မတ်မလီု၊ နဝ်ဝေမ်ဗာ ၁၅
ပ္ဍဲတွဵုရးဍုၚ်မန် ညံၚ်ကၠေၚ်စဂွံရုမ်ဂပ် သွက်ဂွံတဵုဂလိုၚ်ပ္တိုန် သတ်ကၠေၚ်တိတ် မပ္တံကဵုၜဲတိ၊ လ္ၚဴ ကေုာံ သတ်ပ္ကဴသၟိၚ်တ္ၚဲတံဂှ် သ္ကိုပ်ဝန်ဇၞော်တွဵုရး ကံၚ်ဇြဳပၞာန်ခါန်ကၞက်ပ္တိုန်လဝ် ဥူအံၚ်ကျဳတုၚ် စၞောန်ကၠုၚ်ရ။
သွက်ဂွံတဵုဂလိုၚ်ပ္တိုန် သတ်ကၠေၚ်တိတ်အခိၚ်မုဟ်ကျာ မပ္တံကဵု ၜဲတိ၊ လ္ၚဴ ကေုာံ တၞံပ္ကဴသၟိၚ်တ္ၚဲတံဂှ်ဂးတုဲ ပ္ဍဲဂိတုနဝ်ဝေမ်ဗာ ၁၂ တေံ ကော်ကၠောန်ဗဒှ်လဝ် ကောံဓရီုမွဲ ပ္ဍဲရုၚ်အလဵုအသဳတွဵုရး လ္တူဍုၚ်မတ်မလီု တွဵုရးဍုၚ်မန်ဂှ်ရ။
ပ္ဍဲကဵုကောံဓရီုဂှ် ဥူအံၚ်ကျဳတုၚ် ဟီုကၠုၚ် တၞဟ်နဂွံကဵုကၠေၚ်စရုမ်ဂပ်ဂှ် ဒဒှ်ရရန်လဝ် သွက်ဂွံတဵုလွဳသတ်ကၠေၚ်တိတ်အပ္ဍဲကဵုသၞာံဏံ ၜဲတိ ဗ္ဒါဲ ၃၀၀၀၀ ဨက၊ တၞံပ္ကဴသၟိၚ်တ္ၚဲ ၁၂၀၀၀ ဨကပြၚ်၊ လ္ၚဴ ၂၀၀၀ ဨကပြၚ် မဒှ်ရ။
သၟာဗ္ၚမွဲတၠဂှ်တှ်ေ ပ္ဍဲကဵုတဵုလွဳသတ်မုဟ်ကျာတံဂှ် သၟာဗ္ၚဗွဲမဂၠိုၚ်ဂှ်တှ်ေ တဵုဒၟံၚ်သတ်မကိတ်ညဳကဵု ဒေသညးတံသၟးရတုဲ ကဵုတဵုလွဳကၠုၚ် ဗွဲအနိၚ်အပိုၚ်မ္ဂး စၞးဂွံဒှ်ဖဵုဂုန်ဂှ် လ္ပာ်ပရေံသၟးဂၠိုၚ်မာန်ရောၚ် ဟီုရ။
“လ္ပာ်ပိုယ်တံဂှ်တှ်ေ သတ်မကိတ်ညဳကဵု ဒေသညးတံဂှ်ရ ကၠောန်ဒၟံၚ်အိုတ်။ အရာမကၠောန်ဒၟံၚ်လၟုဟ် ယဝ်ဍေံဒှ်ဒၟံၚ် အံၚ်ဇၞးဒၟံၚ်ဟီုတှ်ေ တဵုအာကၠောန်အာ သတ်တဵုဒၟံၚ်လၟိုန်ဏံဂှ်ရဏောၚ်။ သၟာဗ္ၚလ္ပာ်ဏံဂှ်တှ်ေ ယဝ်ရကဵုကၠောန်ကၠုၚ် ဗွဲအဓမ္မ သာ်ဏံမ္ဂး ဟွံပြေပြံၚ်ပုဟ်။ သၟာဗ္ၚတံဂှ်တှ်ေ လ္တူနူကဵုဂွံဒှ်ဖဵုဂှ် စိုပ်အာလ္ပာ်ပရေံသၟးရဏောၚ်။ ယဝ်ရကၠောန် ကမၠောန်ဟွံစိစောန်တံဂှ်မ္ဂး သွက်သၟာဗ္ၚတံဂှ်တှ်ေ သၞာံဏံဂှ် ဒးဟဳဍာ်ရ” သာ်ဝွံ သ္ဂးရ။
ဒၞါဲတဵုလွဳသတ်မုဟ်ကျာဏံဂှ် တန်တဴကဵုတိတုဲ ယဝ်ရတဵုလွဳအာ သတ်မကိတ်ညဳတံဂှ်မ္ဂး ဍေံဒှ်အံၚ်ဇၞးအာဏောၚ်တုဲ သတ်ဟွံကိတ်ညဳကဵု အပ္ဍဲဒေသသာ်ဏံတံဂှ် ယဝ်ရကဵုတဵုကၠုၚ်မ္ဂး လ္တူနူကဵုဂွံအံၚ်ဇၞးဂှ် ပရေၚ်ဒးဆောံလေၚ်တံ ဂၠိုၚ်ကၠုၚ်ဏောၚ်ဂှ် ညးဆက်ဟီုရ။
တၠကမၠောန် ကၠောန်သတ်မုဟ်ကျာ အပ္ဍဲဒေသမွဲတၠဂှ်လေဝ် ပ္ဍဲအရာတဵုလွဳသတ်ကၠေၚ်တိတ်တံဂှ် ဒေသဂွံအံၚ်ဇၞး အောန်တဴတံဂှ်လေဝ် နွံတုဲ တိ တဵုသတ်ကၠေၚ်တိတ်ဂွံတံ နွံကီုလေဝ် နွံပၟိက်ဒၟံၚ်ကဵု ပရေၚ်ရီုဗၚ်ထံက်ပၚ် ပါလုပ်သီုကဵုနဲကွတ်ပညာတံ တၟာဂလိုၚ်ဂှ် ဟီုတဴရ။
“ခရိုၚ်မတ်မလီုတှ်ေ ဇြပ်ဗု၊ ရေဝ်တံဂှ် ဂွံအံၚ်ဇၞး ဟွံလောဲပုဟ်။ တိသှ်ေတံဂှ်တှ်ေ ဒှ်တိကိတ်ညဳကဵု သတ်ကၠေၚ်တိတ်တံဂှ်ရဏောၚ်။ ဆ္ဂး ဗ္ၜတ်တိဂှ် ဟွံဂွံဏီ။ အဓိကဂှ်တှ်ေ သၞာဲဒဴပရေၚ်တဵုလွဳတံဂှ် ဒၞါဲလဵုဂှ်တှ်ေ ကြိုက်ကဵုသတ်ပ္ကဴသၟိၚ်တ္ၚဲတံဂှ်ရော။ ဒၞါဲလဵုဂှ်တှ်ေ ကိတ်ကဵုၜဲတိတံဂှ်ရော။ ဒၞါဲလဵုဂှ်တှ်ေ တဵုလ္ၚဴဂွံရောဟီုဂှ် ဒးဖျေံစၟတ်ကဵုဏောၚ်။ တုဲမ္ဂး အခက်အခုဲသၟာဗ္ၚတံဂှ်လေဝ် နွံဒၟံၚ် ဟွံအောန်ပုဟ်။ ဒးသောၚ်ကလးအာ အခက်အခုဲတံဂှ်ဏောၚ်။ ဂွံအံၚ်ဇၞး ယဝ်ရမိက်ဂွံကၠောန်မ္ဂး လၟေၚ်ကမၠောန်မ္ဒးကၠောန်ဂှ် နွံတၟာဂလိုၚ်ရ” သာ်ဝွံ သ္ဂးရ။
သ္အာၚ်နူဂှ်ပၠန် အပ္ဍဲဒေသဂှ် လေပ်ရပ်စပ်သုၚ်စောဲ ကၠေၚ်လ္ၚဴ ဟွံမွဲကီု၊ ၚုဟ်ကၠေၚ်ၜဲတိဂှ်လေဝ် က္ဍၚ်ဒၟံၚ်တုဲ ကၠေၚ်ပ္ကဴသၟိၚ်တ္ၚဲဂှ်လေဝ် ၚုဟ်က္ဍၚ် အောန်တဴဂှ်ရ ကဵုတဵုလွဳကၠုၚ်သာ်ဏံကီုလေဝ် ယဝ်ရဖအောန်ဖျေံ သွံအာ ၜိုတ်ၚုဟ်ကၠေၚ်စလၟုဟ်မှ ပြေပြံၚ်ဏောၚ်ဂှ် ညးဆက်ဟီုရ။
မွဲလ္ပာ်ဂှ်ပၠန် သ္ကိုပ်ဝန်ဇၞော်တွဵုရးဍုၚ်မန် ကံၚ်ဇြဳပၞာန် ခါန်ကၞက်လဝ်ဂှ်တှ်ေ ရုဲစှ်ကၠုၚ် မခိုဟ်ဟ် မအးအးတံဂှ်တုဲ သွက်ဂွံတဵုလွဳသတ်ကၠေၚ်တိတ်တံဂှ်ကီု၊ သၞောတ်တဵုလွဳ ကေုာံ ဂကူတိ ညံၚ်ဂွံဒး သွက်ဂွံတဵုလွဳဂှ်ကီု၊ ဒစးဒုၚ်ဂွံစဵုဒၞါအာ အန္တရာယ်စၟတံဂှ်ကီု ကေုာံ ရပ်စပ်ဝါဲ ဗွဲမစှ်ေကဵုသၞောတ်တုဲ ညံၚ်သတ်ဂမၠိုၚ် ဂွံတိတ်အတိုၚ်မရန်လဝ်ဂှ် ဗွဲမဇြိုဟ်နက် ဂွံရေၚ်တၠုၚ်အာဂှ် စၞောန်ပ္ညုၚ်ကၠုၚ် ဌာနမဆေၚ်စပ် သၟဝ်တဲညးဂမၠိုၚ်ရ။
ကၠေၚ်စအပ္ဍဲဒေသ ဗွဲမဂၠိုၚ်ဂှ် ဒးပၠောပ်ပ္တိုန် နူဍုၚ်သေံတုဲ ဒးရပ်စပ်ဒၟံၚ်တုဲ ကံၚ်ဇြဳပၞာန်ဂှ်တှ်ေ ရပ်စပ်ဒၟံၚ် ကၠေၚ်သတ်ဗြဴ နူကဵုကမ္မတဳကောပ်ကာဲကမၠောန် ပရေၚ်ပၠောပ်ပ္တိုန် တြးကၠေၚ်စ သၟဝ်တဲတံ မသွံတြးဒၟံၚ်တံဂှ် နွံဂှ် ဂွံတီကေတ်ရ။
ပ္ဍဲတွဵုရးဍုၚ်မန်ဂှ် တဵုလွဳဒၟံၚ်သတ်မုဟ်ကျာ ပ္ဍဲကဵုပွိုၚ်ဍုၚ်ကျာ်ထဝ်၊ ၜဳကလေၚ်၊ သဓီု၊ ပံၚ်၊ ကျာ်မြဟ်၊ ၜါသွာၚ်၊ မတ်မလီု ကေုာံ ပ္ဍဲပွိုၚ်ဍုၚ်မုဟ်ဍုၚ်တံ ဂၠိုၚ်အိုတ်တုဲ နဒဒှ်သတ်တဵုလွဳတံဂှ်တှ်ေ တဵုလွဳဒၟံၚ်ၜဲနာနာ (မတ်ပဲ၊ ပဲတီစိမ်း၊ ပဲပုပ်၊ ပဲတီစိမ်း ရွှေဝါ) အဓိကရ။
ပရိုၚ်−သြၚ်လောန်တိုၚ်(မ်)
ဗီု−CJ