ဝါယှေန်တာန်၊ နဝ်ဝေမ်ဗာ ၁၄
ဒဝ်နေဝ်ထြာပ် ဂွံဇၞးလဝ် ပေါဲရုဲမာဲသမ္မတအမေရိကာန်ဂှ် ရန်ကဵုညံၚ်ကမၠောန်အလဵုအသဳ ဂွံစိုပ်တရဴဗွဲမပြဟ်ဂးတုဲ ပ္ဍဲဂိတုနဝ်ဝေမ်ဗာ ၁၂ တေံ ပၠောပ်လဝ်စရၚ်ယၟု တၠဓနသိုက်အိုတ်လ္တူဂၠးတိဏံ အဳလောန်မက်ကဵု ဗဳဗက်ရာမက်ဝါမဳ ကေၚ်ဒှ်ကၠုၚ်လဝ် ညးစၞးပေါဲရုဲမာဲသမ္မတ ရဳပါပလေတ်ကာန် နဒဒှ်ညးက္ဍိုက်ပ် ပ္ဍဲကဵုဌာနတၟိတံဂှ်ရ။
ဗဳဗက်ရာမက်ဝါမဳ ကေုာံ အဳလောန်မက်တံဝွံ သ္ကိုပ်သ္ကဌာနတံဏံတုဲ ဒးကောပ်ကာဲအာ နူကဵုမ္ၚးဂကောံအလဵုအသဳဂှ်ဏောၚ်ဂှ် ထြာပ် ကဵုကၠုၚ်ဓရိပ်အရေဝ်ရ။
ကၠာဟွံဂွံစိုပ်ပေါဲရုဲမာဲ ပ္ဍဲကဵုတွဵုရး သီုညးစၞးၜါတၠ ကလိဂွံဇၞးမာန်ဂှ် အဳလောန်မက် ကဵုကၠုၚ်လဝ် ညးကဵုမာဲဂမၠိုၚ် မွဲတ္ၚဲ ဒဝ်ဠာ ၁ ပြကောဋိကိုဋ်တုဲ စန်ဒက်ကၠုၚ်လဝ်မာဲ သွက်ထြာပ်ရ။
ပ္ဍဲကဵုညးထံက်ဂလာန် ပရေၚ်ပလေဝ်ပလေတ် သၞောဝ်သ္ဇိုၚ်အမေရိကာန် အလန်ပထမကဵု အလန်ဒုတိယတံဂှ် မွဲတ္ၚဲ မွဲတၠ ညးကဵုလဝ် ဒဝ်ဠာ ၁ ပြကောဋိကိုဋ်ရ။
အခိၚ်ပလေဝ်ဒၟံၚ် သ္ဂောံပြံၚ်ဒုၚ်ကေတ်တဲ ကဆံၚ်ဌာနန္တရသမ္မတဂှ် ထြာပ် သွက်ဂွံခါန်ကၞက်ပ္တိုန် ညးပ္တိုန်ထ္ၜးအစဳဇန် Fox News ပိဟက်သေတ်(ချ်) သီုကဵုဒှ်ကောန်ပၞာန်တြေံမွဲတၠ နဒဒှ်ဝန်ဇၞော်ကာစဵုဒၞါဂှ်လေဝ် ပၠောပ်လဝ်စရၚ်ယၟုရ။
ရဳပါပလေတ်ကာန်တံဝွံ ဂွံလဝ်ဇၞး ပေါဲရုဲမာဲသမ္မတဂှ်တုဲ အပ္ဍဲကၠတ်ထဝ် မၞိဟ်ဗွဲမဂၠိုၚ် ဂွံဂွံဒၞါဲဂှ်လေဝ် ညန်ကြပ်ကၠုၚ်ဒၟံၚ်ယျဂှ်တုဲ ပ္ဍဲလက်ထက်ထြာပ်ဏံဂှ်တှ်ေ အရာရာအိုဿီု ဗီုပြၚ်မကၠောန်အာ အတိုၚ်ပၟိက်စိုတ်ညး ဟွံမွဲကဵုပရေၚ်တာဒၞါတံဂှ် ဂွံဆဵုကေတ်ဒၟံၚ်ရ။
သွက်ဂွံခါန်ကၞက်ပ္တိုန် ဂျောန် ရာတ်ကလေဖ် နဒဒှ်သ္ကိုပ်စၞောန်ပ္ညုၚ် ပရေၚ်ထံၚ်ပရိုၚ်ဂှ် ထြာပ်ပၠောပ်လဝ်စရၚ်ယၟုတုဲ နဒဒှ်ဝန်ဇၞော်အပ္ဍဲဍုၚ်ဂှ် ပၠောပ်လဝ်စရၚ်ယၟု ခရေဿတဳ နဝ်အာမ် သ္ကိုပ်အုပ်ဓုပ် တွဵုရးဒါကဝ်တာသၠုၚ်ကျာဂှ်ရ။
ဂွံခါန်ကၞက်ပ္တိုန် နဝ်အာမ် ပ္ဍဲကဆံၚ်ဌာနန္တရဏံဂှ် ဒးကေတ်အခေါၚ် နူကဵုကၠတ်ထဝ်ဏောၚ်ကီုလေဝ် သ္ပဟိုတ်ကဵုရဳပါပလေတ်ကာန် ဂွံဇၞးအာ ကၠတ်ထဝ် ဒၞါဲဗွဲမဂၠိုၚ်မာန် ချိုတ်ပၠိုတ်ဒၟံၚ်ဂှ်တုဲ တၚ်အခက်အခုဲမမိက်ကဵုမွဲမွဲ ဂွံက္တဵုဒှ်ဂှ်လေဝ် ဟွံညာတ်ရ။
ဌာန အဳလောန်မက် က္ဍိုက်ပ်ဂှ် သွက်ဂွံသီပလီု သၞောတ်ဗျူရိုဝ်ကရေသဳ အလဵုအသဳ၊ သွက်ဂွံပလီုကၠေံ သၞောဝ်မလောန်ကာဲဒၟံၚ်ဂမၠိုၚ် ကေုာံ သွက်ဂွံဖအောန်ဖျေံ ခရိတ်အရပ်စပ် မလောန်ကာဲတံဂှ် ကေတ်အာတာလျိုၚ်ဏောၚ် ထြာပ် ဟီုလဝ်ရ။
Ref: BBC/ Reuters