ဝါယှေန်တာန်၊ နဝ်ဝေမ်ဗာ ၂၈
တၚ်တုပ်စိုတ် အမေရိကာန်ကဵု ပြၚ်သေတ်တံ လုပ်ပ္ညဳပ္ညပ်လဝ်ကဵုအကြာဂှ် ဟိုတ်နူအေဿရေကဵု ဟေဿဗိုဝ်လာ မၞုံဍုၚ်လက်ဗနန်တံ သီုၜါလ္ပာ် ဒုၚ်လဝ်တဲဂှ်ရ တၚ်တုပ်စိုတ်ပရေၚ်ဒေါအ်ပန်ပှော်ဂှ်ဝွံ ပတွဵုနူဂိတုနဝ်ဝေမ်ဗာ ၂၇ အခိၚ်ဍုၚ်သေန်ကာပေါဝ် ၁၀ နာဍဳဂယးဂှ်တုဲ ဒဒှ်ရလမျီုစလုပ်ကၠုၚ်ဂှ် သမ္မတအမေရိကာန် ဂျဵုဗိုၚ်ဒေန် ဟီုလဝ်ရ။
ဟိုတ်နူပေါဲပၞာန်ဂါဇြာတုဲ ပရေၚ်ဗ္တိုက် မွဲဒမြိပ်ပယျဵု အေဿရေ−လက်ဗနန် မစကၠုၚ်လဝ် မၞိဟ်ဂၠိုၚ်ကဵုလ္ၚီ မဒးပြဟ်လလုဲအာလဝ်ဂှ် ညံၚ်ဂွံတုဲဒှ်အာ ရန်သာ်ဏံတုဲ လ္ဂောံကဵုတၚ်တုပ်စိုတ်ဏံမ္ဂး ဂၠံက်ပံက်အာယျ မဒှ်ရ။
ဂကောံဝန်ဇၞော်ပရေၚ်ဂီုကၠီု အေဿရေတံ ကြဴနူသ္ပဒတန်ကၠုၚ် တၚ်တုပ်စိုတ်ဏံ နကဵု ၁၀မာဲ−၁ မာဲတုဲ ခြာဟွံလအ်ဂှ် သမ္မတဗိုၚ်ဒေန် ဟီုကၠုၚ်လဝ် နူကဵုသ္ၚိဗု သာ်ဏံရ။
သ္ကိုပ်ဝန်ဇၞော်အေဿရေ နေတာန်ညာဟု၊ သ္ကိုပ်ဝန်ဇၞော်ယာယဳ ဍုၚ်လက်ဗနန် နာဂျေတ် မဳကာတဳတံ သဳကၠဳလဝ်တုဲ ပရေၚ်ဗ္တိုက်ဂမၠိုၚ် တုဲဒှ်အာ ပ္ဍဲအခိၚ်ဒေသ ၄ နာဍဳဂယးဂှ်ဏောၚ်ဂှ် သမ္မတဗိုၚ်ဒေန် သ္ဂးရ။
တၚ်တုပ်စိုတ်ဏံဂှ် ရန်တၟံ ညံၚ်ပရေၚ်ဗ္တိုက် ပရေၚ်ဂၠါဲသၞတံ ဂွံဒေါအ်ဒေၚ်အာ လၟိုန်ကာလဏောၚ်တုဲ ဟေဿဗိုဝ်လာ ကေုာံ ဂကောံပကီုပရာပ်တၞဟ်ဟ်တံ ညံၚ်ဟွံဂွံထပ်ဘပဠ ပရေၚ်ဂီုကၠီုအေဿရဂှ်ေ ဒှ်ပွချဳဒရာၚ်မွဲရောၚ် သမ္မတဗိုၚ်ဒေန် ဟီုရ။
ညံၚ်ဂကောံဟေဿဗိုဝ်လာ ဒက်ပ္တန်ဇြဟတ် ပ္ဍဲပယျဵုလက်ဗနန် ဟွံဂွံဂှ် အေဿရေ ကၠောန်အာဏောၚ်တုဲ ဒပ်ပၞာန်လက်ဗနန် ထိၚ်ဒက်အာ ဒေသပယျဵုဂှ်ဏောၚ် မဒှ်ရ။
ဒပ်အေဿရေ နွံဒၟံၚ်ပ္ဍဲလက်ဗနန်ဂှ်ဝွံ အပ္ဍဲပွိုၚ် ၆၀ တ္ၚဲဂှ် ဒးဆုတ်ကလေၚ်ဏောၚ် မဒှ်ရ။ နကဵုညးဍုၚ်ကွာန် သီုၜါဍုၚ်တံ ခြာဟွံလအ်ဏံ ဂွံကလေၚ်စဴဌာန်ဒၟံၚ်ညးတံ ဗွဲမဗၠးဘဲမာန်ရဏောၚ်ဂှ် ဂွံတီကေတ်ရ။
အဳရာန် ထံက်ပၚ်ကဵုဒၟံၚ် ဂကောံဟေဿဗိုဝ်လာ၊ ဂကောံဟာမာသ် ပ္ဍဲဂါဇြာ ကေုာံ ဂကောံဟူတဳ ဗ္တိုက်ဒၟံၚ်အေဿရေ နူကဵုယဳမေန်ဂှ်တှ်ေ စပ်ကဵုတၚ်တုပ်စိုတ်ဏံတုဲ မုမွဲမှ ဟီုကၠုၚ်လဝ် ဟွံမွဲဏီရ။
ပံၚ်တောဲရေၚ်တၠုၚ်အာကဵု အမေရိကာန် ကြပ်ပ်တုဲ ဟိုတ်နူပရေၚ်ပ္ညဳပ္ညပ်သဳကၠဳ ကုသၞာဲဒဴအေဿရေ၊ သၞာဲဒဴလက်ဗနန်တံ ဂၠိုၚ်ကဵုဂိတုတုဲဂှ် ကလိဂွံကၠုၚ် တၚ်တုပ်စိုတ်သာ်ဏံရောၚ် သမ္မတပြၚ်သေတ် မက်ကရောန် ဟီုလဝ်ရ။
သ္ကိုပ်ဝန်ဇၞော် နေတာန်ညာဟုဂှ်တှ်ေ ထ္မံက်အာရုပ်ရဴ တၚ်တုပ်စိုတ်ပရေၚ်ဒေါအ်ပန်ပှော်တံဂှ်ဏောၚ်ကီုလေဝ် ယဝ်ရဂကောံဟေဿဗိုဝ်လာ ဂၠါဲကၠုၚ်သၞမ္ဂး ခၠေဝ်ပလန်အာ နကဵုဒြဟတ်ပေၚ်ၚ်ဏောၚ်ဂှ် ဟီုလဝ်ရ။
Ref: Reuters