ယှာန်ဟိုၚ်၊ နဝ်ဝေမ်ဗာ ၁၃
အခိၚ်ညးလ္ၚတ်ဂမၠိုၚ် ကေုာံ ဍုၚ်ဇြဟတ်ဇၞော် လ္ပာ်ဒစဵုဒစးဂမၠိုၚ် မၚ်ရံၚ်ဒၟံၚ် ပရေၚ်အလဵုအသဳဗေကျေန် ကၠောန်ပ္တိတ်လွဟ်လက်နက်ပၞာန်တံဂှ် နဒဒှ်အခေါၚ်လ္ၚတ် ဇြိုၚ်ကဵုက္တဵုဒှ်မွဲ ပ္ဍဲကဵုပေါဲထ္ၜးပျးတရဴကျာ မကၠောန်ဗဒှ်အာ ပ္ဍဲသတ္တာဟဂတဏံဂှ် ကြုက် ဆက်အာမိတ် ထ္ၜးပျးအာကဵု ဒရုၚ်ဗ္တိုက်တံကဵု က္ၜၚ်ကျာဗ္တိုက်တံဏောၚ် မဒှ်ရ။
ပ္ဍဲကဵုပေါဲထ္ၜးပျးတရဴကျာ Airshow China လေပ်ကၠောန်ဗဒှ် ၜါသၞာံမွဲဝါ ပ္ဍဲဍုၚ်သ္ကုတ်သၠုၚ်ကျာ ဍုၚ်ကျူဟိုၚ်ဂှ် ကြုက်ဂှ်တှ်ေ ဒဒှ်ရပရေၚ်ဆက်ဆောံဍုက်ကေဝ် ကုရုယှာ နွံဂှ်လေဝ် ထ္ၜးပျးအာဏောၚ်ဂှ် ဂွံတီကေတ်ရ။
သွက်ဂွံဆေၚ်မုက်ဗ္တိုက်အာ အမေရိကာန် ကေုာံ ကၟိန်ဍုၚ်အပ္ဍဲဒေသ မပ္တံကဵုထိုၚ်ဝါန် ကေုာံ ဍုၚ်တၞဟ်ဟ်တံမာန်ဂှ် ပ္ဍဲကဵုပရေၚ်သၠုၚ်ပ္တိုန်အစောန်စရာဲဒပ်ကျာညးတံဂှ် ကြုက် စကာလဝ်တမ်ရိုဟ်ဗွဲမဂၠိုၚ်ဂၠေၚ်ရ။
ဗေကျေန်ဂှ်တှ်ေ ဗလးဏာလဝ် က္ၜၚ်ကျာဗ္တိုက် ဗ္ဒါဲတ္ကအ်ထိုၚ်ဝါန် နူကဵုညးတံ မဟီုကြီုလဝ်ဒေသအပိုၚ်ညးတံဂှ်တုဲ ညံၚ်ဂွံကလေၚ်ပၠောပ်ထိုၚ်ဝါန် သၟဝ်အုပ်ဓုပ်ညးတံဂှ် နွံပၟိက်မ္ဂး ရပ်စပ်အာသီုဇြဟတ်ဏောၚ်ဂှ် ဟီုလဝ်ရ။
ညးလ္ၚတ်ဂမၠိုၚ် ဟီုလဝ် ကြုက် ကၠောန်ခၞံဗဒှ်လဝ် က္ၜၚ်ကျာဗ္တိုက် အဇာလဒေါဝ် ရပ်စပ်ဒၞါဲစုၚ်ဂွံ မသၟဟ်ကဵုက္ၜၚ်ကျာအမေရိကာန်ပ္တိတ် အေဖ်−၃၅ ဂှ်ကီုလေဝ် တၚ်နၚ်သောဲသောဲဗြောဲဗြောဲဂှ်တှ်ေ တိတ်ကၠုၚ် ၜိုတ်ညိညဓဝ်ညိကီုရ။
အစောန်စရာဲ က္ၜၚ်ကျာဏံဂှ် ဗေကျေန် ထ္ၜးပျးအာ ပ္ဍဲကဵုပေါဲထ္ၜးပျးတရဴကျာဂှ် ဟွံသေၚ်ဏီကီုလေဝ် ဟိုတ်နူပလေဝ်ပလေတ်လဝ် သွက်ဂွံဆက်မိတ်ကၠုၚ် သာ်ဏံဂှ်တုဲ ဒဒှ်ရစၟဳကေတ် ကၠောန်အာပရေၚ်စမ်ၜတ်ပဝ်ယာန်တံဏောၚ်ဂှ် ညးစိစောန် ပရေၚ်ပၞာန်ကြုက် နူကဵုတက္ကသိုလ်နဲကွတ်ပညာနယာန် ဍုၚ်သေန်ကာပေါဝ် ဂျုၚ်ချာ ဟီုလဝ်ရ။
ယဝ်ရသုၚ်စောဲကၠုၚ် က္ၜၚ်ကျာဗ္တိုက်ဏံယျမ္ဂး ကြုက်ဝွံ လ္တူဂၠးတိဏံ အမေရိကာန်တုဲမ္ဂး ဒှ်ကၠုၚ်ဍုၚ်ရပ်စပ် က္ၜၚ်ကျာဗ္တိုက် Stealth Fighter ၜါဖ္ဍိုက် မွဲဍုၚ်ဏောၚ်ဂှ် ဂွံတီကေတ်ရ။
နဒဒှ်အလန်ကိုပ်ကၠာအိုတ် ဒပ်ဍာ်ကြုက် ဒဒှ်ရထ္ၜးပျးဆက်မိတ်အာကဵု ဂကူက္ၜၚ်ကျာဗ္တိုက်ဒပ်ဍာ်မွဲဂကူဂှ်လေဝ် ထ္မံက်ထ္ၜးလဝ် ပ္ဍဲကဵုပရိုၚ်ကၟိန်ဍုၚ်ပိုၚ် CCTV ရ။
အရာဒပ်ပၞာန်ကြုက် ထပ်ဆက်မိတ်ကဵုအာမွဲပၠန်ဂှ်တှ်ေ သၞောတ်ကမ်လှောဝ် နူဗလးတိ ပန်ပ္တိုန်မှဲအကးတေံဂွံ မကဵုလဝ်ယၟု HQ-19 မဒှ်ရ။
သၞောတ်ဏံဂှ်တှ်ေ ရန်တၟံကၠောန်ပ္တိတ်လဝ် သွက်ဂွံကြတ်ပန်ဖျေံ ကမ်လှောဝ်(ပဲ့ထိန်း) တံဂှ်ဏောၚ် ဌာန်ပရိုၚ်ကၟိန်ဍုၚ်ပိုၚ်ဂှ် ထ္မံက်ထ္ၜးလဝ်ရ။
ဂကူဒရုၚ် ကဵုလဝ်ယၟု SS-UAV မွဲဂကူပၠန်ဂှ်လေဝ် နူကဵုဒပ်ပၞာန်ကြုက် ထပ်ဆက်မိတ်ကဵုအာဏောၚ်တုဲ နူကဵုၝောံဒရုၚ်ဇၞော်ဂှ် ဗလးအာ ဒရုၚ်အဇာဍောတ် တၟာဂလိုၚ်မာန်ဂှ် ဂွံတီကေတ်ရ။
ပ္ဍဲကဵုဒရုၚ်တံဏံဂမၠိုၚ် ဒရုၚ်ဗ္တိုက်ဒုၚ်ချိုတ်တံ၊ ဒရုၚ်ထံၚ်ပရိုၚ် ကေုာံ ဒရုၚ်ကလေံဇကုတံလေဝ် ပါလုပ်အာဏောၚ်ဂှ် ဌာန်ပရိုၚ်ကၟိန်ဍုၚ်ပိုၚ် ထ္မံက်ထ္ၜးလဝ်ရ။
Ref: AFP