ဘာပန်၊ ဒဳဇြေမ်ဗာ ၈
တွဵုရးကရေၚ် ပ္ဍဲခရိုၚ်ဘာပန်ဂှ် အပ္ဍဲဂိတုနဝ်ဝေမ်ဗာတုဲကၠုၚ်တေံ ဗ္တိုက်သီဂွံလဝ် ဗ္ဒိုပ်ဒပ်ကံၚ်ဇြဳပၞာန်ၜါဗ္ဒိုပ်တုဲ ကုကောန်ဒပ်ကံၚ်ဇြဳပၞာန် မဂြိပ်တိတ်ကၠုၚ်တံဂှ် ဗက်ဗ္တိုက်လၞိန်ဗပိန်ဒၟံၚ်ရောၚ် ဂွံတီကေတ် ဇရေၚ်ခရိုၚ်ဘာပန် KNU ရ။
အပ္ဍဲဂိတုနဝ်ဝေမ်ဗာပွိုၚ်မွဲဂိတုတုဲကၠုၚ်တေံ ပ္ဍဲတိဍာ်ဒပ်မဟာ ၅ ခရိုၚ်ဘာပန် KNU ဂှ် အကြာဒပ်ကံၚ်ဇြဳပၞာန်ကဵု ဒပ်ပံၚ်ကောံပၠန်ဂတး KNLA တံဂှ် ပေါဲဗ္တိုက်အပံၚ် က္တဵုဒှ်လဝ် စဵုကဵု ၄၃ ဝါတုဲ လ္ပာ်ဒပ်ကံၚ်ဇြဳပၞာန် ၈၈ တၠ ချိုတ်အာလဝ်တုဲ ၁၃ တၠ ကလိဂွံလဝ်ဝပ်ရောၚ် ခရိုၚ်ဘာပန် KNU လလောၚ်ပ္တိတ်လဝ်ပရိုၚ်ရ။
ပ္ဍဲကဵုကောန်ဒပ်ကံၚ်ဇြဳပၞာန် မချိုတ်အာတံဂှ် သ္ကိုပ်တမ်ဒပ် ၁ တၠ၊ ဒုသ္ကိုပ်တမ်ဒပ် ၁ တၠ ပါလုပ်တုဲ ဗ္ဒိုပ်ဒပ်ကံၚ်ဇြဳပၞာန် ဗ္ဒိုပ်မထဝ်ကဵု ဗ္ဒိုပ်ကူသုက်တံဂှ် ဒပ်ပံၚ်ကောံပၠန်ဂတး KNLA တံ သီဂွံလဝ်ရ။
ကောန်ဒပ်ကံၚ်ဇြဳပၞာန် ဂြိပ်တိတ်အာ အပ္ဍဲပေါဲဗ္တိုက်သီဗ္ဒိုပ်မထဝ်တံဂှ် နူဒပ်ပံၚ်ကောံပၠန်ဂတး KNLA တံ ကာလဗက်လၞိန်ဗပိန်ဗ္တိုက်ကၠုၚ်ဂှ် ပေါဲဗ္တိုက်ဆေၚ်မုက်ၜါလ္ပာ်တံ က္တဵုဒှ်ဒၟံၚ် လၟေၚ်ဒဒှ်တ္ၚဲတုဲ လ္ပာ်ဒပ်ကံၚ်ဇြဳပၞာန် ချိုတ်အာ မွဲတုဲမွဲတုဲ ဇြဟတ်အောန်စှ်ေကၠုၚ်ဒၟံၚ်ဂှ် ညးမၞုံအခေါၚ်ဟီုဂး ဒပ်မဟာ ၅ KNU သ္ကိုပ်ဗိုလ်ဇၞော် သဝ်ကလာဒိုဝ် ဟီုဂးလဝ်ရ။
ပ္ဍဲတိဍာ်ဒပ်မဟာ ၅ ခရိုၚ်ဘာပန် KNU ဂှ် ဒပ်ပံၚ်ကောံပၠန်ဂတးတံ ဆက်ဗိုၚ်ကၟာတ်လဒဵုလဝ် ဗ္ဒိုပ်ဗျူဟာဘာပန် ဒပ်ကံၚ်ဇြဳပၞာန်တံဂှ်တုဲ နူကဵုဗျူဟာကမမံၚ် မွဲကဆံၚ် ဒပ်ကံၚ်ဇြဳပၞာန်တံ သွက်ဂွံပလံၚ်ကဵုပၞာန်ရီု လ္ပာ်ဒေသကတိုၚ်တိ၊ ဗ္ဒိုပ်ဒဵုပိမတံဂှ် ပ္တိတ်ဇြဟတ်ကၠောန်ကၠုၚ်တုဲ ဒးဒုၚ်ဗ္တိုက်လဝ်ကဵု ဒပ်ပံၚ်ကောံတံရ။
ပ္ဍဲခရိုၚ်ဘာပန်ဂှ် အပ္ဍဲပေါဲဗ္တိုက်က္တဵုဒှ်ဒၟံၚ်ဂှ် ဒပ်ကံၚ်ဇြဳပၞာန် ရပ်စပ်စကာပၞာန်ကျာအဓိကတုဲ ဘိုၚ်ပန်ကဵုလဝ်တုဲ ဇွောံမစၞစတံဂှ်လေဝ် ပလံၚ်ဗစိုပ်လဝ်ကဵု နူတရဴကျာတုဲ ပ္ဍဲကွာန်ဒၞါဲညးဍုၚ်ကွာန်တံ မံၚ်တန်တဴတံဂှ်လေဝ် ဒပ်ကံၚ်ဇြဳပၞာန် ပန်ပှော်လဝ်ကဵုလွဟ်ဇၞော် ကေုာံ ပၞာန်ကျာတံဂှ်ရ ကောန်အရာပ်မွဲတၠ ဇီုကပိုက်ကလိဂွံလဝ်ဝပ်ဂှ် ခရိုၚ်မူဒြဝ် KNU လလောင်ပ္တိတ်လဝ်ရ။
ဟိုတ်နူအကာဲအရာပရေၚ်ပၞာန်ၜါလ္ပာ် မက္တဵုဒှ်ဒၟံၚ် အပ္ဍဲဒေသကတိုၚ်တိ ခရိုၚ်ဘာပန်ဂှ်တုဲ ပ္ဍဲဂိတုဒဳဇြေမ်ဗာ ပြဟ်ဟ်တေံ ညးဍုၚ်ကွာန်ဒေသ နူကဵုကွာန်ကတိုၚ်တိ၊ ကွာန်(ဘောကြိုလယ်) တံဂှ်ဝွံ ဂြိပ်ဒဴပါဲဒလေတ်ကၠုၚ် လ္ပာ်ကတိုၚ်တိသ္ကုတ်သၟဝ် ဍုၚ်ကမမံၚ်ကဵု ဒေသတၞဟ်ဟ်တံဂှ် ဂွံတီကေတ် အတိုၚ်ဂလာန်ညးဒေသကမမံၚ်တံရ။
ပရိုၚ်−သြၚ်လောန်တိုၚ်(မ်)
ဗီု−KNU