မတ်မလီု၊ နဝ်ဝေမ်ဗာ ၂၁
ပ္ဍဲတွဵုရးဍုၚ်မန် အပ္ဍဲဂိတုဏံ ကံၚ်ဇြဳပၞာန် ကလေၚ်ဂၠိုက်ဂၠါဲစၟဳတ်ဒၟံၚ် ညးက္ဍိုက်ပ် ဟွံဒုၚ်တဲ လ္တူပရေၚ်ပၞာန်သီအဝဵုဒပ်ပၞာန်တုဲ မကေၚ်ထ္ၜးလဝ်ဆန္ဒတံ လ္တူဂၠံၚ်လ္တူဍာန်တံဂှ် ရပ်ဒက်ဒၟံၚ်တံ နွံဒၟံၚ်ရောၚ် ဂွံတီကေတ် ဇရေၚ်ညးမစုက်လုက်ကဵု ကံၚ်ဇြဳပၞာန် ကေုာံ ညးဒေသတံရ။
အတိုၚ်သြၚ်လောန်တိုၚ်(မ်) ဂၠိုက်ဂၠါဲသၟာန်သၟုက်ဂှ်မ္ဂး ညးက္ဍိုက်ပ်ပေါဲထ္ၜးဆန္ဒကၠာတေံ သှ်ေဒၟံၚ်လ္တူဍုၚ်တံဂှ်ဝွံ ထံက်ပၚ်ကဵုဒၟံၚ်သြန် ဇရေၚ်ဂကောံဒပ်ပၠန်ဂတးတံကဵု ကဵုဒၟံၚ်ပရိုၚ်တံ နွံ၊ ဟွံမွဲ သွက်ဂွံရပ်ဒက်စၟဳတ်ဂှ် ကံၚ်ဇြဳပၞာန် စၞောန်ပ္ညုၚ်ကၠုၚ်ရ။
ပ္ဍဲအရာရပ်ဒက်သာ်ဏံဂှ် ညးမစုက်လုက်ကဵု ဂကောံပၠန်ဂတးတံ၊ ညးက္ဍိုက်ပ်ပေါဲထ္ၜးဆန္ဒတံ၊ ညးချဳဒရာၚ်ကတိုၚ်ကၟဟ်ပရေၚ်ဍုၚ်ကွာန်တံ ကေုာံ ဟိုတ်နူထ္ၜးဆန္ဒတုဲ ညးမကလေၚ်ဗၠးကၠုၚ် နူကဵုထံၚ်တံဂှ်လေဝ် စွံကၠုၚ်ပွန်ရ။
ပ္ဍဲကဵုဏံ တုဲကၠုၚ်ပ္ဍဲဂိတုနဝ်ဝေမ်ဗာ ၁၂ တေံ ဒပ်ကံၚ်ဇြဳပၞာန် ရပ်ဒက်စၟဳတ်ဒၟံၚ် ညးချဳဒရာၚ်ကတိုၚ်ကၟဟ် ဒံက်တာအံၚ်ဖျဵု ကေုာံ ဥူအံၚ်ခိုၚ် သၟာပရေၚ်ဍုၚ်ကွာန်တြေံ တၞောဝ် ၈၈ လ္တူဍုၚ်မတ်မလီုတံ မက္ဍိုက်ပ်လဝ် ပေါဲထ္ၜးဆန္ဒကၠာတေံဂှ်တုဲ လၟေၚ်ဒဒှ်ဒးဒုၚ်ရပ် မၞိဟ်ဟွံတီညာတ်တံဂှ်လေဝ် နွံဒၟံၚ် ဗွဲမဂၠိုၚ်ဂၠေၚ်ရ။
ညးဒေသတွဵုရးဍုၚ်မန် ဟွံမိက်ထ္မံက်ယၟုမွဲတၠဂှ်တှ်ေ ပ္ဍဲကဵုလၟေၚ်ဒဒှ်ညးက္ဍိုက်လဝ်က္ဍိုပ်ပေါဲထ္ၜးဆန္ဒကၠာတေံ လ္ၚဵုတံ ဒးဒုၚ်ရပ်ဂှ် မၞိဟ်ကဵုလှုဲမာန်တံဂှ် ကလေၚ်ဗလးကဵုတုဲ ညးသြန်ဟွံမာန်တံဂှ်တှ်ေ ပံက်ဂဗုတ်ကေတ်ဒၟံၚ်အရေဝ် နကဵုၝောံပိုဒ်ပရေၚ်ဍုၚ်ကွာန်တံ နွံဒၟံၚ်ရောၚ် ဟီုရ။
“ ဒးဟီုသောၚ်ၚ်မ္ဂး အရာမပ္ညဳကဵုလှုဲဂွံတံဂှ်တှ်ေ ကေတ်လှုဲဂၠိုၚ်ၚ်တုဲ ကလေၚ်ဗလးကဵုလဝ်တံ နွံ။ ညအ်ဂှ် ဒုၚ်သ္ဇိုၚ်ကဵုအမိၚ်မွဲတုဲ ကေတ်အခေါၚ်ခိုဟ်တုဲ ရပ်တုဲကၠောန်စဒၟံၚ်ရ။ ကၠောန်စဒၟံၚ်ဟီုဂှ် ရဲကဵုလှုဲဟွံမာန်တံဂှ်တှ်ေ တပ်စုတ်ၝောံပိုဒ်တုဲ စောဲလဝ်ဂဗုတ်။ မၞိဟ်လှုဲဟွံမာန်တံဂှ်လေဝ် ဍေံတံပကိတ်ကဵုတုဲ ကလေၚ်ဗလးကဵုလဝ်ရ။ ဇၟာပ်ထ္ၜးဆန္ဒ ရပ်ဏောၚ်ဟီုမ္ဂး ဒးရပ် အတိုၚ်ဍုၚ်မွဲရဏောၚ်။ ကၠာတေံဂှ် ထ္ၜးလဝ်ဆန္ဒညးသ္ကအ်ဖအိုတ်ရ။ လၟုဟ် ရဲကဵုလှုဲဟွံမာန်တံဂှ်တှ်ေ တပ်စုတ်လဝ်ၝောံပိုဒ်ပရေၚ်ဍုၚ်ကွာန်တံရ” သာ်ဝွံ သ္ဂးရ။
ကံၚ်ဇြဳပၞာန် ကလေၚ်ဂၠိုက်ဂၠါဲစၟဳတ်တုဲ ရပ်ဒက်ဒၟံၚ် ညးကေၚ်ထ္ၜးလဝ်ဆန္ဒကၠာတေံ သာ်ဏံဂှ်ရ ညးဒေသဂမၠိုၚ် ဒှ်ဒၟံၚ်ဓဝိၚ်အိုတ်တုဲ ကံၚ်ဇြဳပၞာန် ကဵုကလေၚ်ရပ်ဒက်စၟဳတ်ကၠုၚ် ညးကေၚ်ထ္ၜးလဝ်ဆန္ဒတံဂှ်ဝွံ ဒှ်ကၠုၚ်ပၞော်ဂၠါဲလှုဲ သွက်ကောန်ရဲသၟဝ်တဲညးတံဏောၚ်ဂှ် ညး ပါ်ပါဲလဝ်ရ။
ကိုဝ်အေမေန်ထောန် ညးဒုၚ်တာလျိုၚ် PDF ခရိုၚ်သဓီုဂှ်တှ်ေ လ္ပာ်ကံၚ်ဇြဳပၞာန် ဗက်ရပ်ဒက်ဒၟံၚ် ညးမပါလုပ်လဝ် ပေါဲထ္ၜးဆန္ဒတံဂှ်တုဲ နကဵုညးဍုၚ်ကွာန်ဂမၠိုၚ် သွက်ဂွံပါဲဒလေတ် ဗွဲမဍိုဟ်ကေက်အိုတ်ဂှ် ဖ္တိုက်ဖ္အောဝ်လဝ်ရ။
“ၜိုတ်ပိုယ်တံတီကေတ်ဂှ်တှ်ေ သွက်ဂွံကလေၚ်ရပ် ရဲကေၚ်ထ္ၜးလဝ်ဆန္ဒတံဂှ် စၞောန်ပၟိၚ်စှ်ေကၠုၚ်ရ။ ကလေၚ်ရပ်တုဲ သွက်ဂွံထိၚ်လဝ်ဂှ် နွံပၟိက်တှ်ေ သွက်ဂွံပံက်ဂဗုတ်ရေၚ်တၠုၚ်ဂှ် စၞောန်ပ္ညုၚ်လဝ်ရောၚ် ဂွံတီကေတ်ရ။ ညးမရပ်ဒက်ဒၟံၚ်တံဏံဂှ်တှ်ေ အတိုၚ်တီလဝ်ဂှ်ရ ၝဍိက်ပၞာန်တံရဏောၚ်။ နကဵုညးဍုၚ်ကွာန်ပိုယ်တံ ဂွံပါဲဒလေတ် ဍိုဟ်ဟ်ကေက်က်အိုတ်ဂှ် ဇၞော်ကဵုပၟိက်ရ” သာ်ဝွံ သ္ဂးရ။
အပ္ဍဲဒေသဂှ်တှ်ေ ညးဍုၚ်ကွာန်ဂၠိုၚ်ကဵုလ္ၚီ ပါလုပ်သီုကဵုညးယိုက်ဝန် ဌာနမဆေၚ်စပ်ဂမၠိုၚ်တံ ဒဒှ်ရဟွံဒုၚ်တဲ ပရေၚ်ပၞာန်သီအဝဵုဂှ် တိတ်ဂၠံၚ်ထ္ၜးလဝ်ဆန္ဒတံတုဲ ဒဵုကဵုတ္ၚဲဏံ ဆက်ပါလုပ်ဒၟံၚ် ပရေၚ်ချဳဒရာၚ်ဒစဵုဒစးအဝဵု နနဲၜတ်တ်ဂှ်ရ။
မွဲလ္ပာ်ဂှ်ပၠန် ကံၚ်ဇြဳပၞာန်သီအဝဵုဝွံ ပန်ဂစိုတ်ညးဍုၚ်ကွာန်တံကဵု ညးယိုက်ဝန် ထ္ၜးဒၟံၚ်ဆန္ဒ ဗွဲမၜိုဟ်လလမ်တံဂှ်ကီု၊ ဒးဒုၚ်ရပ်ဒက်ၜုၚ်တက်ကီု၊ တပ်စုတ်ၝောံပိုဒ်နာနာတုဲ ဖျေံဒၟံၚ်ဒဏ်ထံၚ်တံ ကၠောန်သ္ပလဝ်ရ။
အတိုၚ်လိက်ဒုၚ်စဳရေၚ် ဂကောံမၚ်မွဲရီုဗၚ်ကောန်ထံၚ်ပရေၚ်ဍုၚ်ကွာန် AAPP ဂှ်မ္ဂး အပ္ဍဲကာလသီအဝဵုပွိုၚ်ပိသၞာံပြၚ်ဏံ အလုံဍုၚ်မွဲ ညးဒးဒုၚ်ရပ်ဒက် ၂၇၀၀၀ ပြၚ် နွံဒၟံၚ်တုဲ ပ္ဍဲကဵုဏံ ၂၀၀၀၀ ပြၚ် ဆက်ဒးဒုၚ်ရပ်လဝ်ရ။
ပရိုၚ်−သြၚ်လောန်တိုၚ်(မ်)
ဗီု−TLT