နေဗျဳဒဝ်၊ ဒဳဇြေမ်ဗာ ၁၀
ပ္ဍဲပေါဲရုဲမာဲ မကၠောန်ဗဒှ်အာ သၞာံဂတဏံဂှ် ကံၚ်ဇြဳပၞာန် မပ္တိတ်ဒၟံၚ်ဒြဟတ် သ္ဂောံဂွံထံက်ဂလာန်ဍုၚ်သ္အာၚ်ဂှ် ကဵုအာအခေါၚ် ဂကောံလ္ၚတ်မၚ်ရံၚ် အပ္ဍဲဍုၚ်၊ မ္ၚးဍုၚ်တံ ဗွဲမဗဗွဲကဵုသၞောဝ်အစာံတံဂှ်ဏောၚ်ဂှ် ကဝ်မယှေန်ပေါဲရုဲမာဲ ဟီုကၠုၚ်ရ။
ပ္ဍဲဂိတုဒဳဇြေမ်ဗာ ၇ တေံ အခိၚ်ကဝ်မယှေန်ပေါဲရုဲမာဲကၟိန်ဍုၚ် ကံၚ်ဇြဳပၞာန်ခါန်ကၞက်လဝ်ဂှ်ကဵု ဗော်ပရေၚ်ဍုၚ်ကွာန် ဂွံလဝ်အခေါၚ်ဒက်ပ္တန်ဗော် ၅၀ ပြၚ်တံ ဆဵုဂဗညးသ္ကအ်ဂှ် ဥက္ကဌကဝ်မယှေန် ဥူကိုဝ်ဝ် ဟီုစုတ်လဝ်ရ။
ညံၚ်ဂွံဒှ်ပေါဲရုဲမာဲ မၞုံကဵုပရေၚ်ကၠးမှးမွဲဂှ် ကော်ဘိက်အာ ဂကောံလ္ၚတ် နူဍုၚ်သ္အာၚ်တံဏောၚ်ဂှ် က္ဍိုပ်သ္ကိုပ်ပၞာန် ကြဴနူစန်ဒက်လဝ် အပ္ဍဲလၟေၚ်တရဴဍုၚ်ကြုက်တုဲဂှ် ကမ္မယှေန်ပေါဲရုဲမာဲ ဟီုပ္တိတ်ကၠုၚ်လဝ် သာ်ဏံရ။
နကဵုဂကောံမၚ်လ္ၚတ် အပ္ဍဲဍုၚ်မ္ၚးဍုၚ်ဂမၠိုၚ်ဂှ်တှ်ေ တၚ်နၚ်မကဵုလဝ်အခေါၚ်လ္ၚတ်မၚ်ရံၚ် ပ္ဍဲပေါဲရုဲမာဲသၞာံ ၂၀၁၅ တေံဂှ် ကလေၚ်စုတ်တုဲ ကဵုအာအခေါၚ် ပ္ဍဲပေါဲရုဲမာဲ သၞာံဂတဏံဏောၚ်ဂှ် သ္ဂးရ။
သၞောဝ်ပေါဲရုဲမာဲ၊ နဲသၞောဝ်ဥပဒေ၊ လၟေၚ်ကမၠောန်ဂမၠိုၚ်၊ တၚ်စၞောန်၊ အမိၚ်ဂမၠိုၚ်၊ တက်ပ္တိတ်စၟတ်တဲမာဲတံ၊ စၟဳတ်သ္ဂုတ်သွာတ် ဂဗုတ်ဒစဵုဒစးပေါဲရုဲမာဲတံ ဒှ်တမ် တၚ်နၚ်တံဏံဂှ် ကဵုအခေါၚ်လ္ၚတ်မၚ်ရံၚ်အာဏောၚ် မဒှ်ရ။
ညးလ္ၚတ်မၚ်ရံၚ်ပေါဲရုဲမာဲမွဲတၠဂှ် အခိၚ်သၞောဝ်စပ်ကဵုပေါဲရုဲမာဲ၊ နဲသၞောဝ်ဥပဒေ ကေုာံ သၞောတ်မသ္ဂောံဒ္ဂေတ်ဗက်အာတံ အခိၚ်ပရေၚ်ကၠးမှးဟွံမွဲဏီဂှ် ကဵုအခေါၚ်ညးလ္ၚတ်မၚ်ရံၚ်တံ သာ်ဏံဂှ်ဝွံ ဒှ်ဒၟံၚ်ဗီုပြၚ် ဟီုလဝ်ဆၜိုတ်ဒှ်ရဏောၚ်ဂှ် သ္ၚဳဂၠိပ်လဝ်ရ။
“အကာဲအရာလၟုဟ်ဂှ်တှ်ေ နူကဵုပါၚ်ဂှ် ကညာၚ်ဒၟံၚ်ပေါဲရုဲမာဲကီုလေဝ် လၟေၚ်ကမၠောန် အကာဲအရာမကၠောန်အာပေါဲရုဲမာဲတံဂှ် မုမှအံၚ်ဇၞးလဝ် ဟွံသေၚ်ဏီပုဟ်လေဝ်။ အခိၚ်လၟုဟ် ဍေံတံဆဵုကဵုဗော်ပရေၚ်ဍုၚ်ကွာန်တံဟီုဂှ် ပြဟ်ဟ်ဏံ ပ္ဍဲကဵုသၞောဝ်ပေါဲရုဲမာဲ၊ နဲသၞောဝ်ဥပဒေ၊ သၞောဝ်သ္ဇိုၚ်ဒက်ပ္တန်တံဂှ် ဗီုလဵုကၠောန်အာပေါဲရုဲမာဲရော ကၠောန်အာနကဵုသၞောတ်လဵုရော အရာမကၠးမှးတံ မုမှဟွံမွဲဏီပုဟ်။ ဆဵုဂဗကဵုဗော်ပရေၚ်ဍုၚ်ကွာန်တံတုဲ ကဵုအခေါၚ်မၞိဟ်လ္ၚတ်မၚ်ရံၚ်ပေါဲရုဲမာဲတံဟီုဂှ်လေဝ် ဒှ်ဒၟံၚ်ဗီုပြၚ် ဟီုလဝ်ဆၜိုတ်ဒှ်ရဏောၚ်” သာ်ဝွံ သ္ဂးရ။
မွဲလ္ပာ်ဂှ်ပၠန် ဟိုတ်နူပေါဲဗ္တိုက် မက္တဵုဒှ်ဒၟံၚ် အလုံဍုၚ်မွဲတုဲ နကဵုညးလ္ၚတ်မၚ်ရံၚ်ပေါဲရုဲမာဲအပ္ဍဲဍုၚ်မ္ၚးဍုၚ်တံဂှ်တှ်ေ အကာဲအရာကဵုမှဟေၚ် ဒှ်သဘဴမၚ်ရံၚ်ဂွံဏောၚ်ဂှ် ညးထံက်ထ္ၜးလဝ်ရ။
နကဵုကဝ်မယှေန်ပေါဲရုဲမာဲဂှ်တှ်ေ ညံၚ်ပေါဲရုဲမာဲမၞုံကဵုသိက္ခာ ကေုာံ ညံၚ်ကၠတ်ထဝ်မၞုံကဵုသိက္ခာမွဲ ဂွံမံက်ဂတဝ်ကၠုၚ်ဂှ် ပ္တိတ်ဇြဟတ်ရေၚ်တၠုၚ်အာဏောၚ်ဂှ် ဟီုပ္တိတ်လဝ်တုဲ က္ဍိုပ်သ္ကိုပ်ပၞာန်ဂှ်လေဝ် ဟီုကြီုလဝ် သာ်ဏံတုပ်ပ်ရ။
ပ္ဍဲဍုၚ်ဗၟာ မကၠောန်ဗဒှ်လဝ် သၞောတ်ပေါဲရုဲမာဲ ညးဂွံမာဲဂၠိုၚ်ညးဇၞး FPTP ဂှ် ကံၚ်ဇြဳပၞာန် သွက်ဂွံပြံၚ်လှာဲဒ္ဂေတ်ဗက်အာ သၞောတ်သ္ပစၞးခလပ်ဆ PR ဂှ် ကြဴနူသၞာံ ၂၀၂၁ တုဲဂှ် စဟီုပ္တိတ်ကၠုၚ်လဝ်ရ။
ကြဴနူဂှ်တုဲ သၞောဝ်ဗော်ပရေၚ်ဍုၚ်ကွာန်ဂမၠိုၚ် မ္ဒးပ္တိုန်စရၚ် တၚ်သၞောတ်ဗ္ၜတ်ဗွဲမဂၠိုၚ်ဂၠေၚ် မပါလုပ်ဒၟံၚ်ဂှ် ပ္ဍဲသၞာံ ၂၀၂၃ ဂိတုဂျာန္နဝါရဳဂှ် ကဝ်မယှေန်ပေါဲရုဲမာဲ ကလေၚ်စၞောန်ပျးလဝ်ရ။
သၞာံတုဲကၠုၚ် ပ္ဍဲအသေအဟာန်ကၠောံသၞာံ NCA ဂှ် က္ဍိုပ်သ္ကိုပ်ပၞာန် ဟီုပ္တိတ်ကၠုၚ်လဝ် ဒဒှ်ရဒ္ဂေတ်ဗက်ရပ်စပ်အာ သၞောတ် PR ပ္ဍဲကဵုပေါဲရုဲမာဲဂှ်ဏောၚ်ဂှ်ရ။
ဆ္ဂး ပြဟ်ဟ်ဏံ နကဵုကံၚ်ဇြဳပၞာန် မဒးဗလးလဝ်ဍုၚ် စဵုကဵု ၈၆ ဍုၚ်ဂှ် ပ္ဍဲကဵုတိဍာ်မထိၚ်ဒက်လဝ်တံဂှ်ဟေၚ် ဒဒှ်ရကၠောန်အာ ပေါဲရုဲမာဲ သ္ကုတ်ဍေံကဵုဍေံမာန်ဏောၚ် ဟိုတ်နူအကာဲအရာဏံတုဲ ရပ်စပ်အာသၞောတ်လဵုရောဟီုဂှ် သ္ပဒတန်လဝ်ဟွံမွဲဏီရ။
မွဲလ္ပာ်ဂှ်ပၠန် သၞောဝ်ပေါဲရုဲမာဲ ကေုာံ နဲသၞောဝ်ဥပဒေ မဆက်စပ်ကဵုကၠတ်ထဝ်တံဂှ်လေဝ် သ္ပဒတန်စၞောန်ပျးလဝ် ဟွံမွဲဏီတုဲ ရပ်စပ်အာသၞောတ်စက် ကဵုမာဲအဳလက်ထရဝ်နေတ်ဂှ်ဏောၚ် ဟီုပ္တိတ်လဝ် အပ္ဍဲကောံဓရီုမကၠောန်ဗဒှ်လဝ် ပ္ဍဲသၞာံဏံ ဗွဲကြဴဏံရ။
ပရိုၚ်−သြၚ်လောန်တိုၚ်(မ်)
ဗီု−SAC Telegram