မတ်မလီု၊ နဝ်ဝေမ်ဗာ ၁၇
တွဵုရးဍုၚ်မန် ပွိုၚ်ဍုၚ်ရေဝ်ကဵု ရးတၞၚ်သဳ ပ္ဍဲပွိုၚ်ဍုၚ်ဂမၠိုၚ်ဂှ် ဒပ်မၚ်ပယျဵု BGF (KA) တံ ပံၚ်တောဲကဵုကံၚ်ဇြဳပၞာန်တုဲ ချဳဒရာၚ်ဒၟံၚ်ပရေၚ်ပၞာန်ရောၚ် ညးဒုၚ်တာလျိုၚ်ကရောၚ်ပၞာန်ဒဝ်ဏ သဝ်ဒါကိုဝ် ဟီုရ။
အပ္ဍဲပေါဲဗ္တိုက်ပွိုၚ်ဍုၚ်ရေဝ် မက္တဵုဒှ်လဝ် အပ္ဍဲဂိတုတုဲကၠုၚ်တေံဂမၠိုၚ် ဒပ် BGF ဏံဝွံ ပံင်တောဲကဵုကံၚ်ဇြဳပၞာန်တုဲ ဗ္တိုက်ကၠုၚ်လဝ် ဂကောံပၠန်ဂတးတံနွံတုဲ လိက်တၞး၊ သက်သဳသာဓက မဆက်စပ်ကဵု ဂကောံတံဏံဂှ်လေဝ် ကလိဂွံလဝ်ရောၚ် သ္ဂးရ။
ဒပ်မၚ်ပယျဵုသီုဖအိုတ် ၜးလှာဲအာလဝ်ဟွံသေၚ် နကဵုယၟု KA ဂှ် ပြံၚ်လှာဲကၠေံတဆိပ်တုဲ ပံၚ်တောဲချဳဒရာၚ်ဒၟံၚ်ကဵု ကံၚ်ဇြဳပၞာန်ရောၚ် ညးဒုၚ်တာလျိုၚ်ဒဝ်ဏ သဝ်ဒါကိုဝ် ဟီုရ။
သာ်လဵုဒှ်ဒှ် ယြဴဂကောံမွဲမွဲ မပံၚ်တောဲဒၟံၚ်ကဵုကံၚ်ဇြဳပၞာန်တံဂှ် သ္ပအာစၟတ်သမ္တီ နဒဒှ်မၞိဟ်လ္ပာ်ကံၚ်ဇြဳပၞာန်တံတုဲ လၞိန်ဗပိန်ဗ္တိုက်သရိုဟ်အာဏောၚ်ဂှ် သ္ဂးရ။
သ္အာၚ်နူဂှ်ပၠန် ပ္ဍဲပွိုၚ်ဍုၚ်ဍာ်ဗုဂှ်လေဝ် BGF တံ ချဳဒရာၚ်ဒၟံၚ်ပရေၚ်ပၞာန်၊ ဖျေံဒၟံၚ်ဗ္ဒိုပ်သၞေဟ်ကၚ် မွဲဟာန်ကေုာံကရောၚ်ပၞာန်ကံၚ်ဇြဳပၞာန်တံ နွံဒၟံၚ်ဂှ်လေဝ် သ္ဂးရ။
ဆ္ဂး ကောန်ဂကောံ BGF သဝ်ချေတ်တူဂမၠိုၚ် ဒဒှ်ရစိုပ်ဒၟံၚ် အပ္ဍဲရးတၞၚ်သဳ ပရိုၚ်ဏံဂှ် ညးတာလျိုၚ်တမ်ဒပ် ဒပ်မဟာ ၄ KNU ကေုာံ သ္ကိုပ်ဗျူဟာ BGF ဍုၚ်ဒပ်လၟိဟ် ၂၊ သ္ကိုပ်ဗိုလ်ဇၞော် သဝ်တေန်ဝေန်တံ ပ္ဍဲအရာသှ်ကဵုဌာန်ပရိုၚ်အပ္ဍဲဒေသတံဂှ် ကယျာန်ပါဲလဝ်ရ။
လောန်ကၠုၚ် ဗၞတ် ၂ ဂိတုတုဲကၠုၚ်တေံ ပ္ဍဲကဵုကရောၚ်ပၞာန်လုပ်စိုပ်ကၠုၚ် လ္ပာ်ပဠဝ် ကေုာံ သၞေဟ်ကၚ်စၟဳတ်မံၚ်မေဝ်ယှံၚ်၊ ပွိုၚ်ဍုၚ်ဍာ်ဗု ရးတၞၚ်သဳတံဂှ် ဂကောံဒပ် BGF ဂမၠိုၚ် ပါလုပ်ဒၟံၚ်ရောၚ် ဂွံတီကေတ်ရ။
ဂကောံရပ်လွဟ်မွဲဂကောံ သီုကဵုတဆိပ် BGF ဂှ်ဝွံ ဒဒှ်ရပရေၚ်အာကၠုၚ်ချဳဒရာၚ် ပ္ဍဲကဵုပွိုၚ်ဍုၚ်ဍာ်ဗု ဂၠံၚ်ကွဳစက်ပျဳထံၚ်သု စၟတ် ၈ ဂှ်ကဵု ပ္ဍဲကဵုသၞေဟ်ဍာ်ဒမျိုဟ်တံ နွံဒၟံၚ်ဂှ် ဂွံတီကေတ် အတိုၚ်ဂလာန်ညးဒေသတံကဵု အတိုၚ်ပရိုၚ် မပလံၚ်ဗစိုပ်နၚ် နူကဵုကရောၚ်ပၞာန်ဗလးတိတံရ။
ဒပ်ကံၚ်ဇြဳပၞာန် ဒးဗလးတဲဆောံလေၚ်လဝ် ဂၠံၚ်ဇၞော်ပျဳထံၚ်သု စၟတ် ၈ ဂှ်တုဲ သွက်ဂွံကလေၚ်ထိၚ်ဒက် တိဍာ်တံဏံဂှ် ကလေၚ်ဗ္တိုက်ဒၟံၚ် နကဵုဒပ်တိုက်၊ ဒပ်ဍာ်၊ ဒပ်ကျာ သီုကဵုဒရုၚ်တံရ။
ပရိုၚ်−သြၚ်လောန်တိုၚ်(မ်)
ဗီု−CJ