မတ်မလီု၊ ဒဳဇြေမ်ဗာ ၃
ပ္ဍဲကဵုထံၚ်စာတ် အလုံဍုၚ်မွဲတံဂှ် အပ္ဍဲသၞာံဏံ ဟိုတ်နူဟွံဂွံပရေၚ်မၚ်မွဲရံၚ်စံၚ် ပရေၚ်ထတ်ယုက်တံ ဗွဲမရုမ်ဂပ်ဂှ်တုဲ ကောန်ထံၚ်ပရေၚ်ဍုၚ်ကွာန် ၂၀ တၠ ချိုတ်အာလဝ်ရောၚ် ဇာဇၞိက်ကောန်ထံၚ်ပရေၚ်ဍုၚ်ကွာန် စပ်ကဵုအလုံဍုၚ်ဗၟာ PPNM လလောၚ်ပ္တိတ်လဝ်ရ။
သၞာံဏံ နူဂိတုဂျာန္နဝါရဳ စဵုကဵုဂိတုနဝ်ဝေမ်ဗာဂှ် ပ္ဍဲထံၚ်စာတ်တံဂှ် ကောန်ထံၚ်ပရေၚ်ဍုၚ်ကွာန် တြုံ ၁၈ တၠ၊ ကောန်ထံၚ်ပရေၚ်ဍုၚ်ကွာန် ဗြဴ ၜါတၠ၊ အပံၚ်ဖအိုတ် ၂၀ တၠ ချိုတ်အာလဝ်ရောၚ် ဂွံတီကေတ် အတိုၚ်လိက်ဒုၚ်စဳရေၚ် PPNM မလလောၚ်ပ္တိတ်လဝ် ပ္ဍဲဂိတုဒဳဇြေမ်ဗာ ၂ တေံဂှ်ရ။
ကိုဝ်တိုက်ထောန်ဥူ ညးမၞုံအခေါၚ်ဟီုဂး PPNM ဂှ်တှ်ေ ညးမဒးပြဟ်လလုဲအာဂမၠိုၚ်ဝွံ ညးယဲခန္ဓမၞုံတံကဵု ဟိုတ်နူဝပ် မကလိဂွံလဝ် ပ္ဍဲဒၞါဲစၟဳတ်တံဂှ်တုဲ ချိုတ်လဝ်ဂၠိုၚ်အိုတ်ရောၚ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ကောန်ထံၚ်ပရေၚ်ဍုၚ်ကွာန်ဂမၠိုၚ်ဝွံ ပ္ဍဲကဵုထံၚ်တံဂှ် ဟွံဂွံစၞအာဟာရ ရုမ်မ်ဂပ်ပ်တုဲ ညးဂွံကၠုၚ်ယဲတံ၊ ပ္ဍဲကဵုဍာ်သုၚ်တံဂှ် ဒၟါနူဓာတ်ဗကောဝ်ပါဂၠိုၚ်တုဲ ယဲကောန်တၟံ ပရေံစှ်ေကၠုၚ်တုဲ ညးမ္ဒးချိုတ်အာတံလေဝ် နွံဒၟံၚ်ရ။
သ္အာၚ်နူဂှ်ပၠန် ယဲကၟံ၊ ယဲကသအ်၊ ယဲကျာထ္ပက်၊ ယဲဆီၜေတ်၊ ယဲယီုဂြက် ကေုာံ ဟိုတ်နူဟွံဂွံအခေါၚ်လွဳယဲ၊ ဟိုတ်နူအ္စာသဝ်ဝန်ဂမၠိုၚ် သာသ္ပအ်တံ မပါလုပ် ဟိုတ်နူဟွံဂွံလွဳ ဗွဲမဂတာပ်အခိၚ်တံဂှ်တုဲ ဒးချိုတ်အာလဝ်ရ။
အပ္ဍဲကဵုကောန်ထံၚ်ပရေၚ်ဍုၚ်ကွာန်တံ ဒးချိုတ်အာတံဂှ် သ္ကိုပ်ဝန်ဇၞော်ရးမာန္တလေဝ် ဒံက်တာဇြဝ်မျေတ်မံၚ် သီုကဵုဒှ်ဒုဥက္ကဌ ဗော် NLD လေဝ် ပါလုပ်ရ။
သၞာံ ၂၀၂၃ တုဲကၠုၚ်တေံဂှ်လေဝ် ပ္ဍဲကဵုထံၚ်စာတ်အလုံဍုၚ်မွဲဂှ် ဟိုတ်နူဟွံဂွံပရေၚ်မၚ်မွဲရံၚ်စံၚ် ပရေၚ်ထတ်ယုက်တံ ဗွဲမရုမ်ဂပ်တုဲ ကောန်ထံၚ်ပရေၚ်ဍုၚ်ကွာန် ၁၇ တၠ ချိုတ်အာလဝ်ရောၚ် ဂွံတီကေတ် အတိုၚ်ဂလာန် PPNM ရ။
ပရိုၚ်−သြၚ်လောန်တိုၚ်(မ်)
ဗီု−CJ