ကျာ်ထဝ်၊ ဒဳဇြေမ်ဗာ ၆
တွဵုရးဍုၚ်မန် ပွိုၚ်ဍုၚ်ကျာ်ထဝ် ဗ္ဒါဲဍုၚ်ဒုၚ်သယိတ် ပ္ဍဲကဵုကရပ်သုသာန် ကွာန်(အထက်လူလေး) ဂှ် က္ဍိုပ်သ္ကိုပ်ပၞာန်မွဲတၠ ဒးဒုၚ်ပန်ဂစိုတ်လဝ်ကဵုသေနာတ်ရောၚ် ညးဒေသတံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
တုဲကၠုၚ် ပ္ဍဲဂိတုဒဳဇြေမ်ဗာ ၃ အခိၚ်နူဂယး ၜိုတ် ၈ နာဍဳဂှ် သၟာသေနာတ်ဟွံတီယၟုဂမၠိုၚ် ပန်ဂစိုတ်ဏာလဝ် က္ဍိုပ်သ္ကိုပ်ပၞာန်မၚ်ကွာန် ဥူဇေယျာအံၚ် အာယုက် ၄၀ သၞာံပြၚ် ဒၟံၚ်အရာပ်စၟတ် (၁) ဍုၚ်ဒုၚ်သယိတ်ဂှ်ရ။
အတိုၚ်ဂလာန်ညးဒေသတံဂှ်မ္ဂး က္ဍိုပ်သ္ကိုပ်ပၞာန်မၚ်ကွာန် ဥူဇေယျာအံၚ်ဝွံ ပၟိက်ကမၠောန်က္တဵုဒှ်တုဲ အဃောအာလ္ပာ်ကွာန်(အထက်လူလေး) ဂှ် ဂဗဒးကဵုဒပ်စဵုဒၞါညးဍုၚ်ကွာန်တံတုဲ ဒးဒုၚ်ပန်ဂစိုတ်လဝ်ရောၚ် သ္ဂးရ။
စပ်ကဵုက္ဍိုပ်သ္ကိုပ်ပၞာန်မၚ်ကွာန် ချိုတ်အာဂှ်တုဲ နူကဵုသြၚ်လောန်တိုၚ်(မ်) သၟာန်လဝ် ဇရေၚ်ဂကောံဒပ်ပၠန်ဂတး ဖျေံသ္ဇိုၚ်ကျာ်ထဝ်တံကီုလေဝ် ဒဵုကဵုအခိၚ်လၟုဟ် ဟွံဂွံအဆက်ဏီရ။
က္ဍိုပ်သ္ကိုပ်ပၞာန်မၚ်ကွာန် ဥူဇြေယျာအံၚ်ဂှ်ဝွံ ဟိုတ်နူဒးဒုၚ်ပန်ဂစိုတ်ကဵုသေနာတ်ဂှ်တုဲ ကလိဂွံလဝ်ဝပ် ပ္ဍဲကဵုသြိုဟ်တုဲ ချိုတ်အာလဝ် ပ္ဍဲဒၞါဲဒှ်ပရူဂှ်ရ။
ညးမဒှ်ကော ဥူဇြေယျာအံၚ် က္ဍိုပ်သ္ကိုပ်ပၞာန်မၚ်ကွာန် မချိုတ်အာဂှ်ဝွံ ဒဒှ်ရဒှ်သ္ကိုပ်ဗ္ဒိုပ်မွဲတၠဂှ်ကီု၊ ညးဝွံ ပ္ဍဲကဵုက္ဍိုပ်သ္ကိုပ်ပၞာန်မၚ်ကွာန် ဍုၚ်ဒုၚ်သယိတ်ဂှ် ဒှ်ညးပါလဝ်မွဲတၠရောၚ် ဂွံတီကေတ် ဇရေၚ်ညးဒေသတံရ။
တုဲကၠုၚ် ပ္ဍဲဂိတုနဝ်ဝေမ်ဗာ ၂၀ တေံဂှ်လေဝ် ညးဍုၚ်ကွာန်ကောန်အရာပ်မွဲတၠ ဗ္ဒါဲကွာန်ဝါဒက်ကွေန် ဍုၚ်ဒုၚ်သယိတ်ဂှ် ဒးဒုၚ်ပန်ဂစိုတ်လဝ်တုဲ စပ်ကဵုလၟေၚ်ဒဒှ်ဏံတုဲ ညးစောဲစပ်အဲ အဲစောဲစပ်ညးသၟးတုဲ ညးတၠဒုဟ်ဂှ်ဟွံမံက် ဒှ်ဒၟံၚ်ရ။
ပရိုၚ်−သြၚ်လောန်တိုၚ်(မ်)
ဗီု−CJ