တၞၚ်သဳ၊ နဝ်ဝေမ်ဗာ ၂၁
ပ္ဍဲရးတၞၚ်သဳ အပ္ဍဲဂိတုအံက်တဝ်ဗာတုဲကၠုၚ်တေံဂှ် ပါဲနူကဵုဒပ်ကံၚ်ဇြဳပၞာန်ကဵု ဂကောံသၟဝ်တဲဂမၠိုၚ်ဂှ် ဟိုတ်နူပရေၚ်ဂကောံဇြဟတ်ပၠန်ဂတးရပ်လွဟ်တံ ရပ်ဒက်ဂစိုတ်လဝ်တုဲ ညးဍုၚ်ကွာန်ကောန်အရာပ် ၁၉ တၠ ချိုတ်အာလဝ်ရောၚ် ဂကောံသုတေသနအပ္ဍဲဒေသ FE5 Thanintharyi လလောၚ်ပ္တိတ်လဝ် ပ္ဍဲဂိတုနဝ်ဝေမ်ဗာ ၁၉ တေံရ။
ညးဍုၚ်ကွာန်ကောန်အရာပ် မ္ဒးချိုတ်အာဂမၠိုၚ်ဝွံ အခိၚ်ဒပ်ကံၚ်ဇြဳပၞာန် ထ္ပက်ကရောၚ်ပၞာန်ဂှ် ဒးဒုၚ်ပန်ဂစိုတ်၊ ဒးဒုၚ်ရပ်ဒက်ဂစိုတ်လဝ်ကီု၊ ဟိုတ်နူလွဟ်ဇၞော် ကေုာံ ဟိုတ်နူထောံမခတိုဟ် နကဵုဒရုၚ် ဗ္တိုက်ကၠုၚ်တံဂှ်တုဲ ဒးချိုတ်အာလဝ်ရ။
အပ္ဍဲဂိတုအံက်တဝ်ဗာတေံ ဟိုတ်နူတၠတဲ ဒပ်ကံၚ်ဇြဳပၞာန်ကဵု ဂကောံပၞာန်ညးဍုၚ်ကွာန်သၟဝ်တဲဂမၠိုၚ်ဂှ်တုဲ ကောန်အရာပ် ၁၂ တၠ ပါလုပ်သီုကဵု ကောန်ၚာ်သၟတ်အာယုက် ၆ သၞာံကဵု ၇ သၞာံ ၜါတၠ ဒးချိုတ်အာလဝ်ဂှ် သ္ဂးရ။
အတိုၚ်လိက်ဒုၚ်စဳရေၚ်ဂှ်မ္ဂး ဒပ်ကံၚ်ဇြဳပၞာန် ထ္ပက်ကရောၚ်ပၞာန်လုပ်စိုပ်ကၠုၚ် ပ္ဍဲပွိုၚ်ဍုၚ်လံၚ်လုၚ်၊ ပွိုၚ်ဍုၚ်ပဠဝ် ကေုာံ ပွိုၚ်ဍုၚ်တယိတ်ချံၚ်တံဂှ်ဝွံ ရပ်ဒက်ဂစိုတ်လဝ် ကောန်အရာပ် ၈ တၠတုဲ ယဝ်ရဂစိုတ်တုဲမ္ဂး ကၠောန်ကၠုၚ်သီုကဵုကလေံကၠုၚ်ဇွတံရ။
ဟိုတ်နူပရေၚ်ဒပ်စဵုဒၞါညးဍုၚ်ကွာန်တံ ၚးတးပသောၚ်ရဲကဵုပရိုၚ်တံဂှ်တုဲ ပ္ဍဲကဵုပွိုၚ်ဍုၚ်ကအ်သံၚ် နူကဵုကွာန် ၁၉ မိုၚ်ဂှ် ပျူသဝ်ထဳ ဥူနံၚ်နဳကဵု ဥူဘဥူတံ ချိုတ်အာလဝ်တုဲ ဟိုတ်နူကဵုဒပ်ရပ်လွဟ်ကောန်ဍုၚ်အရၚ် ဒပ်ကဝ်တူလေဝ် KTLA တံ ပြိုက်ဂစိုတ်ကၠုၚ်ဂှ်တုဲ ကောန်အရာပ် ၃ တၠ ချိုတ်အာလဝ်ရောၚ် သ္ဂးရ။
မွဲလ္ပာ်ဂှ်ပၠန်လေဝ် ဟိုတ်နူဂကောံရပ်လွဟ်ဟွံတီယၟုမွဲဂကောံ ရပ်ဒက်ဂစိုတ်ကၠုၚ်တံဂှ်တုဲ နူကဵုပွိုၚ်ဍုၚ်ကျောန်သု ကွာန်ကျံက်ပုက်ဂှ် သ္ကိုပ်အုပ်ဓုပ်ကွာန်မွဲတၠ၊ နူကဵုပွိုၚ်ဍုၚ်(ဘုတ်ပြင်း) ဂှ် ကောန်ကွာန်ယှိုဲဂါညဵုမွဲတၠ ဒးချိုတ်အာလဝ်ရ။
အပ္ဍဲဂိတုအံက်တဝ်ဗာဂှ် နူကဵုဒပ်ကံၚ်ဇြဳပၞာန်တံ ထ္ၜးဟိုတ်နာနာသာ်တုဲ ရပ်ဒက်ကၠုၚ်လဝ် ညးဍုၚ်ကွာန်ကောန်အရာပ်ဂှ် ဟွံအောန်နူကဵု ၂၀၈ တၠ နွံတုဲ ပ္ဍဲကဵုဏံဂှ် ကလေၚ်ဗလးကဵုလဝ် ၁၄၇ တၠရဂှ် ထ္မံက်ထ္ၜးလဝ် ပ္ဍဲလိက်ဒုၚ်စဳရေၚ်ဂှ်ရ။
အပ္ဍဲဂိတုသေပ်တေမ်ဗာ တုဲကၠုၚ်တေံဂှ်လေဝ် ပ္ဍဲရးတၞၚ်သဳဂှ် ဟိုတ်နူဒပ်ကံၚ်ဇြဳပၞာန်ကဵု ဂကောံသၟဝ်တဲဂမၠိုၚ် ရပ်ဒက်ဂစိုတ်ဂယိုၚ်ကၠုၚ်ဂှ်တုဲ ညးဍုၚ်ကွာန်ကောန်အရာပ် ၁၇ တၠ ချိုတ်အာလဝ်ရောၚ် ဂွံတီကေတ်ရ။
ပရိုၚ်−သြၚ်လောန်တိုၚ်(မ်)
ဗီု−CJ