မတ်မလီု၊ နဝ်ဝေမ်ဗာ ၃၀
ပ္ဍဲကဵုရာသဳထၜိုတ် တွဵုရးဍုၚ်မန်သၞာံဏံဂှ် ဟိုတ်နူရာသဳဥတုဖံက်ပၠန်၊ ဟိုတ်နူဒးစၟ၊ ဟိုတ်နူပရေၚ်ဂီုကၠီုတံဂှ်တုဲ ခွါတ်ထၜိုတ်ဟွံဂွံဒှ်ဒၟံၚ်တုဲ ဒမြိပ်ထၜိုတ်တိတ်တံ စှ်ေဒၟံၚ်တီတီဂှ် တၠကမၠောန်ထၜိုတ်ဂမၠိုၚ် ဟီုရ။
ကမၠောန်ခွါတ်ထၜိုတ်တံဂှ်ဝွံ ပ္ဍဲရာသဳထၜိုတ်သၞာံဏံ ဟိုတ်နူရာသဳဥတုဖံက်ပၠန်တုဲ ဒးဒၟံၚ်စၟယဲ ဒေသကော် ယဲမတ်ဂစေံဂှ်တုဲ တၞးဍေံ ပြဟ်အုဲအာတုဲဂှ် ဒမြိပ်တိတ်တံလေဝ် ယအ်စှ်ေကၠုၚ်ရ။
ဟိုတ်နူဒးဒၟံၚ်စၟယဲမတ်ဂစေံဂှ်တုဲ ဒမြိပ်ထၜိုတ်တံဂှ်ဝွံ ယအ်စှ်ေအာ ဟွံအောန်နူကဵု ၃၀ တၟံကၠံတုဲ ကၠအ်ထၜိုတ်လ္ၚဵုတံဂှ်ဝွံ ဟိုတ်နူအကာဲအရာပရေၚ်ဂီုကၠီုတုဲ ခွါတ်ထၜိုတ်ဟွံဂွံ ဒှ်ဒၟံၚ်ရ။
တၠကမၠောန်ထၜိုတ်မွဲတၠဂှ်တှ်ေ ပ္ဍဲကၠအ်ထၜိုတ်ဗွဲမဂၠိုၚ် ဟိုတ်နူဒးဒၟံၚ်စၟယဲမတ်ဂစေံတံဂှ်တုဲ ဒမြိပ်ထၜိုတ်တိတ်ဂှ် ယအ်စှ်ေအာ နူကဵုသၞာံတုဲတေံဂှ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
“ တၞံတံဂှ် ဒးစၟ။ တုဲကၠုၚ်မွဲဟူတေံဂှ်လေဝ် မွဲဏှေံဗြဲဂူ မွဲဏေံတ္ၚဲကာတ် မွဲဏှေံဂံက် ဒှ်လဝ်တုဲ တၞးဍေံအုဲ ဍံက်ဍေန်ဒှ်အာဗ္စံက်ဗ္စံက်တုဲ ကော်စယဲမတ်ဂစေံ။ ဒှ်ဒၟံၚ်ယဲဏံတုဲ တၞံလ္ၚဵုတံဂှ်တှ်ေ တၞးဟွံမွဲ ဒှ်အာရ။ တၞးတံဂှ်ပၠန်လေဝ် ပြဟ်အာ အခိၚ်တၞးပြဟ်ဟွံသေၚ်ဂှ်တုဲ ဒမြိပ်ထၜိုတ်တိတ်ဂှ် ယအ်အာရ။ ကၠအ်လ္ၚဵုတံဂှ်ပၠန်လေဝ် တၞးဟွံပြဟ်ပုဟ်။ ဆ္ဂး ဒှ်ယဲဏံတုဲ ဒမြိပ်ထၜိုတ်တိတ်ဂှ် ယအ်စှ်ေအာရ” သာ်ဝွံ သ္ဂးရ။
ယဲမတ်ဂစေံ ဒှ်ဒၟံၚ် ပ္ဍဲကၠအ်ထၜိုတ်တံဂှ်ဝွံ ဒှ်ဟိုတ်နူကဵုရာသဳဥတုတုဲ ဂဥုဲဂွံဂစတ်တံလေဝ် ဟွံမွဲတုဲ ညံၚ်ထၜိုတ်ဂွံတိတ်ဂှ်လေဝ် ကၠောန်ဟွံဂွံပုဟ်ဂှ် ညးဆက်ဟီုရ။
တၠကမၠောန်ထၜိုတ်မွဲတၠဂှ်လေဝ် ရာသဳဥတုကီု သီုကဵုအကာဲအရာပရေၚ်ဂီုကၠီုတံဂှ်တုဲ ဒမြိပ်ထၜိုတ်တိတ် စှ်ေဒၟံၚ်ကီုလေဝ် အပ္ဍဲဗွဝ်ဖျာဂှ် ဂွံသွံဒၟံၚ်ရောၚ် ဟီုရ။
“ ဒမြိပ်တိတ်ဂှ်တှ်ေ ၜိုတ်ထေၚ်လဝ်ဂှ် ဟွံခိုဟ်ဏီပုဟ်။ ဒးဟီုမ္ဂး ရာသဳဥတု ပလီုဒၟံၚ်လေဝ် ပါကီုဏောၚ်။ ခွါတ်ဒၟံၚ်ဖိုဟ် ယအ်ဒၟံၚ်ဂှ်လေဝ် ပါဏောၚ်။ ဟိုတ်နူပရေၚ်ဂီုကၠီုတုဲ ကၠအ်ဟွံခွါတ်တံ ကၠအ်အာကၠုၚ်ဝါတ်ဂါတ်တံဂှ်လေဝ် ဒမြိပ်တိတ်ဟွံခိုဟ်ဏီပုဟ်။ ဆ္ဂး နူကဵုရုၚ်စက်တံဂှ် ရာန်ကၠုၚ်တုဲ ရုၚ်စက်ပ္တိတ်အးအးတံဂှ်တှ်ေ ဂွံရာန်ဒၟံၚ်ဏောၚ်” သာ်ဝွံ သ္ဂးရ။
အပ္ဍဲဗွဝ်ဖျာထၜိုတ်တံဂှ်တှ်ေ ဒမြိပ်တိတ်ဍေံ စှ်ေဒၟံၚ်ကီုလေဝ် လ္ပာ်ဍုၚ်ကြုက် ဟိုတ်နူရာန်ဂၠိုၚ်ကၠုၚ်ဒၟံၚ်တုဲ ထၜိုတ်မွဲပံၚ်ဂှ် ဂွံဒၟံၚ်ၚုဟ် စဵုကဵု ၃၀၀၀ ဒ္ကေဝ်ရ။
အပ္ဍဲဒေသဂှ် ကၠအ်ထၜိုတ်ဗွဲမဂၠိုၚ်ဝွံ ဟိုတ်နူရာသဳဥတုသာ်ဏံတုဲ ဒးကၠုၚ်စၟယဲတံဂှ်ကီု၊ ပ္ဍဲကၠအ်လ္ၚဵုတံဂှ်ပၠန်လေဝ် ဟိုတ်နူပြသၞာဂၠါဲကောန်ကလောန်ဝါတ်တံဂှ်တုဲ ခွါတ်ထၜိုတ်ဟွံဂွံ ဒးကၟာတ်လဝ်နွံဂှ် တၠကမၠောန်ကၠအ်ထၜိုတ်ဂမၠိုၚ် ဟီုရ။
တွဵုရးဍုၚ်မန်ဝွံ ပ္ဍဲအလုံဍုၚ်မွဲဂှ် ဒှ်တွဵုရးတဵုလွဳတၞံရဝ်ဗာဂၠိုၚ်အိုတ်မွဲတုဲ ပရေၚ်တဵုလွဳတၞံထၜိုတ်ဂှ်တှ်ေ နွံဒၟံၚ် မသုန်ကိုဋ်ဨကပြၚ်တုဲ လၟေၚ်သၞာံ လျိုၚ်တာန်ထၜိုတ် တိတ်ဒၟံၚ်မွဲကိုဋ်ပြၚ်ရ။
ပရိုၚ်−သြၚ်လောန်တိုၚ်(မ်)
ဗီု−CJ