ၜၚ်ကံက်၊ ဒဳဇြေမ်ဗာ ၁
ညးမကလိဂွံလဝ်တဆိပ်ဒဳဂရဳမွဲမွဲတံ ညံၚ်သ္ဂောံဂွံသြန်ဂိတု ဟွံအောန်နူကဵု ၁၈၀၀၀ ၝာတ်ဂှ်ကီု၊ ညးမကလိဂွံလဝ်စၟတ်တဲသ္ပစၟတ်သမ္တီ စပ်ကဵုကမၠောန်ကၟိတ်တံ မွဲတၠမ္ဂး သွက်ဂွံကဵုအာ ၁၁၀၀၀ ၝာတ်ဂှ်ကီု၊ သွက်ညးမကော်လဝ် နဒဒှ်သ္ဇိုၚ်ဝန်အလဵုအသဳတၟိတၟိတံဂှ် သွက်သ္ဂောံပ္ညဳကဵုအာ သြန်ဂိတု စကလိဂွံတံဂှ်ကီု ဂလာန်ပ္တိုန်ဏံဂှ် ဂကောံဝန်ဇၞော်သေံ သ္ပဒတန်လဝ်တုဲရ။
ဟိုတ်နူကလေၚ်ပလေဝ်ပလေတ် နှေန်သြန်ဂိတုသာ်ဏံဂှ်တုဲ ဒးရပ်စပ်အာ သြန်ဘဏ္ဍာ ၂ ဒဿမ ၆၇ ဗဳလျာန်ဏောၚ် မဒှ်ရ။
ပ္ဍဲဂိတုနဝ်ဝေမ်ဗာ ၂၉ တေံ ကၠောန်ဗဒှ်လဝ် ကောံဓရီု ပ္ဍဲကဵုတက္ကသိုလ်ရာဂျာဖာတ် ပ္ဍဲဍုၚ်ချေၚ်မာဲဂှ်တုဲ ညးမၞုံအခေါၚ်ဟီုဂး ရုၚ်သ္ကိုပ်ဝန်ဇၞော်သေံဂှ်တှ်ေ သွက်ဂွံပ္ညဳပ္ညပ် ၚုဟ်သြန်ဂိတုသ္ဇိုၚ်ဝန်အလဵုအသဳတံဂှ်ကီု၊ ဟိုတ်နူအပြံၚ်အလှာဲ ပရေၚ်ပိုန်ဒြပ်တံဂှ်တုဲ ညးမဒးဇီုကပိုက်တံဂှ် သွက်ဂွံကဵုအာသြန်လေဲတံဒှ်တမ် စပ်ကဵုဂလာန်ဏံဂှ်တုဲ ဂကောံဝန်ဇၞော် ကဵုလဝ်အခေါၚ်ယျဂှ် ဟီုလဝ်ရ။
ပ္ဍဲအရာပြံၚ်လှာဲ ၚုဟ်သြန်ဂိတုတံဂှ် သီုကဵုအာသ္ဇိုၚ်ဝန်အလဵုအသဳတံ သြန်ထံက်ပၚ် ခရိတ်အရပ်စပ်ပရေၚ်စသုၚ်မံၚ်စံၚ် ယာယဳတံဂှ်ဏောၚ် မဒှ်ရ။
သြန်ဘဏ္ဍာပ္တိုန်လဝ်ဂလာန်ဏံဂှ် လအ်စဵုကဵုၜါသၞာံဏောၚ်တုဲ သွက်သၞာံပထမ ကွက် ၅ ဂိတုဂှ် ရန်လဝ် ၈၃၀ ပြကောဋိကိုဋ်ၝာတ်တုဲ သွက်သၞာံဒုတိယ ကွက် ၁၂ ဂိတုဂှ် ဒးရပ်စပ် ၁ ဒဿမ ၈၄ ပြကောဋိကိုဋ်ၝာတ်ဏောၚ် မဒှ်ရ။
ကိုန်စဳမာန်ဏံဝွံ စအာ ပ္ဍဲဂိတုမေ ၁ ကၠုၚ်စိုပ်ဏံတုဲ လမျီုလုပ်အာ စဵုကဵုဂိတုသေပ်တေမ်ဗာ ၃၀ ဂှ်ဏောၚ် မဒှ်ရ။
နကဵုအေဂျေန်ဇြဳအလဵုအသဳဂမၠိုၚ် သွက်ဂွံကၠောန်အပြံၚ်အလှာဲ သြန်ဂိတုသာ်ဏံဂှ် ကိုပ်ကၠာဏံ ဒးပ္တိတ်တမ် သြန်ဗွဝ်ဇကုကၠာဏောၚ် မဒှ်ရ။
ယဝ်ရသြန်ဗွဝ်တံဏံ ဟွံရုမ်ဂပ်ပုဟ်ဟီုမ္ဂး ရပ်စပ်အာ သြန်ဘဏ္ဍာဗဟဵု ခရိတ်အရပ်စပ်လၟေၚ်သၞာံဂှ်ဏောၚ်ဂှ် ဂွံတီကေတ်ရ။
နကဵုညးမရပ်လဝ် တဆိပ်ကြာတံကဵု စၟတ်တဲသ္ပစၟတ်သမ္တီ စပ်ကဵုကမၠောန်ကၟိတ်တံဂှ် ယဝ်ရလုပ်ကၠောန်ကလောန် ပ္ဍဲဌာနအလဵုအသဳတံှဂ်မ္ဂး ကလိဂွံအာ သြန်ဂိတု ဟွံအောန်နူကဵု ၁၈၀၀၀ ၝာတ်၊ ၁၁၀၀၀ ၝာတ်တံဏောၚ် မဒှ်ရ။
အတိုၚ်အစဳဇန်ဏံမ္ဂး သွက်ပွိုၚ်ၜါသၞာံဂတဏံဂှ် သ္ဇိုၚ်ဝန်လၟုဟ် မဍိုက်ပေၚ်ကဵုဍာ်ဒ္ကေဝ် မခုတ်လဝ်သွက်သ္ဇိုၚ်ဝန်တၟိတၟိတံဂှ်လေဝ် ကလိဂွံအာသြန်ဂိတု ဟွံအောန်နူကဵုညးတံကီုဏောၚ်ဂှ် ဂွံတီကေတ်ရ။
အလဵုအသဳသေံဂှ်တှ်ေ သွက်ညးဆုဲပြံၚ်မံၚ်တန်တဴတံဂှ်လေဝ် သွက်ဂွံဂလိုၚ်ပ္တိုန်ကဵုသြန်ဂိတု ကဆံၚ်သဝ်အိုတ်ဂှ် စဳဇန်လဝ်ရ။
Ref: The Thaigar