နေဗျဳဒဝ်၊ ဒဳဇြေမ်ဗာ ၅
အပ္ဍဲကာလဒပ်ပၞာန်သီအဝဵု ဗ္ဒါဲပွိုၚ်ပန်သၞာံဏံ ပပ္တံနူကဵုဖျုန်၊ က၊ ဗၞိက်စၞစသသ္ဇိုၚ်တံဂှ် ၚုဟ်က္ဍၚ်တိုန်ကၠုၚ်ဒၟံၚ်ဂှ် က္ဍိုပ်သ္ကိုပ်ပၞာန်သီအဝဵု သ္ကိုပ်ပၞာန်ဇၞော် မေန်အံၚ်လှာၚ် ဒုၚ်လဝ်ဝန်ရ။
ပ္ဍဲဂိတုဒဳဇြေမ်ဗာ ၂ တေံ ပ္ဍဲကဵုကောံဓရီုအလဵုအသဳကၟိန်ဍုၚ် ကံၚ်ဇြဳပၞာန် မကၠောန်ဗဒှ်လဝ် ပ္ဍဲဍုၚ်နေဗျဳဒဝ်ဂှ် က္ဍိုပ်သ္ကိုပ်ပၞာန် ဒုၚ်ဝန်ဟီုဏာလဝ် ဒဒှ်ရဂွံဆဵုကေတ်ဒၟံၚ် ပပ္တံနူကဵုဗၞိက်စၞစသုၚ်သ္ဇိုၚ်တံ ၚုဟ်သၠုၚ်တိုန်ကၠုၚ်ဒၟံၚ်ဂှ်ရ။
ဟိုတ်နူၚုဟ်ဗၞိက် က္ဍၚ်ဒၟံၚ်ဂှ်တုဲ နကဵုဂကောံအလဵုအသဳတွဵုရးဂမၠိုၚ် ပါလုပ်သီုကဵု ရးဒေသဇၞော် ကေုာံ ကဆံၚ်ကၟိန်ဍုၚ်တံဂှ် သွက်ဂွံရေၚ်တၠုၚ်ကောပ်ကာဲအာ ဗွဲမစှ်ေကဵုသၞောတ်ဂှ်ကီု ညံၚ်ဂွံဒှ် ၚုဟ်ဗၞိက်မထေက်ကဵုဒှ်ဂှ် သွက်ဂွံရေၚ်တၠုၚ်အာဂှ် က္ဍိုပ်သ္ကိုပ်ပၞာန် စၞောန်ပ္ညုၚ်လဝ်ရ။
သ္အာၚ်နူဂှ်ပၠန် နကဵုတၠကမၠောန် ကၠောန်ပ္တိတ်ဗၞိက်ဂမၠိုၚ် စပ်ကဵုဗၞိက်စၞစသ္ဇိုၚ် ညးဍုၚ်ကွာန်တံဂှ်တုဲ ပ္တိုန်ၚုုဟ်ပရဲ ၜိုတ်ဒးရးရတုဲ သွက်ဂွံသွံအိုတ်ဂှ်ကီု၊ ဒၞါဲသွံတြးဒၟံၚ် ကုညးဍုၚ်ကွာန်တံဂှ်လေဝ် ကေတ်ပရဲအောန်န်တုဲ သွက်ဂွံသွံကဵုဂၠိုၚ်ၚ်ဂှ် ဟီုလဝ်ရ။
စပ်ကဵုၚုဟ်ဗၞိက်က္ဍၚ်ဒၟံၚ်ဂှ်တုဲ အပ္ဍဲဍုၚ် ညံၚ်သြန်လုပ်ကဵု သြန်တိတ် ဂွံသၟဟ်တးဂှ် သွက်ဂွံသၠုၚ်ပ္တိုန်ရေၚ်တၠုၚ်အာ ဗၞိက်ပ္တိတ်တံဂှ်ကီု သွက်ဂွံပ္တိုန်သွံတြး ဍုၚ်သ္အာၚ်တံဂှ်ကီု နူကဵုပလံၚ်ပ္တိုန်သွံတြးဒၟံၚ်လၟုဟ်ဂှ် သွက်ဂွံဂလိုၚ်ပ္တိုန် ၜါဆတုဲ ဂွံပလံၚ်ပ္တိုန်အာဂှ် က္ဍိုပ်သ္ကိုပ်ပၞာန် ဖ္တိုက်ဖ္အောဝ်လဝ်ရ။
တၠပညာပရေၚ်ပိုန်ဒြပ်မွဲတၠဂှ်တှ်ေ ၜိုန်ရကဵုပ္တိတ်ဂလိုၚ်ပ္တိုန် ပရေၚ်ကၠောန်ပ္တိတ်ဗၞိက် အပ္ဍဲဍုၚ်တံဂှ်ကီုလေဝ် နူကဵုကပေါတ် မ္ဒးပၠောပ်နၚ် နူကဵုဍုၚ်သ္အာၚ်တံဂှ် လ္ပာ်ၚုဟ်ကီု လ္ပာ်ဍာ်ဒကေဝ်ကီုဂှ် ဒးၜတ်ကၞာတ်မာန်ဏောၚ်တုဲ ဟွံကဵုပၠောပ် နူဍုၚ်သ္အာၚ်မွဲသာ် ကဵုပ္တိတ်ဂလိုၚ်ပ္တိုန်ဒၟံၚ် အပ္ဍဲဍုၚ်သၟးဂှ်မ္ဂး သွက်ရဲကၠောန်ပ္တိတ်တံဂှ် ဂွံစသိုၚ်ညိညတုဲ သွက်ညးမ္ဒးရာန်စသုၚ်တံဂှ်တှ်ေ ဖဵုဟွံမွဲပုဟ်ဂှ် ထံက်ထ္ၜးလဝ်ရ။
“ကပေါတ်တိတ်နူဇကုဂှ် ဂွံၚုဟ်တန်နူကဵု ကပေါတ်ပၠောပ်နူကဵုဍုၚ်သ္အာၚ်တံဂှ်ဟာ။ ကပေါတ်ခိုဟ်ဟ်ဂှ် ဂွံမာန်ဟာ။ ကဵုကပေါတ်ဍုၚ်သ္အာၚ်ဂှ်ရော ၜတ်ကၞာတ်မာန်ဟာ။ ဍာ်ဇမၠေံဏံဂှ်တှ်ေ ပတုပ်ဟွံမာန်ပုဟ်။ ဍာ်ဇမၠိၚ်ဂှ်ရော ၜတ်ကၞာတ်မာန်ဟာ။ မူဟိုတ်ရောဟီုတှ်ေ ပၠောပ်နူဍုၚ်သ္အာၚ်တံ ဟွံမာန်တှ်ေ ၜိုတ်ပ္တိတ်အပ္ဍဲဍုၚ်တံရ ဒးစသုၚ်ဏောၚ်ဟီုတှ်ေ သွက်ရဲကၠောန်ပ္တိတ်အပ္ဍဲဍုၚ်တံဂှ် ဂွံစသိုၚ်ညိညဏောၚ်။ ဆ္ဂး တော်ကဵုလ္ပာ်ရဲစသုၚ်တံ ဖဵုဟွံမွဲဂှ်တုဲ ရဲလ္ပာ်တံဏံ ဂွံစသိုၚ်ညိညဂှ် မွဲချောဲဍောတ်ရဏောၚ်” သာ်ဝွံ သ္ဂးရ။
ပပ္တံနူကဵုဗၞိက်စသုၚ်သ္ဇိုၚ်တံ ၚုဟ်က္ဍၚ်ဒၟံၚ်ဂှ်ဝွံ ဟိုတ်နူသြန်ဗၟာစှ်ေတုဲ ကပေါတ်တမ် မဒးပၠောပ်နၚ် နူဍုၚ်သ္အာၚ်တံ ၚုဟ်တိုန်ဂှ်ကီု၊ ဂွံကၠောန်ပ္တိတ် အပ္ဍဲဍုၚ်ပေၚ်ၚ်ဂှ် ဗၞိက်အပြောံ အရာမနွံပၟိက်တံ၊ ရုၚ်စက်၊ ရုၚ်ကမၠောန်တံ ဟွံမွဲသၟးဟွံက ဒၟါနူမူဝါဒကံၚ်ဇြဳပၞာန် ဗၠေတ်တ်တံလေဝ် ပါလုပ်ဒၟံၚ်ဂှ် ညးဆက်ဟီုရ။
ညးဗြဴမွဲတၠဂှ်လေဝ် ကံၚ်ဇြဳပၞာန်ဝွံ မုကၠောန်ဟွံလေပ် ကၟာတ်လဒဵုမံၚ်ကၠးကၠးဂှ်တုဲ ၚုဟ်ဗၞိက်ဂမၠိုၚ် တိုန်ကၠုၚ် ဒှ်တုဲ ဟိုတ်နူၚုဟ်ဗၞိက်ဂမၠိုၚ် တိုန်ဒၟံၚ်သာ်ဏံဂှ်ရ ဂြောဝ်ဂတာဂမၠိုၚ် သာတုဲမ္ဒးကြေပ်ဂြတ်ကၠုၚ်ဂှ် ဟီုရ။
“ဍေံတံဂှ် မုမှလေဝ် ကၠောန်မာန်ဟွံသေၚ်ပုဟ်။ ဍေံတံ ကေတ်လဝ်ဒၞါဲမွဲမွဲတုဲ သ္ပအပြံၚ်အလှာဲတုဲ ကၟာတ်ဒၟံၚ်မတေံ မဏံဂှ်လေဝ် မးမးရဏောၚ်။ ၚုဟ်ဗၞိက်တံဂှ်တှ်ေ တိုန်ကၠုၚ်ခဍၚ်ရ။ ပိုယ် ညးမဒးဍုန်တိုပ်တံဂှ်လေဝ် ဒှ်ဒဒိုက်ကွေံကွေံဏောၚ်။ ဟွံပြေပြံၚ်ပုဟ်လေဝ်။ ရဲကၠောန်မွဲတ္ၚဲစမွဲတ္ၚဲတံဟီုတှ်ေ ၚုဟ်ဗၞိက်တံဂှ်တိုန်ဒၟံၚ် ဒကဴနာနာတုဲ ၜိုတ်မွဲဠက်မ္ဂး အိုတ်အာဂှ် ဒှ်ဒၟံၚ်ၜိုတ်ၜါဠက်ယျ။ သွက်ဂြောဝ်ဂတာတံဂှ် သာပရေံကၠုၚ်ရ။ သာတုဲကြေပ်ဂြတ်ကၠုၚ်ရ” သာ်ဝွံ သ္ဂးရ။
သ္အာၚ်နူဂှ်ပၠန် ညးဍုၚ်ကွာန်သ္ဇိုၚ်လၟုဟ်တံဝွံ ဟိုတ်နူၚုဟ်ဗၞိက်ဇၞော်သၠုၚ်တုဲ ဒးဆေၚ်ဒၟံၚ်မုက်ကဵု သြန်လုပ်သြန်တိတ် ဟွံသၟဟ်တးတံ ဇၞော်ကဵုဇြဟတ်တုဲ ဒၟါနူဟွံရုမ်ဂပ်တံဂှ်တုဲ ဒှ်ဒၟံၚ်ခတှ်တံဂှ်ရောၚ် ညးဆက်ဟီုရ။
ၚုဟ်ဗၞိက်ဂမၠိုၚ်ဝွံ အပ္ဍဲကာလသီအဝဵုဏံ ကပေါတ်မွဲဂကူဂှ် ၚုဟ်သၠုၚ်တိုန်ကၠုၚ် အောန်အိုတ် နူ ၅ ဆ စဵုကဵု ၁၀ ဆပြၚ်တုဲ ကပေါတ်ဗၞိက်လ္ၚဵုတံဂှ်ဝွံ အပ္ဍဲဗွဝ်ဖျာ ဒဵုကဵုပိုတ်အိုတ်အာဂှ် က္တဵုဒှ်ဒၟံၚ်ရ။
မွဲလ္ပာ်ဂှ်ပၠန် ကံၚ်ဇြဳပၞာန်ဝွံ သွက်ဂွံထိၚ်ဒက် ၚုဟ်ဗၞိက်ဇၞော်သၠုၚ်တံဂှ်ဂးတုဲ တုဲကၠုၚ်သၞာံ ၂၀၂၃ ဂိတုအဝ်ဂါတ်တေံ ဒက်ပ္တန်လဝ် ကဝ်မတဳကဆံၚ်ကၟိန်ဍုၚ် ညံၚ်ၚုဟ်ဗၞိက်ဂွံညိၚ်ဂှ်ကီုလေဝ် နတဲဏံ ထိၚ်ကၠုၚ်လဝ်ၚုဟ်ဗၞိက်ဂှ်ဟွံမာန် ဒှ်လဝ်ရ။
တိုက်သြန်ဂၠးတိဂှ်တှ်ေ ပ္ဍဲသၞာံ ၂၀၂၄ ဏံမံက်ဂှ် လၟိဟ်မၞိဟ်ကၟိန်ဍုၚ် ၃၂ တၟံကၠံဂှ်ဝွံ စိုပ်ကၠုၚ်ဒၟံၚ် အကာဲအရာကျာတ်ဝါတ်တံဂှ်တုဲ ကလေၚ်ဒှ်အာ အကာဲအရာဂွံဆဵုညာတ်လဝ် သၞာံ ၂၀၁၅ တေံယျဂှ် ကဵုလဝ်သတိ အပ္ဍဲဂိတုဂျောန်တုဲကၠုၚ်တေံရ။
ပရိုၚ်−သြၚ်လောန်တိုၚ်(မ်)
ဗီု−CJ