မနဳလာ၊ နဝ်ဝေမ်ဗာ ၂၆
ဒုသမ္မတဖဳလေတ်ဖေန် သာရာဒူတာတေ ဂှ် ယဝ်ရညးဒးဒုၚ်ဂစိုတ်မ္ဂး ကၠတ်ဂစိုတ်အာ သမ္မတလၟုဟ် ဝှာဒဳနာန် မာကောသ် ဂျူနဳယာ ဂှ်ဏောၚ် ကြဴနူဟီုဂးလဝ်တုဲဂှ် အေဂျေန်ဇြဳပရေၚ်ဂီုကၠီု အပ္ဍဲဍုၚ်ဂမၠိုၚ်ဝွံ မ္ဒးသၠုၚ်ပ္တိုန်လဝ် အစဳဇန်ညံၚ်ဂွံဗၠးဘဲအန္တရာယ်တံဂှ်ရ။
ပ္ဍဲဍုၚ်ဖဳလေတ်ဖေန် အကြာဂြောဝ်ဂတာဇြဟတ်ဇၞော်ၜါ ပ္ဍဲကဵုပရေၚ်ဍုၚ်ကွာန်ဂှ် က္တဵုဒှ်ပဋိပက္ခ သာသၠဲလးကၠုၚ်တုဲ ဒုသမ္မတ သာရာ ဒူတာတဂှ်ေ ယဝ်ရညးဒးဒုၚ်ဂစိုတ်မ္ဂး သွက်ဂွံကၠတ်ဂစိုတ် မာကောသ်၊ သမ္ဘာညး ကေုာံ ဥက္ကဌကၠတ်ထဝ်သၟဝ် ဖဳလေတ်ဖေန်တံဂှ် သဳကၠဳလဝ်ကဵု သၟာဂစိုတ်မၞိဟ်တုဲ စၞောန်ပ္ညုၚ်လဝ်ရောၚ် ဟီုရ။
အခိၚ်ညးမအာစိုပ် ကၠတ်ထဝ်သၟဝ် ကေုာံဂအုပ်သၞာဲဒဴညး အခိၚ်ဗ္တံဂှ် ညးလလောၚ်ပရိုၚ်လပှ်ကျာမွဲတၠဂှ် ဒဒှ်ရဒုသမ္မတ သာရာဒူတာတေ စိုပ်ဒၟံၚ် ပ္ဍဲတိဍာ်သၞညးတုဲ ညံၚ်ဂွံဗၠးဘဲ သွက်ဂွံမံၚ်စံၚ် ကြဴနူဟီုဂးဖ္တိုက်ဖ္အောဝ်လဝ်တုဲဂှ် ညးဟီုကၠုၚ်လဝ် သာ်ဏံရ။
သွက်ဂွံစဵုဒၞါ ဂၠိုက်ဂၠါဲထ္မံက်ပ္တိတ်အာ အရာမဘပဠဒၟံၚ် သမ္မတ ကေုာံ ဂြောဂတာသမ္မတဂှ်တုဲ သၠုၚ်ပ္တိုန်လဝ် အစဳဇန်ပရေၚ်ဂီုကၠီုတံဂှ်ရောၚ် ဌာန်ဂအုပ်ပရေၚ်ဂီုကၠီု ဖဳလေတ်ဖေန် ဟီုလဝ်ရ။
ရုၚ်လလောၚ်ပရိုၚ်သမ္မတ ဖဳလေတ်ဖေန်ဂှ်တှ်ေ အရာမဘပဠစိုပ်ကၠုၚ် လ္တူသမ္မတ အိုဿီုဂှ် သ္ပလဝ်ဂရု ဗွဲမဇြိုဟ်နက်ရောၚ် ထ္မံက်ထ္ၜးလဝ် ပ္ဍဲတၚ်လလောၚ်တြးမွဲဂှ်ရ။
စပ်ကဵုတၚ်အာတ်မိက် သ္ဂောံဟီုဂးခၠေဝ်ပလန် လ္တူတၚ်လလောၚ်တြး ရုၚ်သမ္မတဂှ်တုဲ နူကဵုရုၚ် သာရာဒူတာတေ မုဟွံဂွံကလေၚ်ပလန်ကၠုၚ်ဏီရ။
ကၠာသမ္မတ မာကောသ်ဏံဂှ် ကောန်ဝုတ်သမ္မတတြေံ ဒူတာတေ မၞုံယၟု သာရာဒူတာတေဝွံ ပ္ဍဲဂိတုဂျောန်တေံ နုက်တိတ်နူဂကောံဝန်ဇၞော် မာကောသ်ဂှ်တုဲ ဟိုတ်နူဆက်ကေတ်လဝ် ကဆံၚ်ဒုသမ္မတဂှ်တုဲ ပ္ဍဲကဵုပရေၚ်ဒက်မိတ် အကြာဂကောံဇြဟတ်ဇၞော် ပရေၚ်ဍုၚ်ကွာန်ၜါဏံဂှ် ဂွံညာတ်ကၠုၚ် လက္ချန်ထကးပြးတံရ။
ကောန်ကၟိန်မာကောသ် ဥက္ကဌကၠတ်ထဝ်သၟဝ် ရိုဝ်မူရဴဒက်ဂှ်တှ်ေ သွက်သြန်ဗာတ်ဂျက် ရုၚ်သာရာဒူတာတေဂှ် ပ္ဍဲကဵုပိဂအုံဂှ် ဖအောန်ဖျေံလဝ် စဵုကဵုၜါဂအုံရ။
စပ်ကဵုမူဝါဒကာဍုၚ်သ္အာၚ်၊ ပရေၚ်ဗ္တိုက်သရိုဟ် ဂဥုဲၜူမာဲ သမ္မတတြေံ ရိုဝ်ဒရဳဂိုဝ် ဒူတာတဂှ်ေတုဲ အကြာဂြောဝ်ဂတာၜါဂှ် ဒှ်ဒၟံၚ်ပဋိပက္ခတၟာလအ်ရ။
ဍုၚ်ဖဳလေတ်ဖေန်ဝွံ ကဆံၚ်ဌာနန္တရ ဒုသမ္မတဂှ် အလဵုသမ္မတ ခါန်ကၞက်ပ္တိုန်ကေတ် ဗွဲတၞဟ်ခြာတုဲ တာလျိုၚ်ဗွဲမလုပ်သၞောဝ် မုမွဲမှ ဟွံမွဲ ဒှ်ဒၟံၚ်ရ။
ပ္ဍဲဍုၚ်ဖဳလေတ်ဖေန်ဂှ် ကၠာတေံလေဝ် ပရေၚ်ပကီုပရာပ်စပ်ကဵုပရေၚ်ဍုၚ်ကွာန် က္တဵုဒှ်လဝ်တုဲ အမာတ်ကၠတ်ထဝ်မွဲတၠ မဒစဵုဒစး ကုပရေၚ်အုပ်ဓုပ် မအံက်သမ္မတလၟုဟ် မာကောသ်ဂှ် ဒးဒုၚ်ကၠတ်ဂစိုတ်လဝ်ရ။
Ref:Reuters