နေဗျဳဒဝ်၊ ဒဳဇြေမ်ဗာ ၃
တၚ်နၚ်ပရိုၚ်ဟွံဍာံပြ တၚ်နၚ်ပရိုၚ်ပတောံတံ ပလီုဒၟံၚ် အသိၚ်အလိုန်ပရေၚ်ဖောအ်ဗြေဝ် ကေုာံ ပရေၚ်ညိၚ်ဝတ်ကၟိန်ဍုၚ်ဂှ်ဏောၚ်ဂးတုဲ က္ဍိုပ်သ္ကိုပ်ပၞာန် သ္ကိုပ်ပၞာန်ဇၞော် မေန်အံၚ်လှာၚ် မကၟာတ်လဒဵုဒၟံၚ် အခေါၚ်သၠးပွးပရိုၚ်မဳဒဳယျာတံ ဟီုရ။
ပ္ဍဲကဵုသ္ဘၚ်ပအပ်ကဵုလာဘ်လိက်ပတ်ကောန်ဂကူ မရနုက်ကဵု ၇၅ ဝါ မကၠောန်ဗဒှ်လဝ် ပ္ဍဲဂိတုဒဳဇြေမ်ဗာ ၁ ဂှ် က္ဍိုပ်သ္ကိုပ်ပၞာန်ဂှ်တှ်ေ ဟိုတ်နူပရိုၚ်ပတောံဂမၠိုၚ်တုဲ က္တဵုဗဒှ်ကဵု ပရေၚ်ညဳသၟဟ်ကောန်ဍုၚ်အရၚ်တံ သ္ဂောံလီုလာ်မာန်တုဲ ကုတိုၚ်ပ္ကဴပရေၚ်ၜိုဟ်လလမ် ညးဂမၠိုၚ်မစၟဳလဝ်တံဂှ်လေဝ် သ္ကဵုဒှ်တဴပလာပ်ပထုဲဂှ် ဟီုဏာလဝ်ရ။
ဥူတိုဝ်ဇြဝ်လာတ် ညးအုပ်ကာ ကံၚ်ဇြဳပရိုၚ်မဳဒဳယျာဍုၚ်ဗၟာ ဗၠးၜး IPCM ဂှ် ဒပ်ပၞာန်တံရဟေၚ် နကဵုနဲကဲနာနာသာ် ပ္တိတ်ဒၟံၚ်ဇြဟတ် ပရိုၚ်ပ္တောံတံဂှ်တုဲ ညံၚ်ဂွံဂွံဓဝ်ဍာံ အရာဍေံတံနွံပၟိက်ဂှ် ရပ်စပ်ဒၟံၚ်ပရိုၚ်မဳဒဳယျာတံ နဒဒှ်လွဟ်ရောၚ်ဂှ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
“ဍေံတံဂှ်တှ်ေ မွဲဗီုပြၚ်ရဏောၚ်။ ဗာယှေန်ဏံဂှ်တှ်ေ ဒှ်ဗာယှေန် ဒပ်ပၞာန်တံရဏောၚ်။ ပရိုၚ်ညးတံဟီုမှ ဍာံ၊ သှ်ေနူဂှ် ဒှ်ပရိုၚ်ဗၠေတ်ဂှ် ဟီုဒၟံၚ်လၟိုန်ရ။ ဍာံဍာံဂှ် ဂွံဒှ်ဗီုဏံဂှ်လေဝ် ဒပ်ပၞာန် ပ္တိတ်ဒၟံၚ်ဇြဟတ် နကဵုနဲကဲနာနာသာ်ရ။ ဗွဲတၟေၚ် ဒပ်ပၞာန်ဂှ် ရပ်စပ်ဒၟံၚ် ပရိုၚ်မဳဒဳယျာတံ နဒဒှ်လွဟ်ဏောၚ်။ ဗဳဒဳယျာဗၠးၜးပိုယ်တံဂှ်တှ်ေ သီုဟွံမွဲကဵုပရေၚ်ဆာန် ပရေၚ်ဍုဟ်ဂှ် ကဵုဒၟံၚ်ညးဍုၚ်ကွာန်တံ အခေါၚ်ဂွံတီကေတ်ပရိုၚ်တံဂှ်ရ။ အေ ဂှ်တှ်ေ ညအ်ဂှ် ဒှ်သ္ဇက်ဂွံဒးအမ်သဝ်ဟွံသေၚ်ပုဟ်။ က္ဍိုပ်သ္ကိုပ်ပၞာန်ဂှ်တှ်ေ ပါဲနူကဵုဓဝ်ဍာံဍေံတံမၞုံပၟိက်တံဂှ်တုဲ သှ်ေဒၟံၚ်တံဂှ်တှ်ေ ဟွံဍာံပုဟ်ဂှ် ဟီုမံၚ် စောဲစပ်ဒၟံၚ်ရဏောၚ်” သာ်ဝွံ သ္ဂးရ။
ကံၚ်ဇြဳပၞာန်ဝွံ အခိၚ်သီလဝ်အဝဵု နကဵုဇြဟတ်လွဟ်ဂှ် ဟိုတ်နူမမာဲဟွံဗဗွဲဓဝ် ပ္ဍဲပေါဲရုဲမာဲတံဂှ်ဂးတုဲ နူကဵုလိက်ပရိုၚ်ကၟိန်ဍုၚ်ပိုၚ် နူကဵုလာၚ်ထဳဝဳ မထိၚ်ဒက်လဝ်တံဂှ် တြးဝါဒစောဲစပ်လဝ်တုဲ ပ္ဍဲကဵုပေါဲသဳကၠဳတံ ပ္ဍဲကောံဓရီုတံဂှ်လေဝ် လေပ်ဟီုဒၟံၚ်လၟိုန်ရ။
သ္အာၚ်နူဂှ်ပၠန် ဟိုတ်နူပရေၚ်ပၞာန်သီအဝဵုတုဲ ပေါဲဗ္တိုက်ထပိုတ်ရိုဟ်ကၞက်သၞောတ်တၠအဝဵုပၞာန် မမံက်ဂဝ်ကၠုၚ်ဂှ်လေဝ် ဟိုတ်နူဂကောံရပ်လွဟ်ကောန်ဍုၚ်အရၚ်တံတုဲ ဇီုကပိုက်ကဵုပရေၚ်ညိၚ်ဝတ်အပ္ဍဲဒေသဂးတုဲ ကၟာတ်လဒဵုကၠေံ ဒုဟ်ညးတံတုဲ စောဲစပ်လဝ်ရ။
စပ်ကဵုပရေၚ်ဏံတုဲ ဌာန်ပရိုၚ်ဗၠးၜးဂမၠိုၚ် ချူခၞံဗလးပ္တိတ်ဒၟံၚ် တၚ်နၚ်ပရိုၚ်ဗၠေတ်တ် ပရိုၚ်ပတောံပရိုၚ်အလီတံဂှ်ဏောၚ်ဂးတုဲ သွက်ဂွံထိၚ် အခေါၚ်ဗၠးၜးပရိုၚ်မဳဒဳယျာတံဂှ် ကံၚ်ဇြဳပၞာန် ပ္တိတ်ကၠုၚ်လဝ်ဇြဟတ် နဲကဲနာနာသာ်ရ။
အတိုၚ်တၚ်နၚ် ဂကောံသုတေသန ISP Myanmar ဂှ်မ္ဂး ကြဴနူဒပ်ပၞာန်သီအဝဵုတုဲ ပ္ဍဲဍုၚ်ဗၟာဂှ် ကံၚ်ဇြဳပၞာန် ဍဵုဍိုက်ဒၟံၚ် ပရိုၚ်မဳဒဳယျာဗၠးၜးတံ သ္ကာတ်တ်မြဟ်ဟ်တုဲ အ္စာပရိုၚ်တံလေဝ် ပ္ဍဲအရာဒးဒုၚ်ဍဵုဍိုက်ဂှ် လောန်ၜက်ကၠုၚ်ကဵုဗၞတ်ဗ္ၜတ်ရ။
အပ္ဍဲကာလအခိၚ်သီအဝဵုပြဟ်ဟ်တေံ လုပ်စိုပ်ဍိုက်ဗ္တိုက် တိုက်ပရိုၚ်မဳဒဳယျာတံကီု၊ ပ္ဍဲပေါဲထ္ၜးဆန္ဒတံဂှ် ပန်ပှော်ရပ်ဒက် အ္စာပရိုၚ်တံကီု ကေုာံ လုပ်စိုပ်ရပ်ဒက် စဵုကဵုအပ္ဍဲသ္ၚိတံဂှ်သၟးဟွံက သီုကဵုစောဲကၠုၚ်လဝ်ဂဗုတ်ရ။
အတိုၚ်စရၚ် ဂကောံ(အသံ) မချဳဒရာၚ်ဒၟံၚ် အခေါၚ်ဟီုဂးထ္မံက်ပ္တိတ်ဗွဲမဗၠးၜးဂှ်မ္ဂး အပ္ဍဲပၞာန်သီအဝဵု ဗ္ဒါဲပွိုၚ်ပန်သၞာံဏံ အလုံဍုၚ်မွဲ အ္စာပရိုၚ် ၂၁၅ တၠ ဒးဒုၚ်ရပ်လဝ်တုဲ ၁၁ တၠ ချိုတ်တုဲ ဌာန်ပရိုၚ် ၁၅ ဒးဒုၚ်ရုပ်သီလဝ်လာၚ်ဇြေန်ရ။
မွဲလ္ပာ်ဂှ်ပၠန် ညံၚ်ပရေၚ်ပရိုၚ်ဇွောဝ်စှ်ေတံ ဂွံလဇုဲလဇဂှ်ကီု၊ ညံၚ်ဂွံပထုဲ ပ္ဍဲပရေၚ်ဆက်စၠောံ မဆက်စပ်ကဵု ပရေၚ်ချဳဒရာၚ်ဒဳမဝ်ကရေဇြဳတံဂှ်ကီု ကေုာံ တၠအကံက် ချူပါ်ပါဲဒၟံၚ် ကံၚ်ဇြဳပၞာန် လ္တူလပှ်ကျာတံဂှ်လေဝ် ရပ်ဒက်ကေတ်အရေဝ်တုဲ ကၠောန်ဒၟံၚ်ပရေၚ်ဍဵုဍိုက်ဒေတ်ဂျေတ်ဒဴတံရ။
ပရိုၚ်−သြၚ်လောန်တိုၚ်(မ်)
ဗီု−MOI