ရေဝ်၊ ဒဳဇြေမ်ဗာ ၇
တွဵုရးဍုၚ်မန် ပွိုၚ်ဍုၚ်ရေဝ် ပ္ဍဲကဵုကွာန်အစေန်ဂှ် ဟိုတ်နူဂကောံပၞာန်မၚ်ကွာန် သၟဝ်တဲကံၚ်ဇြဳပၞာန်တံ ပန်ပှော်တံဂှ်တုဲ ညးဗြဴမၞုံကဵုယဲဒိုက် ဒးသေနာတ် ကလိဂွံအာလဝ်ဝပ်ဂှ်ဝွံ အခိၚ်ဒုၚ်လွဳလွတ်ဒၟံၚ်ဂှ် ချိုတ်အာလဝ်ရောၚ် ညးဒေသတံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
တုဲကၠုၚ် ပ္ဍဲဂိတုနဝ်ဝေမ်ဗာ ၂၅ တေံ ဂကောံပၞာန်မၚ်ကွာန် နူကဵုသၞေဟ်ကၚ်ကွာန်အစေန် အခိၚ်ဗက်ပန်ရပ်ဒက်လဝ် သၟတ်ပန်တၠ မဍိုက်ကၠုၚ်ကွဳလိုန်ဓာတ်ၜါဖ္ဍိုက်ဂှ် ဒးအာလဝ် ဒဝ်ဝေဝေနှေန် အာယုက် ၃၀ ပြၚ် မၞုံကဵုယဲဒိုက်မသုန်ဂိတု နွံဒၟံၚ်သ္ကဲဂၠံၚ်ဂှ်ရ။
ကြဴနူဂှ်တုဲ ဒဝ်ဝေဝေနှေန် သီုကဵုယဲဒိုက် မကလိဂွံအာလဝ်ဝပ် ပ္ဍဲဇိုၚ်ဂၞိၚ်ဂှ် နူကဵုရုၚ်ဂဥုဲညးဍုၚ်ကွာန်ပွိုၚ်ဍုၚ်ရေဝ် အခိၚ်ပြံၚ်လွဳ ပ္ဍဲရုၚ်ဂဥုဲမတ်မလီုဂှ် ပ္ဍဲဂိတုဒဳဇြေမ်ဗာ ၁ ဂှ် ဒးထောံအာလဝ်ရ။
ပ္ဍဲဒဝ်ဝေဝေနှေန် မဒးပြဟ်လလုဲအာလဝ် သီုကဵုယဲဒိုက်ဂှ် ကောန်တြုံ အာယုက်ပိသၞာံမွဲတၠကဵု ကောန်ဝုတ် မွဲသၞာံပြၚ်မွဲတၠ ကေုာံ ညးမဒှ်တၠသ္ၚိတံ သှ်ေၜက်ဒၟံၚ်ရ။
ညးဗြဴမၞုံကဵုယဲဒိုက်ဂှ် ဒးပြဟ်လလုဲအာကီုလေဝ် လ္ပာ်ကံၚ်ဇြဳပၞာန် ကေတ်အရေဝ် ကုဂကောံပၞာန်မၚ်ကွာန် မပန်ပှော်ကလိလောန်လဝ်တံဂှ် ဟွံမွဲတုဲ မၚ်ဒၟံၚ်သၞေဟ်ကၚ် ပ္ဍဲသၞေဟ်ကၚ်ကွာန်အစေန်ဂှ် အတိုၚ်တြေံရဂှ် ညးဒေသတံ ဟီုရ။
တုဲကၠုၚ် ပ္ဍဲဂိတုမာတ်ဂှ်လေဝ် ပ္ဍဲကဵုသၞေဟ်ကၚ်ဂီုကၠီုဒဒန် ကွာန်အစေန်ဂှ် ဟိုတ်နူဟွံဒေါအ်ကဵုကွဳလိုန်ဓာတ်ဂးတုဲ ဒပ်ကံၚ်ဇြဳပၞာန်တံ ပန်ပှော်ကၠုၚ်ဂှ်တုဲ မၞိဟ်တြုံဒေသမွဲတၠ ဒးသၞာတ်ကလိဂွံအာလဝ်ဝပ်တုဲ ချိုတ်အာလဝ်ရ။
အတိုၚ်လိက်ဒုၚ်စဳရေၚ် သမဂ္ဂညးဗြဴဍုၚ်ဗၟာ BWU မလလောၚ်ပ္တိတ်လဝ် ပ္ဍဲဂိတုဒဳဇြေမ်ဗာ ၅ ဂှ်မ္ဂး အပ္ဍဲဂိတုနဝ်ဝေမ်ဗာ ပွိုၚ်မွဲဂိတုတုဲကၠုၚ်တေံဂှ် အလုံဍုၚ်မွဲ ဟိုတ်နူပရေၚ်ဗ္တိုက် နူကဵုကံၚ်ဇြဳပၞာန်တံဂှ်တုဲ မၞိဟ်ဗြဴ ၆၁ တၠ ချိုတ်အာလဝ်ရ။
ပရိုၚ်−သြၚ်လောန်တိုၚ်(မ်)
ဗီု−CJ