ထဝါဲ၊ ဒဳဇြေမ်ဗာ ၁၀
ဒပ်ကံၚ်ဇြဳပၞာန် ထ္ပက်ကၠုၚ်ကရောၚ်ပၞာန် ပ္ဍဲဂကောံကွာန်မံၚ်မေဝ်ယှံၚ် ပွိုၚ်ဍုၚ်ထဝါဲ ရးတၞၚ်သဳဂှ်ဝွံ ဖံက်ခတိုဟ်လဝ်မာၚ် ပလီုလဝ် ဒဒန်မဆက်စၠောံလဝ်အကြာကွာန်ၜါ မွဲတၞုၚ်ဂှ် ဂွံတီကေတ် ဇရေၚ်ညးဒေသတံကဵု ဂကောံဇြဟတ်ပၠန်ဂတးတံရ။
ကရောၚ်ပၞာန်ကံၚ်ဇြဳပၞာန်ဝွံ စနူတ္ၚဲအကြာတံဏံတုဲ ထ္ပက်ကရောၚ်ပၞာန်လုပ်စိုပ်ကၠုၚ် ပ္ဍဲဂကောံကွာန်မံၚ်မေဝ်ယှံၚ်ဂှ်တုဲ ပ္ဍဲဂိတုဒဳဇြေမ်ဗာ စၟတ်တ္ၚဲ ၇ ပယျာံလဒေါဝ်တ္ၚဲဂှ် ဖံက်ခတိုဟ်လဝ်မာၚ်ပလီုလဝ် ဒဒန် (ကင်းကုန်း) နွံအကြာကွာန်မံၚ်မေဝ်ယှံၚ်ကဵု ကွာန်ယျေဝိုၚ်တံဂှ်ရ။
ဒဒန်ဒးဒုၚ်ဖံက်ခတိုဟ်မာၚ် ဒးဒုၚ်ပလီုလဝ်ဂှ်ဝွံ ဇမၠိၚ်နွံ ၁၅၀ ဟတ်ပြၚ် မဒှ်ဒဒန်လးလဝ်ဆု နကဵုသိၚ်ဗိုၚ်ပသဲဂှ်တုဲ သွက်ညးဒေသ ဂကောံကွာန်မံၚ်မေဝ်ယှံၚ်တံဂှ်တှ်ေ ဒှ်ဒဒန်ပၟိက်ဇၞော် သွက်ပရေၚ်အာကၠုၚ်မွဲတၞုၚ်ရ။
အတိုၚ်ဂလာန် ညးတြုံဒေသ ဟွံမိက်ထၟံက်ယၟုမွဲတၠဂှ်မ္ဂး ဒဒန်ပၟိက်ဇၞော်မွဲတၞုၚ် သွက်ညးဒေသတံ ဒးဒုၚ်ပလီုလဝ်တုဲ သွက်ပရေၚ်အာကၠုၚ်တံကဵု ပရေၚ်စသုၚ်မံၚ်စံၚ်တံဂှ် သာတုဲဒှ်ကၠုၚ်အခက်အခုဲဂှ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ကောန်ဒပ်ကံၚ်ဇြဳပၞာန်တံဝွံ ကြဴနူဖံက်ခတိုဟ်မာၚ် ပလီုကၠေံ ဒဒန်(ကင်းကုန်း) ဂှ်တုဲ ဂွံၜိုတ်မွဲနာဍဳဂှ် စံၚ်ပလီုလဝ် သ္ၚိပ္ဍဲကွာန် (ကင်းကုန်း) မွဲမတုဲ ပၟတ်ဂဵုထၞာန်တိုန်ကၠုၚ်ဂှ် ဂွံညာတ်ကေတ် နူကဵုလ္တူဒဵုဂှ်ရောၚ် သ္ဂးရ။
ဒပ်ကံၚ်ဇြဳပၞာန်ဝွံ ထ္ပက်ဒၟံၚ်ကရောၚ်ပၞာန် ပ္ဍဲဂကောံကွာန်မံၚ်မေဝ်ယှံၚ်ဂှ်တုဲ သ္ၚိဒၟံၚ်နူကဵုကွာန် (ပဒိုင်းချောင်း၊ ကင်းကုန်း၊ ရေဝိုင်း ကေုာံ ခေါင်တိုင်ပြင်) တံဂှ် တက်ပလီုတုဲ ကပေါတ်ကညောတ်မၞုံကဵုၚုဟ်မးတံဂှ် ယိုက်ကေတ်ဏာ နကဵုကွဳစက် ယိုက်ဏာ လ္ပာ်စကခ ၈ ဖျေံသ္ဇိုၚ်ထဝါဲဂှ်ရောၚ် သ္ဂးရ။
အခိၚ်လၟုဟ်ဂှ်လေဝ် ဒပ်ကံၚ်ဇြဳပၞာန်ဝွံ ပါ်ကရောၚ်ပၞာန်ပိတုဲ ဆက်ထ္ပက်ကရောၚ်ပၞာန် ချဳဒရာၚ်ဒၟံၚ် နကဵုဒြဟတ်လၟိဟ်ဗွဲမဂၠိုၚ်ဂၠေၚ်ဂှ်တုဲ ညးဒေသ နူကဵုကွာန် (ပဒိုင်ချောင်း၊ ခေါင်တိုင်ပြင်၊ ကင်းကုန်း၊ ရေဝိုင်း ကေုာံ ပခတ်အင်း) တံဝွံ ဒးဂြိပ်ဒဴပါဲဒလေတ်ဒၟံၚ် ဒၞါဲဗၠးဘဲတံရ။
ပပ္တံနူတမ်သၞာံ သၞာံဏံဂှ်တုဲ ဒပ်ကံၚ်ဇြဳပၞာန် ထ္ပက်ကရောၚ်ပၞာန် ပ္ဍဲကွာန်မံၚ်မေဝ်ယှံၚ်တုဲ ဖျေံဒပ်မံၚ်ဒၟံၚ်ဂှ်ဝွံ ပ္ဍဲဂိတုအဝ်ဂါတ်ကဵု ပ္ဍဲဂိတုသေပ်တေမ်ဗာဂှ်လေဝ် ပလီုလဝ်ဒဒန်ၜါတၞုၚ် နူကဵုကွာန်မံၚ်မေဝ်ယှံၚ်ဂှ် ဂွံတီကေတ်ရ။
ပရိုၚ်−သြၚ်လောန်တိုၚ်(မ်)
ဗီု−CJ