စပ်ကဵုပရေၚ်က္ဍိုပ်သ္ကိုပ် MNDAA ဒးဒုၚ်ထိၚ်ဒက်တုဲ ဇီုကပိုက်ကၠုၚ် လ္တူပရေၚ်ပၠန်ဂတးမာန်ဟာ

လာယှိုဝ်၊ နဝ်ဝေမ်ဗာ ၁၉

စပ်ကဵုသၟိၚ်တၠအဝဵုကြုက်တံ ထိၚ်ဒက်လဝ် က္ဍိုပ်သ္ကိုပ်ဂကောံကဝ်က MNDAA ဖုၚ်တာယှေန်ဂှ်တုဲ အရာမဇီုကပိုက် မဗဒှ်ကဵုအသိၚ်အလိုန်ပၠန်ဂတးက္ညၚ် ဂွံလဇုဲလဇအာတံ နွံကၠုၚ်မာန်ဟာ တၚ်သၟာန်သာ်ဏံဂမၠိုၚ် နွံဒၟံၚ်ရ။

ပရေၚ်ပၞာန် ၁၀၂၇ ပ္ဍဲရးသေံသ္ကုတ်သၟဝ်ကျာဂှ် ဗွဲစိုတ်ဓာတ်ကီု ဗွဲဇြဟတ်ကီု တက်ပကဝ်ကၠေံ ဒပ်ကံၚ်ဇြဳပၞာန်တုဲ ဗဒှ်ကဵုအပြံၚ်အလှာဲ ဝၚ်ဒပ်ပၞာန်မွဲပ္ၚံက်ဂှ် ပ္ဍဲပရေၚ်ပၞာန်ဏံဂှ် MNDAA ထိင်ဂွံလဝ် ဍုင်လာယှိုဝ် ဒၞါဲဌာန်ဂအုပ်ပၞာန်ရး မဖျေံသ္ဇိုၚ်ဂှ်ရ။

တုဲကၠုၚ် ပ္ဍဲဂိတုအံက်တဝ်ဗာကြပ်အိုတ်တေံ တုက်ယှဳကျေန် ညးစၞးတၟေၚ်ကေၚ်ကာအာယှ၊ ဌာနကာဍုၚ်သ္အာၚ်ဍုၚ်ကြုက်ကဵု ဖုၚ်တာယှေန်တံ သဳကၠဳလဝ် ပ္ဍဲတွဵုရးယူနာန်တုဲဂှ် သၟိၚ်တၠအဝဵုကြုက်တံ ဟွံကလေၚ်ဗလးရတုဲ ရပ်ချုက်လဝ် အပ္ဍဲကဵုသ္ၚိဂှ် ပရိုၚ်ဂမၠိုၚ် မံက်တိတ်ဒၟံၚ်ရ။

ဆ္ဂး ပြဟ်ဟ်ဏံ လ္ပာ် MNDAA သ္ပဒတန်လလောၚ်တြးလဝ် ဗွဲမလုပ်သၞောဝ် ဟွံမွဲဏီတုဲ နူကဵုမုက်လိက်ဇာဇၞိက်ပရေၚ်ပၞာန် FACEBOOK ရုင်ကလုတ်ဍုင်ကြုက် စပ်ကဵုဍုၚ်ဗၟာဂှ်လေဝ် လလောၚ်ပ္တိတ်လဝ်ပရိုၚ်ဂှ် ဟွံမွဲဏီရ။

ဥူတာန်သဵုနာၚ် ညးလ္ၚတ်သ္ၚဳဂၠိပ်ပရေၚ်ဍုၚ်ကွာန်ဂှ် သွက်မေန်အံၚ်လှာၚ်ဂှ် နကဵုဍုၚ်ကြုက် ကဵုဒၟံၚ်ဇြဟတ်ဂရိုဟ် ကုက္ဍိုပ်သ္ကိုပ်ကောန်ဍုၚ်အရၚ်ဂမၠိုၚ်တုဲ နကဵု MNDAA လုကဴဟွံဆုတ်ကလေၚ်အာ နူကဵုလာယှိုဝ်ဂှ်မ္ဂး ရပ်ထိၚ်အာ ဖုၚ်တာယှေန်ဂှ်ဏောၚ်ဂှ် သ္ၚဳဂၠိပ်လဝ်ရ။

“ဗွဲအဓိက ညံၚ်ဂွံကလေၚ်ဆုတ်အာ နူကဵုလာယှိုဝ်ဂှ် ဍေံတံ (ကြုက်) အာတ်မိက်ကဵုဇြဟတ်ဂရိုဟ် ကုဖုၚ်တာယှေန်ဏောၚ်ဂှ် စၟဳကေတ်ရ။ ညအ်ဂှ် နကဵုဍုၚ်ကြုက် ၜိုတ်ညးသ္ပမာန် သွက်မေန်အံၚ်လှာၚ်ဂှ် ပ္ဍဲအရာကဵုဇြဟတ်ဂရိုဟ် ကုက္ဍိုပ်သ္ကိုပ်ကောန်ဍုၚ်အရၚ် ဂကောံဇြဟတ်ကောန်ဍုၚ်အရၚ်တံဂှ် ဒှ်မွဲတၚ်ရ။ လၟုဟ်ဂှ်လေဝ် ကၠောန်လဝ် ထပိုတ် မသုန်ထပိုတ်ရ။ MNDAA ဟွံဆုတ်အာ နူကဵုလာယှိုဝ်မ္ဂး ရပ်စွံအာညး ပ္ဍဲကဵုသ္ၚိဏောၚ်ဂှ် အဲချိၚ်ခယျကေတ်ရ။ ဣဏံဝွံ ဟီုမံၚ်ကောလဟလကီုလေဝ် ဍာံဍာံလေဝ် ဒှ်မာန်ဏောၚ်ဂှ် စှ်ေစိုတ်ရ” သာ်ဝွံ သ္ဂးရ။

ပ္ဍဲဂိတုအဝ်ဂါတ်မံက်တေံ ဌာန်ဂအုပ်ပၞာန်ရးဨသာန် မ္ဒးစှ်ေအာတုဲဂှ် အလဵုအသဳကြုက်ဝွံ ကဵုကၠုၚ်ဇြဟတ်ဂရိုဟ် ကု MNDAA မပါလုပ် ကုဂကောံရပ်လွဟ်ကောန်ဍုၚ်အရၚ်သ္ကုတ်သၟဝ်ကျာ မပၠန်ဂတးဒၟံၚ် ကံၚ်ဇြဳပၞာန်တံ သ္ဂောံဒေါအ်ဒေၚ်ပေါဲဗ္တိုက်ရ။

အလဵုအသဳကြုက် ကၟာတ်လဒဵုလဝ် MNDAA နကဵုထပိုတ်မသုန်ထပိုတ် မပ္တံကဵုအခေါၚ်တတ်ကၠောံအာကၠုၚ်၊ ဍာ်၊ ပၟတ်၊ အေန်တာနိတ်၊ ကၠေၚ်စက်၊ ဇွောံမစၞစ၊ ဂဥုဲဇဗတံဂှ်တုဲ လုကဴဟွံဆုတ်ကလေၚ်ကဵု နူဍုၚ်လာယှိုဝ်ဂှ်မ္ဂး ရုပ်သီကဵုအာဟွံသေၚ်ပုဟ်ဂှ် ဟီုလဝ် နူကဵုက္ဍိုပ်သ္ကိုပ် “ဝ” မွဲကဆံၚ်ရ။

ဟိုတ်နူပရေၚ်ကြုက် ကၟာတ်လဒဵုကေတ်အရေဝ်တံဂှ်တုဲ နကဵု MNDAA ပ္ဍဲပရေၚ်ပၞာန်ပရေၚ်ဍုၚ်ကွာန်တံဂှ် ပံၚ်တောဲအာကဵု NUG ဟွံသေၚ်ရတုဲ ဒေါအ်ပန်ပှော်တုဲ ဆဵုဂဗသဳကၠဳအာ နကဵုဂၠံၚ်တရဴပရေၚ်ဍုၚ်ကွာန်ရဏောၚ်ဂှ် ပ္ဍဲဂိတုသေပ်တေမ်ဗာတေံ လလောၚ်တြးလဝ် တၚ်ဒတူလိုၚ်ပရေၚ်ဍုၚ်ကွာန်ရ။

ကြဴနူဂှ်တုဲ MNDAA ချဳဒရာၚ်ထ္ပက်ကၠုၚ်ပၞာန် ကုကံၚ်ဇြဳပၞာန်ဂှ် ဟွံဂွံဆဵုကေတ်ရကီုလေဝ် နူကဵုဍုၚ်လာယှိုဝ် မထိၚ်ဂွံလဝ်ဂှ် ကလေၚ်ဆုတ်ကလေၚ်အာလဝ်ဂှ် ဟွံမွဲတုဲ ဒှ်သဘဴကရေပ်ဓရတ် က္ဍိုပ်သ္ကိုပ်ဂကောံဂှ်ဏောၚ်ဂှ် သ္ၚဳဂၠိပ်ဒၟံၚ်တံလေဝ် နွံဒၟံၚ်ရ။

မွဲလ္ပာ်ဂှ်ပၠန် သေံသ္ကုတ်သၟဝ်ကျာဂှ်ဝွံ ပါဲနူကဵုဒှ်ပယျဵုကြုက်−ဗၟာဂှ် ဟိုတ်နူဒှ်ဒေသ လ္ပာ်အလဵုအသဳကြုက် က္ဍစိုပ်ဒၟံၚ်မွဲဂှ်ရ ပွမကဵုဇြဟတ်ဂရိုဟ် လ္ပာ်ပရေၚ်ပၞာန်တံ ဆက်သၠုၚ်တိုန်ကၠုၚ်မာန်ရောၚ် အရာမပတှ်ေကေတ်သာ်ဏံတံလေဝ် နွံဒၟံၚ်ပၠန်ရ။

ဥူတာန်သဵုနာၚ်ဂှ်တှ်ေ အပ္ဍဲသေံသ္ကုတ်သၟဝ်ကျာဂှ် လ္ပာ်ကြုက် ဗီုလဵုကၠောန်ကၠုၚ်ကၠောန်ကၠုၚ် အပ္ဍဲကာလမကၠုၚ်စိုပ်ဏံ ပ္ဍဲဒေသအညာ ပေါဲဗ္တိုက်ပရေၚ်ပၞာန်တံ သာသ္ကာတ်မြဟ်ကၠုၚ်မာန်ရောၚ် ဟီုလဝ် လညာတ်ညးရ။

“ပ္ဍဲရးသေံသ္ကုတ်သၟဝ်ကျာဂှ် လ္ပာ်ကြုက် ဗီုလဵုကၠောန်န် ပၠန်ဂတးက္ညၚ်ဂှ်တှ်ေ တၚ်နၚ်မဗဒှ်ကဵု ညံၚ်ဂွံလဇုဲလဇ မွဲမွဲသာ် နွံကီုလေဝ် ဒှ်ဒၟံၚ်အကာဲအရာ ဂွံဆက်လုပ်အာပေါဲဗ္တိုက်တံဂှ်ရဏောၚ်။ ဗွဲတၟေၚ် အပ္ဍဲကာလကၠုၚ်စိုပ်ဏံ ဒေသအညာ ပေါဲဗ္တိုက်ပရေၚ်ပၞာန် သ္ကာတ်မြဟ်ကၠုၚ်ဏောၚ်ဂှ် စၟဳကေတ်ရ” သာ်ဝွံ သ္ဂးရ။

ပရေၚ်ပၞာန် ၁၀၂၇ ဂကောံမဟာမိတ်ကောဒေံပိဂကောံ MNDAA သ္ကိုပ်သ္ကလဝ်ဂှ်ဝွံ ကံၚ်ဇြဳပၞာန် ဒးဗလးလဝ်ဍုၚ် ပ္ဍဲကဵုရးသေံသ္ကုတ်သၟဝ်ကျာဂှ် ၂၀ ဍုၚ်ပြၚ်တုဲ သီုသၠုၚ်ပ္တိုန်ကဵုလဝ် အသိၚ်အလိုန်ပေါဲဗ္တိုက်ထပိုတ်ရိုဟ်ကၞက် သၞောတ်တၠအဝဵုပၞာန်ဂှ်ရ။

အခိၚ်လၟုဟ်ဂှ်လေဝ် ဂကောံကောဒေံ TNLA ကဵု ဂကောံပံၚ်ကောံဂမၠိုၚ် ဗိုၚ်ကၟာတ်လဝ် ဘာတန်ဗ္တောန်ဒပ်ပၞာန် (တကက ၁၃) ဘာကံၚ်ဇြဳပၞာန် ပ္ဍဲကဵုကွာန်တွေန်ၚါ၊ ပွိုၚ်ဍုၚ် (သပိတ်ကျၚ်း) ၊ ရးမာန္တလေဝ်ဂှ်တုဲ ပေါဲဗ္တိုက်ဒိဓဗတ်ဂမၠိုၚ် က္တဵုဒှ်ဒၟံၚ်ရ။

မွဲလ္ပာ်ဂှ်ပၠန် ဒပ်ပၞာန်ဗၠးၜးညးဍုၚ်ကွာန်ဗၟာ BPLA မလုပ်လဝ်ပေါဲဗ္တိုက် ကရောံ MNDAA ဂှ်လေဝ် ဆုဲပြံၚ်ဖျေံဒပ် ပ္ဍဲဒေသအညာ ကၟိန်ဍုၚ်သ္ကုတ်လဒေါဝ်ဂှ်တုဲ ထ္မံက်ကၠုၚ်ပရေၚ်ပၞာန်တံမာန်ရဏောၚ်ဂှ် က္ဍိုပ်သ္ကိုပ်ဂကောံဂှ် ဟီုပ္တိတ်လဝ်ရ။

ပရိုၚ်−သြၚ်လောန်တိုၚ်(မ်)

ဗီု−MNDAA