မဝ်သကိုဝ်၊ နဝ်ဝေမ်ဗာ ၃၀
ပ္ဍဲဍုၚ်ယူကရုၚ် ဍုၚ်ဇၞော်ကိဗ်ဂှ် ဒၞါဲဖျေံသ္ဂုတ်သွာတ်ပၟိက်ဇၞော်တံဂှ် ပန်ပသောၚ်အာ နကဵုကမ်လှောဝ်တၟိညးတံ Oreshnik ဂှ်ဏောၚ် သမ္မတရုယှာ ဗလာဒဳမာပူတေန် ဘပဠလဝ်ရ။
ပ္ဍဲတိဍာ်ရုယှာဂှ် ဟိုတ်နူယူကရုၚ် ဆက်ဗ္တိုက်ဒၟံၚ် နကဵုကမ်လှောဝ်အမေရိကာန်ထံက်ပၚ်ကဵုလဝ် Atacms ဂှ်တုဲ နဒဒှ်ကလေၚ်ပလန်တဲဂှ် ရုၚ်ယှာ ဗ္တိုက်ပလီုကၠုၚ်လဝ် ဒၞါဲဒတန်စပ်ကဵုဇြဟတ်ဓာတ် ယူကရုၚ်တံနွံဂှ်တုဲ ခြာဟွံလအ်ဂှ် သမ္မတပူတေန် ဟီုကၠုၚ်လဝ် သာ်ဏံရ။
သမ္မတယူကရုၚ် ဗလာဒဳမာ ဇြဳလာန်သကဳဂှ် ခၠေဝ်ပလန်အာ ကုအရာရုယှာ မကရေပ်ဓရတ်ကၠုၚ်အိုဿီုဂှ် သ္ကာတ်တ်မြဟ်ဟ်ဏောၚ် ဟီုရ။
ကြဴနူရုယှာ ၜက်ၜေတ်ဗ္တိုက်ကၠုၚ် သၞာံ ၂၀၂၂ ဂိတုဖေဖဝ်ဝါရဳဂှ်တုဲဂှ် နဒဒှ်အလန်ကိုပ်ကၠာအိုတ် ယူကရုၚ် ဗ္တိုက်လဝ်အပ္ဍဲတိဍာ်ရုယှာ နကဵုကမ်လှောဝ် Atacms၊ နကဵုကမ်လှောဝ် Storm Shadow ဗျိတိၚ်မထံက်ပံၚ်ကဵုလဝ်ဂှ်ရ။
ဣဝွံလေဝ် ကလိဂွံအခေါၚ် နူကဵုဍုၚ်ပလိုတ် မကဵုလဝ်အရီုဗၚ်လွဟ်လက်နက် မပ္တံကဵု နူကဵုဍုၚ်အမေရိကာန်၊ ဗျိတိၚ် ကေုာံ ပြၚ်သေတ်တံတုဲမှ ယူကရုၚ် ဗ္တိုက်ကၠုၚ်လဝ် မဒှ်ရ။
ပ္ဍဲဂိတုနဝ်ဝေမ်ဗာ ၂၈ အခိၚ်ဗ္တံဂှ် ရုယှာကၠောန်သ္ပဗ္တိုက်လဝ် ဒၞါဲဒတန်ဇြဟတ်ဓာတ်ယူကရုၚ်တံ ဇၞော်ကဵုဇြဟတ်ဂှ်တုဲ မၞိဟ်ချိုတ် ဟွံမွဲကီုလေဝ် မၞိဟ်မွဲပြကောဋိကိုဋ်ပြၚ် ဟွံဂွံပၟတ်ဓာတ်လလဳ ဒှ်အာလဝ်ရ။
ကုစမြိုၚ်သ္ဇိုၚ် စပ်ကဵုဇြဟတ်ဓာတ်တံကဵု စမြိုၚ်ကောန်အရာပ်တံဂှ်လေဝ် ရုယှာရပ်စပ်ဗမ်တံဂှ်တုဲ ဗ္တိုက်လဝ်ရောၚ် သမ္မတဇြဳလာန်သကဳ ဟီုရ။
အပ္ဍဲပရေၚ်ဗ္တိုက် ရုယှာတံဂှ် ဂွံကြတ်ပန်ဖျေံ ဒှ်ဟွံမာန်ပုဟ် နူကဵုသမ္မတပူတေန် မဟီုဂးကၠုၚ်လဝ်ဂှ် ကမ်လှောဝ် Oreshnik မပါလုပ် ကမ်လှောဝ် ၉၀ ပြၚ် ကေုာံ ဒရုၚ် ၁၀၀ ပြၚ် ပါလုပ်ရောၚ် သ္ဂးရ။
ပ္ဍဲဍုၚ်ရုယှာ ကမ်လှောဝ် Oreshnik စမ်ၜတ်ဒၟံၚ်ဖိုဟ်ဂှ် နွံဒၟံၚ်လၟိဟ်ညိညရတုဲ ဂွံထပ်ကၠောန်ပ္တိတ်ဂှ် ဒးကေတ်အခိၚ်ဏီဏောၚ် သၞာဲဒဴအမေရိကာန်ဂမၠိုၚ် စှ်ေလဝ်စိုတ်ရ။
သမ္မတပူတေန်ဝွံ ဂွံပတုဲဒှ်ကၠေံ ပေါဲပၞာန်ဏံ ဆန္ဒဟွံမွဲပုဟ်ဂှ် သမ္မတယူကရုၚ် ဇြဳလာန်သကဳ သ္ဂးရ။
ပူတေန်ဂှ်တှ်ေ နကဵုရုယှာ ကဵုအာယူကရုၚ် အခေါၚ်ပိုၚ်ပြဳလွဟ်လက်နက်နျူကလဳယျာတံ ဟွံသေၚ်ပုဟ်တုဲ ယဝ်ပိုၚ်ပြဳကၠုၚ်မ္ဂးလေဝ် ဒးဒုၚ်ပလီုကဵု ဒပ်ပၞာန်ရုယှာဏောၚ်ဂှ် ဟီုလဝ်ရ။
သမ္မတဇြဳလာန်သကဳဂှ်တှ်ေ နကဵုယူကရုၚ် ဟိုတ်နူဗလးထောံတဲ လွဟ်လက်နက်နျူကလဳယျာ မကလိဂွံလဝ်အာဲ နူကၟိန်ဍုၚ်ပံၚ်ကောံသဵုဗဳယေတ်တံဂှ်တုဲ အစောံစရာဲပရေၚ်စဵုဒၞါ အရာမနွံပၟိက်တံဂှ် ဟွံမွဲဒှ်ဒၟံၚ်ရောၚ် ကေၚ်ဟီုကၠုၚ်လဝ် ဂၠိုၚ်ၚ်ကဵုဝါရ။
Ref: BBC