မတ်မလီု၊ နဝ်ဝေမ်ဗာ ၂၈
တွဵုရးဍုၚ်မန် ပ္ဍဲဍုၚ်မတ်မလီုဂှ် ကောန်ဒပ်ဗၠာဲသၟိၚ်ကံၚ်ဇြဳပၞာန်တံဝွံ ထ္ၜးဟိုတ်နာနာသာ်တုဲ ဗဒှ်ပ္တိုန်အမှု ကရေပ်ဓရတ်ကၠုၚ်ဒၟံၚ်လှုဲ လ္တူညးဒေသတံ ကၠောန်ၜိုတ်ဒၟံၚ်ရောၚ် ညးဒေသတံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
အတိုၚ်ဂလာန် ညးမတီကေတ်ပရေၚ်ပရူတံဂှ်မ္ဂး ကောန်ဒပ်ဗၠာဲသၟိၚ်တံဝွံ နကဵုဟိုတ်ပရေၚ်ဂီုကၠီု ပ္ဍဲအရာစၟဳတ်ကွဳလိုန်ဓာတ်တံဂှ် ကၠဟ်စုတ်ဂဥုဲၜူမာဲ ပ္ဍဲကဵုဗုၚ်ကွဳလိုန်ဓာတ်တံဂှ်တုဲ ကရေပ်ဓရတ်ကၠုၚ်ဒၟံၚ်လှုဲတံ ကလိလောန်ဒၟံၚ်ရ။
ကဵုဟိုတ်ကဵုဂဥုဲၜူမာဲတုဲ မၞိဟ်ဒးဒုၚ်ရပ်မွဲတၠမ္ဂး အာတ်မိက်ဒၟံၚ် ဗွဲတွဵုမအောန် နူ ၁၅ ကိုဋ်ဒ္ကေဝ် စဵုကဵု ၂၀ ကိုဋ်ဒ္ကေဝ် နွံဒၟံၚ်ရ။
“အဓိကဂှ်တှ်ေ ဗၠာဲသၟိၚ်တံရဏောၚ်။ ဗၠာဲသၟိၚ်တံဂှ် ကၠောန်ဒၟံၚ်နဲကဲစုၚ်ဇဳရ။ ကဵုပံက်ဗုၚ်ကွဳလိုန်ဓာတ်၊ တုဲတှ်ေ ဆဵုမဂဥုဲတံဂှ်ဂးတုဲ ကၠဟ်စုတ်မဂဥုဲတံဂှ်။ အလဵုဍေံတံ ကၠဟ်စုတ်။ ရဲဒဳတက္ကသဳတံဂှ်တှ်ေ ဒးဟွံအောန်ပုဟ်။ ဒးကဵုဒၟံၚ် ၁၅ ကိုဋ် ၂၀ ကိုဋ်။ ကဵုလှုဲတှ်ေ ကလေၚ်ဗလးကဵု။ ဟွံကဵုတှ်ေ ပံက်ဂဗုတ်” သာ်ဝွံ ညးလ္တူဍုၚ်မွဲတၠ ဟီုရ။
ကောန်ဒပ်ဗၠာဲသၟိၚ်တံ ကၠောန်ကေတ်ဂဗုတ် အာတ်ကရေပ်ဓရတ်ကၠုၚ်လှုဲတံ သာ်ဏံဂှ်ရ ဂွံအာကၠုၚ် အပ္ဍဲဍုၚ်ဂှ်ရဂှ် ဒးဂွိၚ်ဒၟံၚ်တံ နွံကၠုၚ်တုဲ ပြဝဟွံဗဗွဲကဵုသၞောဝ်တံဂှ် အာတေၚ်စိုပ်ဟွံဂွံဂှ်ရ ဒှ်ဒၟံၚ်ဍာ်ဒးညိၚ်ဒၟံၚ်ရောၚ် သ္ဂးရ။
သ္အာၚ်နူဂှ်ပၠန် ညးဒးအာဓနက်ဍေံတံ ညးမဒးကဵုလှုဲတံဂှ်တှ်ေ စပ်ကဵုပရေၚ်ဒးကဵုသြန်လှုဲတံဂှ်တုဲ လ္ပကလေၚ်ဟီုမ္ၚးဏံဂှ်ကီု၊ ယဝ်ဟီုမ္ဂး ရပ်ဒက်ပံက်ဂဗုတ်တုဲ ဖျေံအာထံၚ်ဏောၚ်ဟီုတုဲ ဘပဠဒၟံၚ်တံ နွံဒၟံၚ်ရောၚ် ညးလ္တူဍုၚ်တံ ဟီုလဝ်ရ။
သၞာဲဒဴတြေံမွဲတၠ နူကဵုဂကောံဒပ်ဗၠာဲသၟိၚ်ဂှ်တှ်ေ ပရေၚ်ဗဒှ်ကေတ်ဂဗုတ် အာတ်လှုဲတံဂှ်ဝွံ ဒှ်ဒၟံၚ်ဂွန်စၟအ်ဗၠာဲသၟိၚ်တံ ကၠောန်စမံၚ်မွဲတုဲ အပ္ဍဲကာလသီအဝဵုဏံဂှ် သာပရေံကၠုၚ်ရောၚ် ဟီုရ။
မွဲလ္ပာ်ဂှ်ပၠန် ကောန်ဒပ်ဗၠာဲသၟိၚ်တံဝွံ နကဵုတၚ်ထ္ၜးဟိုတ်ပရေၚ်ဂီုကၠီုဂှ် ဂေတ်ဍုၚ်စၟဳတ်ကီု၊ ဂၠိုက်ဂၠါဲစၟဳတ်တံကီု ပ္ဍဲကဵုဒၞါဲကောန်ကလောန်ဆုဲပြံၚ်ဂၠိုၚ်တံဂှ် လုပ်စၟဳတ်စရၚ်ကၟုဲတုဲ အာတ်မိက်ဒၟံၚ်သြန်တံ နွံဒၟံၚ်ရ။
ပ္ဍဲဍုၚ်မတ်မလီုဂှ် ကောန်ဒပ်ဗၠာဲသၟိၚ်သၟဝ်တဲကံၚ်ဇြဳပၞာန်တံကဵု ဂကောံပၞာန်မၚ်ကွာန်တံ ကၟာတ်လဒဵုစၟဳတ်သၟာန်သၟုက်ဒၟံၚ် ရိုဟ်ဒဒှ်တ္ၚဲ နကဵုဟိုတ်ပရေၚ်ဂီုကၠီုတံဂှ် ကၠောန်ဒၟံၚ်ကီုလေဝ် ပရေၚ်ကၠတ်ဂၠံက်ပၠံၚ်ၜးတံဂှ်တှ်ေ ထ္မံက်ပ္တိတ်ကေတ်အရေဝ်ဟွံမာန် ဒှ်ဒၟံၚ်ရ။
ပရိုၚ်−သြၚ်လောန်တိုၚ်(မ်)
ဗီု−CJ