ထဝါဲ၊ ဒဳဇြေမ်ဗာ ၄
ဗ္ဒိုပ်ဒပ်ကံၚ်ဇြဳပၞာန်ၜါ မဖျေံလဝ်ဒပ် ပ္ဍဲပွိုၚ်ဍုၚ်ထဝါဲ ရးတၞၚ်သဳဂှ်ကဵု ကရောၚ်ပၞာန်ကဵုကၠုၚ်အရီုဗၚ်ပၞာန်တံ ဒးဒုၚ်ကြတ်ဗ္တိုက်လဝ်တုဲ ကောန်ဒပ်ကံၚ်ဇြဳပၞာန် ဟွံအောန်နူကဵု ၂၀ တၠ ဇီုကပိုက်ချိုတ်မာန်ရောၚ် ဂွံတီကေတ် ဇရေၚ်ဒပ်ပၠန်ဂတးတံရ။
ပ္ဍဲဂိတုဒဳဇြေမ်ဗာ ၃ အခိၚ်နူဂယး ၜိုတ် ၆ နာဍဳဂှ် ဒပ်ပၠန်ဂတးတံ လုပ်စိုပ်ဗ္တိုက်လဝ် ဗ္ဒိုပ်ဒပ်ကံၚ်ဇြဳပၞာန်ၜါ မဖျေံလဝ်သ္ဇိုၚ် ပ္ဍဲသၞေဟ်ကၚ်စၟဳတ် (ဘုရားမဲ) ၊ ပ္ၚံက်ဟာလဳ မွဲအခိၚ်ဓဝ်ရ။
ဟိုတ်နူပရေၚ်ဗ္တိုက်ဏံတုဲ ပေါဲဗ္တိုက်ၜါလ္ပာ် က္တဵုဒှ်လဝ် လလအ်ပွိုၚ် ၃ နာဍဳတုဲ ဒပ်ကံၚ်ဇြဳပၞာန်ဂှ်လေဝ် ပလံၚ်ဗစိုပ်လဝ်ပၞာန်အရီု နူကဵုဍုၚ်ထဝါဲ နကဵုကွဳစက်ပန်ဖ္ဍိုက် လွာဲဂှ်ရ။
ဒပ်ပံၚ်ကောံပၠန်ဂတးတံ ကၟာတ်လဒဵုဗ္တိုက်လဝ် ကရောၚ်ပၞာန်ကံၚ်ဇြဳပၞာန် မတိတ်ကၠုၚ်ကဵုပၞာန်ရီုတံ အကြာကွာန်ဇဟာဂှ်ရောၚ် ညးဒုၚ်တာလျိုၚ် ဒပ်ပၞာန်ဗၠးၜးကောန်ဂကူထဝါဲ DNLA ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ကရောၚ်ပၞာန်ကဵုအရီုဗၚ် ဒးဒုၚ်ကၟာတ်လဒဵုဗ္တိုက်လဝ်တုဲ ကွဳစက်ဂမၠိုၚ် ဒေါအ်ဒေၚ်အာတုဲ အပ္ဍဲကဵုပရေၚ်ဗ္တိုက်ဂှ် ကောန်ဒပ်ကံၚ်ဇြဳပၞာန် ဟွံအောန်နူကဵု ၂၀ တၠ ဇီုကပိုက်ချိုတ်မာန်ရောၚ် သ္ဂးရ
ဆ္ဂး အပ္ဍဲကဵုပရေၚ်ဗ္တိုက် ဗ္ဒိုပ်ဒပ်ကံၚ်ဇြဳပၞာန်ၜါဏံဂှ် ပရေၚ်ကောန်ဒပ်ကံၚ်ဇြဳပၞာန် မဒးဇီုကပိုက်ချိုတ်အာတံဂှ် ဆက်ဂၠိုက်ဂၠါဲဒၟံၚ်ရောၚ် ဒပ်ပၠန်ဂတးတံ ဟီုရ။
ပေါဲဗ္တိုက်ၜါလ္ပာ်တုဲဂှ် ဒပ်ကံၚ်ဇြဳပၞာန် ကၟာတ်ထောံ ဂၠံၚ်ဍာ်ဗု−ထဝါဲဂှ်တုဲ ဂၠံၚ်ဒပ်ပၠန်ဂတးတံ ကလေၚ်ဆုတ်ကၠုၚ်မာန်တံဂှ် ပန်ပှော်လဝ်ကဵု လွဟ်ဇၞော်တံ ဟွံပိုတ်သ္ကုတ်ရ။
ပရေၚ်ဗ္တိုက်ဏံဂှ် ဒပ်ပံၚ်ကောံမဟာမိတ်ကဵု ဒပ်ပၞာန်ဗၠးၜးကောန်ဂကူထဝါဲ DNLA တံ ဗ္တိုက်လဝ်တုဲ လၟေၚ်ဒဒှ်ပေါဲဗ္တိုက် သောဲသောဲဗြောဲဗြောဲတံဂှ် ခြာဟွံလအ် လလောၚ်ပ္တိတ်ကဵုဏောၚ် သ္ဂးရ။
တုဲကၠုၚ် ပ္ဍဲဂိတုအံက်တဝ်ဗာ ၃ တေံဂှ်လေဝ် ဒပ်ကံၚ်ဇြဳပၞာန် မဖျေံလဝ်ဒပ် လ္ပာ်မ္ၚးကွာန်မံၚ်မေဝ်ယှံၚ်ဂှ် ဒးဒုၚ်ပန်ကဵုသနာ်ပါတုဲ ကောန်ဒပ်ကံၚ်ဇြဳပၞာန် မွဲတၠ ချိုတ်တုဲ မွဲတၠ ဇီုကပိုက်ကလိဂွံလဝ်ဝပ်ရ။
ပရိုၚ်−သြၚ်လောန်တိုၚ်(မ်)
ဗီု− PDF