မတ်မလီု၊ ဒဳဇြေမ်ဗာ ၆
ပ္ဍဲတွဵုရးဍုၚ်မန် စနူဂိတုဒဳဇြေမ်ဗာ သတ္တာဟပထမဏံတုဲ ကြပ်စၟအ်အ်ဍုၚ်ဂှ် ပၟတ်ဓာတ်လလဳပိုတ်ကၠုၚ်တံ သာပရေံစှ်ေကၠုၚ်တုဲ ပ္ဍဲကွာန်လ္ၚဵုတံဂှ်တှ်ေ မွဲတ္ၚဲ ဂွံမံၚ်ပၟတ် ၜိုတ်ပွိုၚ်ပိနာဍဳရဂှ် ညးဒေသတံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ပ္ဍဲဂိတုတုဲကၠုၚ်တေံဂှ်တှ်ေ အရာပ်လ္တူဍုၚ်တံ ကလိဂွံလဝ်ပၟတ် နကဵုသၞောတ်ဒးအလန်ဂှ် မွဲတ္ၚဲ ၜိုတ်ပွိုၚ် ၁၀ နာဍဳဂှ် လၟုဟ် မွဲတ္ၚဲဂှ် ဂွံကၠုၚ်ဒၟံၚ်ပၟတ် ၜိုတ်ပွိုၚ် ၆ နာဍဳဓဝ်ရ။
သ္အာၚ်နူဂှ်ပၠန် ပ္ဍဲအရာတြးကဵုပၟတ်ဓာတ်လလဳတံဂှ်လေဝ် မွဲတ္ၚဲဂှ် ၜိုတ် ၂ နာဍဳဓဝ်ဟေၚ် တြးကဵုဒၟံၚ်တုဲ ဒးဂဗဒၟံၚ်ကဵု ပၟတ်ဓာတ်လလဳပိုတ် အခိၚ်ဗွဲမလအ်လရ။
ပၟတ်ပိုတ်ကၠုၚ်ဒၟံၚ် အခိၚ်ဗွဲမလအ်လကီုလေဝ် လ္ပာ်ဌာနတြးပၟတ်ဓာတ်လလဳ ကံၚ်ဇြဳပၞာန်ဂှ်တှ်ေ ဒဵုကဵုအခိၚ်လၟုဟ် လလောၚ်ပ္တိတ်ကဵုလဝ်သမ္တီ မမိက်ကဵုမွဲမွဲဂှ် ဟွံမွဲဏီရ။
ညးဒေသမွဲတၠဂှ်တှ်ေ ဟိုတ်နူပၟတ် ထပ်ပိုတ်ကၠုၚ်ဒၟံၚ် အခိၚ်ဗွဲမလအ်လဂှ်တုဲ စနူကဵုဂွံဍုန်ပုၚ်ဂှ် ဒးဆေၚ်ဒၟံၚ်မုက်ကဵု အခက်အခုဲနာနာသာ်ရောၚ် ဟီုရ။
“ပၟတ်ကၠုၚ်ဂှ်တှ်ေ ၜိုတ်မွဲနာဍဳ ၜါနာဍဳရဏောၚ်။ အခိၚ်ပိုတ်ပၠိုတ်ဂှ် ၜိုတ် ၅ နာဍဳ ၆ နာဍဳနွံဏောၚ်။ တၚ်အခက်အခုဲဂှ်တှ်ေ ဘာကောန်ၚာ်တံ ဂွံပလံၚ်ပုၚ်ဂွဳတံ မုတံတှ်ေ အခက်အခုဲနွံရ။ ပယျာံဂယးဟီုမ္ဂးလေဝ် ပုၚ်ဂွဳဟွံဂတာပ်တုဲ ဒးရာန်ဍုန်ကဵုချး၊ ချးမွဲထုပ်ဂှ်လေဝ် ဒှ်ဒၟံၚ် ၂၀၀၀ ယျဏောၚ်။ ၚုဟ်မဳတာဂှ်လေဝ် တိုန်။ ပၟတ်ဂှ်တှ်ေ အတိုၚ်ဏံရ” သာ်ဝွံ သ္ဂးရ။
သ္အာၚ်နူဂှ်ပၠန် အခိၚ်ကဵုပၟတ်ဂှ် ကဵုလဝ်သမ္တီ ကုညးဍုၚ်ကွာန်တံ နကဵုစရၚ်အခိၚ်တံကီုလေဝ် လၟုဟ်ဂှ် အခိၚ်မိက်ဂွံကဵုဂှ်ကဵုကၠုၚ် ဟွံမွဲကဵုအခိၚ်ချိုတ်တ်ပၠိုတ်တ်တံဂှ်တုဲ မ္ၚးနူကဵုဍုန်တိုပ်ဂှ် ဇီုကပိုက်ကၠုၚ်ကဵု သီုဘဝပရေၚ်ပိုန်ဒြပ်ပရေၚ်မၞိဟ်တံဏောၚ်ဂှ် ညးဆက်ဟီုရ။
တၠကမၠောန်ပရေၚ်ပိုန်ဒြပ်မွဲတၠဂှ်လေဝ် ဟိုတ်နူပၟတ်ဓာတ်လလဳ ပိုတ်ဂၠိုၚ်ကၠုၚ်တုဲ ကမၠောန်ဂွံဂေတ်ဂြိပ်ဂှ် ဒးသ္ပပဓာန်ဒၟံၚ်ကဵု စက်ပၟတ် အဓိကဂှ် ဟီုရ။
“နူတမ်ဝါဒိတေံရ ဟွံဂွံမံၚ်ပၟတ်ဓာတ်လလဳဂှ် လအ်ဒၟံၚ်ယျ။ ဟွံဂွံပၟတ်လအ်ကၠုၚ်တုဲ ဗီုပြၚ်မၞိဟ်တံကၠောန်ၜိုတ်ဂှ်တှ်ေ ဒှ်အာအတိုၚ်တြေံပၠန်ရ။ နူကဵုကေၚ်ဂွံလဝ်ဂှ် လၟုဟ်ဟွံဂွံဟွံသေၚ်။ ဟွံဂွံဂှ် ဟွံဂွံရတုဲ ဍေံဟွံတၟေၚ်တၟဟ်ပုဟ်။ ပၟတ်ဟွံဂွံတုဲ မၞိဟ်တံဂှ်တှ်ေ ဗွဲမဂၠိုၚ် ကမၠောန်ဏံဂွံဂေတ်ဂြိပ်ဂှ် ဒးဂေတ်ဂြိပ်ဒၟံၚ်ကဵု ကၠေၚ်စက်ရဏောၚ်” သာ်ဝွံ သ္ဂးရ။
ဟိုတ်နူဟွံဂွံပၟတ်ဓာတ်လလဳတုဲ ကမၠောန်ဂမၠိုၚ် ဒးဂေတ်ဂြိပ်ဒၟံၚ်ကဵု စက်ပၟတ်ဇၞော်တံဂှ်တုဲ ခရိတ်ကၠောန်ပ္တိတ်တံ သာသၠုၚ်တိုန်ကၠုၚ်တုဲ ညးရပ်စပ်စသုၚ်တံ သာဇီုကပိုက်ဂိကၠုၚ် ဂၠိုၚ်ကၠုၚ်မာန်ဂှ် ညးဆက်ဟီုရ။
မွဲလ္ပာ်ဂှ်ပၠန် ကံၚ်ဇြဳပၞာန်ဝွံ သၠုၚ်ပ္တိုန်ကဆံၚ် လာၚ်ဇြဟတ်ဓာတ်တံ၊ ရုၚ်စက်ကဵုဇြဟတ်ဓာတ်တံကီု၊ သၠဲပ္တိုန်ဒက်ပ္တန်တုဲ အရာမပြုပြေၚ်ပလေဝ်လေတ်တံဂှ် ဒးရေၚ်တၠုၚ်ဒၟံၚ် နကဵုပရေၚ်ဓလိုက်တမ်ရိုဟ် အပ္ဍဲဍုၚ်၊ မ္ၚးဍုၚ်တံဂှ်တုဲ နကဵုဟိုတ် ခရိတ်ကၠောန်ပ္တိတ်တံ သၠုၚ်ဂှ် စနူဂိတုသေပ်တေမ်ဗာ ၁ တုဲကၠုၚ်တေံတုဲ ကံက်သၠုၚ်ပ္တိုန်လဝ် ၚုဟ်မဳတာ ကြပ်ၜါဆရ။
အတိုၚ်တၚ်လလောၚ်တြး ဌာနပၟတ်ဓာတ်လလဳကံၚ်ဇြဳပၞာန် မလလောၚ်ပ္တိတ်လဝ် ပ္ဍဲဂိတုမေ ၁ တေံဂှ်မ္ဂး အလုံဍုၚ်မွဲ နွံပၟိက်ဒၟံၚ်ကဵု ဇြဟတ်ဓာတ်လလဳဂှ်ဝွံ ၅၅၀၀ မဂ္ဂါဝပ်နွံတုဲ နတဲဏံဂှ်တှ်ေ မွဲတ္ၚဲဂှ် ၜိုတ် ၂၈၀၀ မဂ္ဂါဝပ်ရ ကၠောန်ပ္တိတ်မာန်တုဲ တၚ်နွံပၟိက်ဇြဟတ်ဓာတ်လလဳ ၜိုတ် ၅၀ တၟံကၠံရဟေၚ် ကဵုပၟတ်ဓာတ်လလဳမာန်ဂှ် သ္ဂးရ။
ပ္ဍဲတွဵုရးဍုၚ်မန်ဂှ်တှ်ေ ဂွံမံၚ်ပၟတ်ဓာတ်လလဳဂှ်ဝွံ နူလက်ထက်အလဵုအသဳတုဲကၠုၚ်တေံဂှ် နူကဵုဂွံကၠုၚ်မံၚ်လၟေၚ်တ္ၚဲဂှ် ကြဴနူဒပ်ပၞာန်သီအဝဵုတုဲ ပၟတ်ဓာတ်လလဳဂှ် ဟွံဂွံလၟေၚ်ၚ်ရတုဲ ဂွံကၠုၚ်ပၟတ်ကဵုသ္ကုတ်အခိၚ်ဂှ်လေဝ် ဒှ်ဒၟံၚ်အကာဲအရာဟွံချိုတ်ပၠိုတ်တံရ။
ပရိုၚ်−သြၚ်လောန်တိုၚ်(မ်)
ဗီု−CJ