ထဝါဲ၊ ဒဳဇြေမ်ဗာ ၃
ရးတၞၚ်သဳ ပွိုၚ်ဍုၚ်ထဝါဲ ပ္ဍဲကွာန်(ကနိုင်းဒါ) ဂှ် ဟိုတ်နူမာၚ်တိုပ်တိတုဲ သၟတ် မအာပါမ်ဟလုၚ်မွဲတၠ ချိုတ်အာလဝ်ရောၚ် ညးဒေသတံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ပ္ဍဲဂိတုဒဳဇြေမ်ဗာ စၟတ်တ္ၚဲ ၁ ၜိုတ် ၇ နာဍဳဂယးဂှ် သၟတ်မွဲတၠ အာယုက် ၁၄ သၞာံ ဒၟံၚ်ကွာန်(ကနိုင်းဒါ) ဂှ်ဝွံ အခိၚ်အာပါမ်ဟလုၚ် ပ္ဍဲကဵုကြုၚ် (ပေါက်တိုၚ်း) ဗ္ဒါဲကွာန်ဂှ် လိုန်ဒးမာၚ်တိုပ်တိတုဲ ဒးဂဗလဝ်ကဵု ပရေၚ်ဗ္တိုဟ်ထ္ကးရ။
ဟိုတ်နူမာၚ်တိုပ်တိဗ္တိုဟ်ထ္ကးတုဲ သၟတ်ဗၠာဲဂှ်ဝွံ နကဵုဝပ်သီုဇိုၚ်ၜါလ္ပာ်ပိုတ်အာဂှ် ဆီတိတ်လောန်ၜက်တုဲ ချိုတ်အာလဝ် ပ္ဍဲကဵုဒၞါဲ ဒှ်ပရူဂှ်ရ။
အတိုၚ်ဂလာန် ညးဒေသတံဂှ်မ္ဂး ဗ္ဒါဲကြုၚ် (ပေါက်တိုၚ်း) မာၚ်တိုပ်တိဗ္တိုဟ်ထ္ကးအာလဝ်ဂှ် ဒပ်ကံၚ်ဇြဳပၞာန် ပစူမာၚ်တိုပ်တိတုဲ သီုကဵုကာတ်စုတ်လဝ် ကတဵုမုက်ကဵုသတိဂှ်ရောၚ် ဂွံတီကေတ်ရ။
သၟတ်လိုန်ဒးမာၚ်တိုပ်တိတုဲ မဒးချိုတ်အာဂှ် ရဲကွာ်ဂၠံၚ်တံ ဂွံဆဵုကေတ်ဇွညး ၜိုတ်ပယျာံဂယး ၁၀ နာဍဳဂှ်တုဲ ကဵုပရိုၚ်ကဵု ဇရေၚ်ဂြောဝ်ဂတာတုဲ စံၚ်ဇွပတုဲလဝ်ကာ ပ္ဍဲကဵုတ္ၚဲဂှ်ရ။
ဂြောဝ်ဂတာ ညးသၟတ် ဒးမာၚ်တုဲချိုတ်အာဂှ်ဝွံ ကၠာတေံဂှ် မံၚ်လဝ် ပ္ဍဲကွာန်(သရက်နှစ်ခွ) တုဲ ပ္ဍဲဂိတုဂျူလာၚ်တုဲကၠုၚ်တေံဂှ်လေဝ် ညးမဒှ်အပါညးဝွံ ဒးအာလွဟ်ဇၞော် ဒပ်ကံၚ်ဇြဳပၞာန်တံ ပန်နၚ်ဂှ်တုဲ ချိုတ်အာလဝ်ရောၚ် ဂွံတီကေတ် အတိုၚ်ဂလာန်ညးဒေသတံရ။
တုဲကၠုၚ် ပ္ဍဲဂိတုနဝ်ဝေမ်ဗာ ၃၀ တေံဂှ်လေဝ် ညးဗြဴအာယုက် ၂၇ သၞာံမွဲတၠ ဒၟံၚ်ကွာန် (ကမ်းတို) ပွိုၚ်ဍုၚ်တၞၚ်သဳဂှ် ဟိုတ်နူမာၚ်တိုပ်တိတုဲ ဇိုၚ်မွဲလ္ပာ်ပိုတ်တုဲ ကလိဂွံအာလဝ်ဝပ်ရ။
အတိုၚ်လိက်ဒုၚ်စဳရေၚ် ဂကောံချဳဒရာၚ်ဍုၚ်နာနာ သ္ဂောံတာဒၞါကၟာတ်လဒဵုမာၚ်တိုပ်တိ ICBL မလလောၚ်ပ္တိတ်လဝ် ပ္ဍဲဂိတုနဝ်ဝေမ်ဗာ ၂၀ ဂှ်မ္ဂး ဍုၚ်ဗၟာဝွံ ဟိုတ်နူမာၚ်တိုပ်တိတုဲ ညးဇီုကပိုက်ချိုတ်အာ လ္တူဂၠးတိဏံ ဒှ်လဝ်ဂၠိုၚ်အိုတ်တုဲ အပ္ဍဲသၞာံ ၂၀၂၃ ဂှ် မၞိဟ် ၁၀၀၀ ပြၚ် ဇီုကပိုက်ချိုတ်အာလဝ်ရ။
ပရိုၚ်−သြၚ်လောန်တိုၚ်(မ်)
ဗီု−CJ