဗီု−SAC Telegram