ပံၚ်၊ နဝ်ဝေမ်ဗာ ၁၇
နကဵုတၚ်စောဲစပ် ဆက်စပ်ဒၟံၚ်ကဵုရဲပကီုပရာပ်တံဂှ်ဂးတုဲ ကံၚ်ဇြဳပၞာန် ကၠုၚ်စိုပ်ကၟာတ်လဒဵုဏာလဝ် သ္ၚိ ၆ မ ပ္ဍဲကွာန် ( ဥတ္တံတား) ပွိုၚ်ဍုၚ်ပံၚ် တွဵုရးဍုၚ်မန်ဂှ် ညးဒေသတံ ဟီုရ။
တုဲကၠုၚ် ပ္ဍဲဂိတုနဝ်ဝေမ်ဗာ ၅ တေံ ကောန်ဒပ်ကံၚ်ဇြဳပၞာန် ဇြဟတ် ၂၀ ပြၚ် စိုပ်ကၠုၚ်ကွာန်(ဥတ္တံတား) အပ္ဍဲ နကဵုကွဳစက် ၃ ဖ္ဍိုက်တုဲ ကၠုၚ်စိုပ်ကၟာတ်ဏာလဝ် သ္ၚိဒၟံၚ် ဥူကျဝ်ဇြဲ၊ ဥူအံၚ်ကျဝ်မဵု၊ ဒဝ်တာန်ဥူ၊ ဥူဇြုၚ်တူ၊ ဥူဖဵုပျအ်၊ ဥူသဥူတံဂှ်ရောၚ် သ္ဂးရ။
ကၠုၚ်ကၟာတ်လဒဵုလဝ် သ္ၚိမိမသၟတ် မဒးဒုၚ်ရပ်လဝ်ကဵုကံၚ်ဇြဳပၞာန်တံ ပ္ဍဲဂိတုတုဲကၠုၚ်တေံကဵု သ္ၚိညးဒေသလ္ၚဵုတံဂှ် မဒှ်တုဲ ပ္ဍဲကဵုဂတမုက်သ္ၚိတံဂှ် ကွက်စွံဏာလဝ်လိက် မချူလဝ် ဟိုတ်နူဆက်စပ်ကဵုရဲပကီုပရာပ်တံတုဲ မ္ဒးကၟာတ်လဝ်ဂှ်ရောၚ် ညးဒေသမွဲတၠ ဂးလဝ်ရ။
ကၠာဟွံဂွံကၟာတ်လဒဵုသာ်ဏံ ကၠာမွဲသတ္တာဟဂှ် ကဵုကၠုၚ်ဇြဟတ်ဂရိုဟ်ကောန်ဂြောဝ်ဂတာ မမံၚ်ဒၟံၚ်အပ္ဍဲသ္ၚိတံဂှ်ဂမၠိုၚ် သွက်ဂွံပြံၚ်အာ နူကဵုသ္ၚိဂှ် နွံရောၚ် သ္ဂးရ။
ကြဴနူကၟာတ်လဒဵုကၠုၚ်သာ်ဏံတုဲဂှ်လေဝ် ဂကောံကံၚ်ဇြဳပၞာန်ဝွံ လုပ်တိတ်အာကၠုၚ်ဒၟံၚ် အပ္ဍဲကွာန်ဂှ် ၜါပိတ္ၚဲမွဲဝါဂှ်တုဲ ညးဒေသဂမၠိုၚ် ဖေက်လကိုတ်ဒၟံၚ်အိုတ်ရ။
တုဲကၠုၚ် ပ္ဍဲဂိတုအံက်တဝ်ဗာ စၟတ်တ္ၚဲ ၄ ကဵု စၟတ်တ္ၚဲ ၆ တေံ မၞိဟ်တြုံ ၈ တၠ နူကဵုပွိုၚ်ဍုၚ်ပံၚ်၊ ကွာန်(ဥတ္တံတား) အပ္ဍဲ၊ ကွာန်ညံၚ်ကုန်ကျဳ၊ ကွာန် (သဲကုန်း) တံဂှ် ဒှ်ကောန်ဂကောံ PDF တံဂးတုဲ ဒပ်ကံၚ်ဇြဳပၞာန် ရပ်ဒက်ဏာလဝ်ရ။
မၞိဟ်တြုံ ၈ တၠဏံဂှ် ကံၚ်ဇြဳပၞာန် ရပ်ဒက်စၟဳတ်ဒၟံၚ် ပ္ဍဲကဵုဒၞါဲစၟဳတ်တံဂှ်တုဲ သ္ၚိမဆက်စပ်ကဵုညးတံဂှ် ဗက်ကၟာတ်လဒဵုဒၟံၚ်ရ။
မၞိဟ်တြုံ ၈ တၠဏံဝွံ ပြဟ်ဟ်ဏံ လမျီုဂျိုၚ်တဴ နွံ၊ ဟွံမွဲကီု၊ ဒးဒုၚ်ပံက်လဝ်ဂဗုတ် နွံ၊ ဟွံမွဲတံဂှ်လေဝ် ရဲသ္ၚိညးတံ မူမွဲမှ ဟွံဂွံဏီကေတ်ပုဟ်ဂှ် သ္ဂးရ။
တုဲကၠုၚ် ပ္ဍဲဂိတုအဝ်ဂါတ် ၁၉ တေံဂှ်လေဝ် ကွာန်(ဥတ္တံတား) မ္ၚး၊ အရာပ် ၆၊ သ္ၚိမွဲမ ပရေၚ်ဗ္တိုဟ်ထ္ကးက္တဵုဒှ်တုဲ သ္ၚိဂှ်လီုလာ်အာတုဲ မိုၚ် ကေုာံ ကပေါတ်မဆက်စပ် မၞုံအပ္ဍဲသ္ၚိဂှ်ဂမၠိုၚ် လ္ပာ်ကံၚ်ဇြဳပၞာန်တံ သီဏာလဝ်တုဲ သ္ၚိဂှ်လေဝ် ကၟာတ်ဏာလဝ်ရ။
ကြဴနူပၞာန်သီအဝဵုတုဲ အပ္ဍဲပွိုၚ်ဍုၚ်ပံၚ်ဂှ် သီုကဵုသ္ၚိညးစၞးကၠတ်ထဝ်တွဵုရး ဥူဇြဝ်ဇြဝ်ထူ မပါလုပ် သ္ၚိဟွံအောန်နူကဵု ၃၀ မ ဒးဒုၚ်ကၟာတ်လဒဵုလဝ်ဂှ် ဂွံတီကေတ်ရ။
ပရိုၚ်−သြၚ်လောန်တိုၚ်(မ်)
ဗီု−CJ