နေဗျဳဒဝ်၊ နဝ်ဝေမ်ဗာ ၂၁
ညံၚ်ပေါဲရုဲမာဲ မၞုံကဵုပရေၚ်ကၠးမှးမွဲ ဂွံဒှ်တုဲ စပ်ကဵုပရေၚ်ကော်ဘိက်အာ ဂကောံညးစၞးခါတ်အကာဲ နူကဵုဍုၚ်သ္အာၚ်တံဂှ် ဍုၚ်ဇိုၚ်ဝုတ်ဒိုဟ်ဂမၠိုၚ် ထံက်ဂလာန်ဂှ် က္ဍိုပ်သ္ကိုပ်ပၞာန် သ္ကိုပ်ပၞာန်ဇၞော် မေန်အံၚ်လှာၚ် ဟီုရ။
ပ္ဍဲကဵုလၟေၚ်တရဴညးအာဍုၚ်ကြုက်ဂှ် အရာမသဳကၠဳလဝ် ကုသ္ကိုပ်ဝန်ဇၞော် ဍုၚ်ကြုက်၊ ဍုၚ်သေံ၊ ဍုၚ်ကာမ္ဗောဒဳယျာ ကေုာံ ဍုၚ်လာအိုဝ်တံ ဗွဲတၞဟ်ခြာဂှ် က္ဍိုပ်သ္ကိုပ်ပၞာန် ဟီုလဝ် ပ္ဍဲကဵုကောံဓရီုကံၚ်ဇြဳပၞာန် မကၠောန်ဗဒှ်လဝ် ပ္ဍဲဂိတုနဝ်ဝေမ်ဗာ ၁၉ တေံရ။
နကဵုညးတံ စပ်ကဵုအကာဲအရာသ္ဂောံကော်ဘိက်အာ ညးလ္ၚတ်နူကဵုဍုၚ်သ္အာၚ်တံ ပ္ဍဲကဵုပေါဲရုဲမာဲဂှ်ကဵု ပရေၚ်ပလေဝ်ပလေတ်ဒၟံၚ် ညံၚ်ဂွံကၠောန်ဗဒှ်ပေါဲရုဲမာဲမာန်ဂှ်တုဲ ဟီုလဝ်ကဵု သ္ကိုပ်ဝန်ဇၞော်ပန်ဍုၚ်ဂှ်တုဲ ဍုၚ်ညးကဵုညး ကလေၚ်ဟီုကၠုၚ်လဝ် ပရေၚ်သဳကၠဳထံက်ဂလာန်တံဂှ်ရောၚ် သ္ဂးရ။
ညးခါတ်အကာဲပရေၚ်ဍုၚ်ကွာန်တံဂှ်တှ်ေ နကဵုကံၚ်ဇြဳပၞာန် ဂွံရုန်တိတ် နူကဵုအကြေပ်အဂြတ်ပရေၚ်ပၞာန်ဂှ်တုဲ နဒဒှ်ပၞော်တိတ်ပရေၚ်ဍုၚ်ကွာန်ဂှ် သွက်ဂွံကၠောန်ဗဒှ်ပေါဲရုဲမာဲမာန် ပ္တိတ်ဒၟံၚ်ဇြဟတ် သ္ဂောံဂွံပရေၚ်ထံက်ဂလာန် နူကဵုဗွိုၚ်ဍုၚ်သ္အာၚ်တံရောၚ် သ္ၚဳဂၠိပ်လဝ်ရ။
အခိၚ်ဆဵုဂဗလဝ်ကဵု သ္ကိုပ်ဝန်ဇၞော်ဍုၚ်ကြုက်ဂှ် စပ်ကဵုလၟေၚ်ကမၠောန်ကံၚ်ဇြဳပၞာန် မထ္မံက်ဒၟံၚ်ရုပ်ရဴ အဓာန်ဂတ ၅ သာ်ဂှ်တုဲ နကဵုဍုၚ်ကြုက် ထံက်ဂလာန်ကဵုဇြဟတ် ကတိုၚ်ၚ်ကၟဟ်ဟ်ဂှ် က္ဍိုပ်သ္ကိုပ်ပၞာန် ဟီုရ။
သ္အာၚ်နူဂှ်ပၠန် ထံက်ဂလာန် ကုလၟေၚ်ကမၠောန်ပရေၚ်ပြံၚ်လှာဲလွေဟ် ကေုာံ ပရေၚ်ညိၚ်ဝတ်ဍုၚ်ဗၟာဂှ်တုဲ ပရေၚ်ကံက်စရၚ်လၟိဟ်မၞိဟ် ကေုာံ ပေါဲရုဲမာဲတံဂှ်လေဝ် ဒဒှ်ရကဵုအာအရီုဗၚ်ဏောၚ်ဂှ် သ္ကိုပ်ဝန်ဇၞော်ကြုက် ဟီုလဝ်ရ။
က္ဍိုပ်သ္ကိုပ်ပၞာန်ဂှ်တှ်ေ လ္တူအဝဵုအပိုၚ်အခြာဍုၚ်ဗၟာကဵု အရာညးတံ မရေၚ်တၠုၚ်လဝ်တံဂှ် ဒှ်တၚ်ဒတူလိုၚ် ပိုတ်တ်သ္ကုတ်တ်ဂှ် နကဵုဍုၚ်ကြုက် ဟီုပ္တိတ်ဏာလဝ် ပ္ဍဲကောံဓရီုရ။
ပရေၚ်ကံက်စရၚ်လၟိဟ်မၞိဟ် မပလေဝ်ပလေတ်ဒၟံၚ် သွက်ပေါဲရုဲမာဲဂှ်ဝွံ ကံက်ဂွံလဝ် ၆၃ တၟံကၠံပြၚ်တုဲ သၞာံဏံအိုတ် ကံက်အာဒတုဲမာန်ဏောၚ်ဂှ် ချိၚ်ခယျလဝ်ရ။
ပရေၚ်ဂီုကၠီုဂှ်တှ်ေ နကဵုညးတံ ပ္တိတ်ဇြဟတ်ရေၚ်တၠုၚ်အာ ဗွဲတၟေၚ်တုဲ ဟိုတ်နူပရေၚ်ဂီုကၠီုတုဲ ကၠောန်သ္ပအာပေါဲရုဲမာဲ သ္ကုတ်ဍေံကဵုဍေံ ဒှ်မာန်ဂှ် သ္ဂးရ။
ပေါဲရုဲမာဲ မကၠောန်ဗဒှ်လဝ် ပ္ဍဲဍုၚ်ဗၟာ မဒုၚ်သ္ဇိုၚ်လဝ်ကဵုသၞောဝ်သ္ဇိုၚ် ၂၀၀၈ တံဂှ်ဝွံ နကဵုဗ္ၜတ်ဍုၚ်မွဲ ကၠောန်ဗဒှ်ကၠုၚ်လဝ် မွဲအခိၚ်ဓဝ်ကီုလေဝ် ပ္ဍဲလက်ထက်ကံၚ်ဇြဳပၞာန်ဏံဂှ်တှ်ေ တန်တဴကဵု လ္တူအကာဲအရာပရေၚ်ဂီုကၠီုတုဲ တိဍာ်ကၠောန်ဗဒှ်မာန်တံဂှ် ကၠောန်အာကၠာဏောၚ် ဒှ်ဒၟံၚ်အကာဲအရာဏံရ။
အခိၚ်လၟုဟ်ဂှ်လေဝ် ပ္ဍဲကဵုရခေၚ်ကီု ပ္ဍဲကဵုကချေၚ် ကေုာံ ဍုၚ်ဗမာသ္ကုတ်လဒေါဝ်တံဂှ် အကြာကံၚ်ဇြဳပၞာန်ကဵု ဂကောံရပ်လွဟ်ကောန်ဍုၚ်အရၚ်အပ္ဍဲဒေသတံ၊ ဂကောံပံၚ်ကောံ PDF တံဂှ် ပေါဲဗ္တိုက်တံ ဆက်က္တဵုဒှ်ဒၟံၚ်ရ။
အတိုၚ်တၚ်နၚ် BNI-Myanmar Peace Monitor တံဂှ်မ္ဂး ဍုၚ်ဂကောံဇြဟတ်ပၠန်ဂတးတံ ထိၚ်ဂွံလဝ်ဂှ် နွံကၠုၚ် စဵုကဵု ၈၄ ဍုၚ်ယျတုဲ ရံၚ်အာကဆံၚ်အုပ်ဓုပ် ဍုၚ်တံဏံဂှ်မ္ဂး ကဆံၚ်ခရိုၚ်၊ ကဆံၚ်ပွိုၚ်ဍုၚ်၊ ကဆံၚ်ဍုၚ် ကေုာံ ကဆံၚ်ပွိုၚ်ဍုၚ်ပါ်တံ ပါလုပ်ရ။
စပ်ကဵုအကာဲအရာတံဏံတုဲ ပ္ဍဲကဵုလၟေၚ်ကမၠောန်ဒစးဒုၚ်ပေါဲရုဲမာဲတံကဵု အခိၚ်ကာလပေါဲရုဲမာဲတံဂှ် ညံၚ်ဂကောံ EAO ဒေါအ်ပန်ပှော်တံ သွက်ဂွံပံၚ်တောဲပါလုပ်ကဵု ပ္ဍဲပရေၚ်ဂီုကၠီုတံဂှ် က္ဍိုပ်သ္ကိုပ်ပၞာန် ကဵုကၠုၚ်ဒရိပ်အရေဝ် ပ္ဍဲကဵုဂလာန်တ္ၚဲကၠောံသၞာံ NCA သၞာံဏံဂှ်ရ။
ပ္ဍဲကဵုကောံဓရီုလၟုဟ်ဏံဂှ်လေဝ် ပ္ဍဲကဵုပေါဲရုဲမာဲကၠုၚ်စိုပ်ဏံ ရပ်စပ်အာ သၞောတ်စက်ကဵုမာဲအဳလက်ထရဝ်နေတ်တံဂှ်ဏောၚ်တုဲ နကဵုညးတံ သွက်ဂွံကၠောန်ဗဒှ်ပေါဲရုဲမာဲမာန် ၜိုတ်သၟဟ်အစောံ ပ္တိတ်ဇြဟတ်ရေၚ်တၠုၚ်ဒၟံၚ်ဏောၚ်ဂှ် က္ဍိုပ်သ္ကိုပ်ပၞာန် ဟီုလဝ်ရ။
ဂကောံဇြဟတ်ထပိုတ်ရိုဟ်ကၞက် သၞောတ်တၠအဝဵုပၞာန်ဂှ်တှ်ေ ဟိုတ်နူပရေၚ်ပၞာန်သီအဝဵုတုဲ အကြာအကြေပ်အဂြပ်နာနာ မက္တဵုဒှ်ဒၟံၚ် အပ္ဍဲဍုၚ်ဏံဂှ် ပေါဲရုဲမာဲကံၚ်ဇြဳပၞာန် မကၠောန်ဗဒှ်အာတံဂှ် ဗ္တိုက်သရိုဟ်အာဏောၚ်ဂှ် ဟီုပ္တိတ်လဝ်ရ။
ပရိုၚ်−သြၚ်လောန်တိုၚ်(မ်)
ဗီု−Social Media