လဳမာ၊ နဝ်ဝေမ်ဗာ ၁၇
သမ္မတကိုဝ်ရဳယျာသၠုၚ်ကျာ ယောန်သက်ယော ဆဵုဂဗလဝ် သမ္မတကြုက် ယှဳကျေန်ဖျေန် အပ္ဍဲပွိုၚ်ၜါသၞာံ အလန်ကိုပ်ကၠာအိုတ်ဂှ် ဆက်စပ်ကဵုပရေၚ်ၜိုဟ်လလမ်၊ ပရေၚ်ညိၚ်ဝတ် ပ္ဍဲဒေသဂှ်တုဲ သွက်ဂွံသာပံၚ်တောဲရေၚ်တၠုၚ်အာ ကုအလဵုအသဳဗေကျေန် ပ္ဍဲဂိတုနဝ်ဝေမ်ဗာ ၁၅ တေံ ဒဒှ်ရဖ္တိုက်ဖ္အောဝ်လဝ်ဂှ် ဌာန်ပရိုၚ် Yonhap ထ္မံက်ထ္ၜးလဝ်ရ။
ကြုက်ဝွံ ကဵုကိုဝ်ရဳယျာသၟဝ်ကျာ ဍုၚ်မဒှ်ဒၟံၚ်ပၞာန်ဖိုဟ် ကုကိုဝ်ရဳယျာသၠုၚ်ကျာဂှ် ဒှ်မဟာမိတ် အဓိကမွဲတုဲ အခိၚ်လၟုဟ် က္ဍိုပ်သ္ကိုပ်ကိုဝ်ရဳယျာသၟဝ်ကျာ ကေန်ဂျုၚ်အာန် ဘပဠလဝ် ကုကိုဝ်ရဳယျာသၠုၚ်ကျာရ။
နဒဒှ်ကလေၚ်ခၠေဝ်ပလန် ကုပရေၚ်ကိုဝ်ရဳယျာသၟဝ်ကျာတံ ဂၠါဲသၞဂှ်ကီု၊ ပေါဲပၞာန်ယူကရုၚ်၊ အကြာရုယှာကဵု ကိုဝ်ရဳယျာသၟဝ်ကျာတံ ပံၚ်တောဲဒၟံၚ် ပ္ဍဲကဵုပရေၚ်ပၞာန်တံဂှ်တုဲ ညးတံၜါဍုၚ် ပံၚ်တောဲရေၚ်တၠုၚ်အာ ညံၚ်ပရေၚ်ညိၚ်ဝတ် ကေုာံ ပရေၚ်ၜိုဟ်လလမ် အပ္ဍဲဒေသ ဇြဟတ်ဂွံခိုဟ်ကၠုၚ်ဏောၚ် ဒဒှ်ရလ္ပာ်ညးတံ စၟဳစလဝ်ဂှ် နိဿဲကေတ် ဂလာန်သမ္မတယောန်ဂှ်တုဲ ထ္မံက်ထ္ၜးလဝ် ပ္ဍဲပရိုၚ်ရ။
က္ဍိုပ်သ္ကိုပ်ၜါဍုၚ် ၜါတၠဂှ်ဝွံ ကြဴနူကောံဓရီုပရေၚ်ပံၚ်တောဲရေၚ်တၠုၚ် ပရေၚ်ပိုန်ဒြပ် အာယှ−ပသိဝှေခ် ( APEC) မကၠောန်ဗဒှ်လဝ် ပ္ဍဲဍုၚ်ပဳရူတုဲဂှ် ဆဵုဂဗလဝ် မ္ၚးကောံဓရီုရ။
ကောံဓရီုဏံဂှ် ဍုၚ်သ္ပစၞး ပရေၚ်ကၠောန်ပ္တိတ်ဗၞိက်လ္တူဂၠးတိဏံ ၆၀ တၟံကၠံ ၂၁ ဍုၚ် တိုန်စိုပ်လဝ်ရ။
ပရေၚ်ကိုဝ်ရဳယျာသၟဝ်ကျာ ဗလးဏာလဝ် ကောန်ပၞာန် ပ္ဍဲယူကရုၚ် သွက်ဂွံဗ္တိုက် ကရောံဒပ်ရုယှာတံဂှ် မပါလုပ် စပ်ကဵုအကြာမဝ်သကိုဝ်ကဵု ပျုၚ်ယာန် ပံၚ်တောဲကၠုၚ်ပ္ဍဲကဵုပရေၚ်ပၞာန် ဂၠိုၚ်ကၠုၚ်တံဂှ်တုဲ ဒဒှ်ရဒှ်ဓဝိၚ်ဂှ် အလဵုအသဳကိုဝ်ရဳယျာသၠုၚ်ကျာ ဟီုလဝ် ဂၠိုၚ်ၚ်ကဵုဝါရ။
စပ်ကဵုက္ဍိုပ်သ္ကိုပ်ၜါတၠ ဆဵုဂဗလဝ်ဂှ်တုဲ ပ္ဍဲကဵုမဳဒဳယျာဍုၚ်ကြုက် မထ္မံက်ထ္ၜးလဝ်ဂှ် ထ္မံက်ထ္ၜးလဝ် ပရူရုယှာကဵု ကိုဝ်ရဳယျာသၟဝ်ကျာဂှ် ဟွံဂွံဆဵုကေတ်ရ။
အကြာကြုက်ကဵု ကိုဝ်ရဳယျာသၠုၚ်ကျာ သ္ဂောံပံၚ်တောဲရေၚ်တၠုၚ်အာ ဗွဲမစှ်ေကဵုမဟာဗျူဟာဂှ် ဒဒှ်ရသမ္မတယှဳကျေန်ဖျေန် ဖ္တိုက်ဖ္အောဝ်ဟီုလဝ်ဂှ် ပရိုၚ်ဇြေန်ဟွာ ကၟိန်ဍုၚ်ပိုၚ်ဂှ် ထ္မံက်ထ္ၜးလဝ်ရ။
ပ္ဍဲကဵုတ္ကအ်ကိုဝ်ရဳယျာဂှ် သွက်ဂွံဖအောန်ဖျေံ ပရေၚ်ကြံၚ်မ္ၚိုဟ်ဂမၠိုၚ် သ္ဂောံသောၚ်ကလးအာ နကဵုပရေၚ်ဍုၚ်ကွာန်ဂှ် ကၠာတေံလေဝ် ကြုက်ကေၚ်ဖ္တိုက်ဖ္အောဝ်လဝ်တုဲ ကြဴနူကိုဝ်ရဳယျာသၟဝ်ကျာ စၟတ်သမ္တီလဝ် ကိုဝ်ရဳယျာသၠုၚ်ကျာ နဒဒှ်ဍုၚ်သၞညးတံ အဓိကတုဲဂှ်လေဝ် ထပ်ဖ္တိုက်ဖ္အောဝ်လဝ် သာ်ဂှ်ပၠန်ရ။
ပ္ဍဲကဵုပရေၚ်ဆက်ဆောံ ကိုဝ်ရဳယျာသၠုၚ်ကျာကဵု ကြုက်ဂှ်လေဝ် တၚ်အခက်အခုဲ နွံဒၟံၚ်ညိညတုဲ ပ္ဍဲဂိတုတုဲကၠုၚ်တေံ ကြုက် ရပ်ဂွံလဝ် ကောန်ဍုၚ်ကိုဝ်ရဳယျာသၠုၚ်ကျာမွဲတၠ နကဵုတၚ်စောဲစပ်ကၠတ်ထံၚ်ပရိုၚ်ရ။
Ref: AFP