သဓီု၊ ဒဳဇြေမ်ဗာ ၁၀
ပ္ဍဲတွဵုရးဍုၚ်မန်ဂှ် အပ္ဍဲအကြာတ္ၚဲတံဏံ နကဵုတၚ်စောဲစပ်ဖံက်ပ္ကဝ်အမိၚ်ဒေသန္တရဂှ် ညးဒေသ ဟွံအောန်နူကဵု ၆၀ ဒးဒုၚ်ရပ်လဝ်တုဲ ပ္ဍဲကဵုဏံ သၟတ်လ္ၚဵု ဒးဒုၚ်ကော်ပကောံပလဝ်ကောန်ပၞာန်ရောၚ် ဂွံတီကေတ် ဇရေၚ်ညးမစုက်လုက်ကဵု ဒပ်ဗၠာဲသၟိၚ်တံရ။
ကံၚ်ဇြဳပၞာန်ဝွံ စနူဂိတုဒဳဇြေမ်ဗာ စၟတ်တ္ၚဲ ၆ ဂှ်တုဲ ပ္ဍဲကဵုပွိုၚ်ဍုၚ် ခရိုၚ်သဓီု မပ္တံကဵုပွိုၚ်ဍုၚ်ကျာ်ထဝ်၊ ပွိုၚ်ဍုၚ်ၜဳကလေၚ်၊ ပွိုၚ်ဍုၚ်သဓီု ကေုာံ ပွိုၚ်ဍုၚ်ပံၚ်တံဂှ် နဒဒှ်ကိုန်အစဳဇန်မွဲ ရပ်ဒက်ကၠုၚ်ဒၟံၚ် မၞိဟ်တြုံၜါတၠ ဍိုက်ကွဳလိုန်ဓာတ်တုပ်ပ်တံဂှ်ရ။
ပ္ဍဲအရာရပ်ဒက်သာ်ဏံဂှ် ဂၠံၚ်လုပ်တိတ်ဍုၚ်တံကဵု ဒၞါဲဂၠံၚ်ပိပန်သွာၚ်တံဂှ် ပရေၚ်မၞိဟ်တြုံၜါတၠ ဍိုက်ကွဳလိုန်ဓာတ်တုပ်ပ်တံဂှ် ဒပ်ပံၚ်ကောံ ဒပ်ပၞာန် ကေုာံ ဒပ်ဗၠာဲသၟိၚ်တံ စၟဳတ်သၟာန်သၟုက်ကၠုၚ်ဟွံမွဲတုဲ ရပ်ကော်ဏာ မွဲတဲဓဝ်ရ။
ပ္ဍဲကဵုညးဒးဒုၚ်ရပ်ဂမၠိုၚ် ညးမစုက်လုက်ကဵု တၠကမၠောန်ပရေၚ်ပိုန်ဒြပ်တံ၊ ညးမစုက်လုက်ကဵုကံၚ်ဇြဳပၞာန်တံ၊ ညးကဵုသြန်မာန်တံဂှ်တှ်ေ အာတ်မိက်ကၠုၚ်သြန် ကဵုစှော်ကိုဋ်တုဲ ကလေၚ်ဗလးကဵုဒၟံၚ်ဂှ် ညးမစုက်လုက်ကဵု ဒပ်ဗၠာဲသၟိၚ်မွဲတၠ ဟီုရ။
ဆ္ဂး ညးကဵုလှုဲဟွံမာန်တံ၊ ညးဟွံဂွံအဆက်ကဵုဂြောဝ်ဂတာတံဂှ်တှ်ေ ရပ်ဏာသွက်ဂွံလုပ်ပၞာန်တုဲ ပလံၚ်ဗစိုပ်ဏာဒၟံၚ် ဇရေၚ်ဒပ်ပကောံကောန်ပၞာန်တံ လွာဲဂှ်ရောၚ် သ္ဂးရ။
နကဵုအစဳဇန်ပွိုၚ်မွဲဂိတု သွက်ဂွံရပ်စပ်ကေတ်အာအရေဝ် ကုညးမဖံက်ပ္ကဝ်အမိၚ်ဒေသန္တရတံ နွံဒၟံၚ်ဂှ်တုဲ နကဵုသၟတ်ဂမၠိုၚ် အခိၚ်ဗ္တံ လ္ပတိတ်မ္ၚး လ္ပအာကၠုၚ်အိုတ်ဂှ် ညးတာလျိုၚ်ကံၚ်ဇြဳပၞာန် ဟွံမိက်ထ္မံက်ယၟုဂှ် ဖ္တိုက်ဖ္အောဝ်လဝ်ရ။
ပ္ဍဲကဵုပွိုၚ်ဍုၚ် မၞုံပ္ဍဲခရိုၚ်သဓီုတံဂှ် ကံၚ်ဇြဳပၞာန် လလောၚ်ပ္တိတ်လဝ် အမိၚ်ဒေသန္တရ မၞိဟ်တြုံၜါတၠ ဍိုက်ကွဳလိုန်ဓာတ်တုပ်ပ်ဟွံဂွံဂှ်ကဵု အမိၚ်တိတ်ဗ္တံဟွံဂွံတံရ။
ပရိုၚ်−သြၚ်လောန်တိုၚ်(မ်)
ဗီု−CJ