နေဗျဳဒဝ်၊ ဂျာန္နဝါရဳ ၁၉
အတိုၚ်တၚ်နၚ်စရၚ်လၟိဟ်မၞိဟ် ကံၚ်ဇြဳပၞာန် မကံက်ကပှ်ဂွံလဝ်ဂှ်မ္ဂး ဟိုတ်နူလၟိဟ်မၞိဟ်အောန်စှ်ေကၠုၚ်တုဲ ပ္ဍဲအရာကၠောန်ဗဒှ်ပေါဲရုဲမာဲဂှ် ဒဵုဗ္ၜတ်မွဲမွဲ ဇီုကပိုက်ကၠုၚ်မာန်ရောၚ် က္ဍိုပ်သ္ကိုပ်ပၞာန် ဟီုရ။
က္ဍိုပ်သ္ကိုပ်ပၞာန် သ္ကိုပ်ပၞာန်ဇၞော် မေန်အံၚ်လှာၚ် ဟီုဏာလဝ် ပ္ဍဲကဵုကောံဓရီုအလဵုအသဳကၟိန်ဍုၚ်ကံၚ်ဇြဳပၞာန် မကၠောန်ဗဒှ်လဝ် ပ္ဍဲနေဗျဳဒဝ် ပ္ဍဲဂိတုဂျာန္နဝါရဳ ၁၇ ဂှ်ရ။
သွက်ဂွံကၠောန်ဗဒှ်ပေါဲရုဲမာဲမာန်ဂှ် တုဲကၠုၚ်ပ္ဍဲသၞာံ ၂၀၂၄ ဂိတုအံက်တဝ်ဗာဂှ် ကံၚ်ဇြဳပၞာန် ကံက်ကပှ်လဝ် စရၚ်လၟိဟ်မၞိဟ် ကေုာံ ပရူပရာသ္ၚိကၟိန်ရ။
အတိုၚ်စရၚ်လၟိဟ်မၞိဟ် မလလောၚ်ပ္တိတ်လဝ် ကၠာတဲဏံဂှ်မ္ဂး ကံက်ကပှ်ဂွံလဝ် လၟိဟ်မၞိဟ် ၃၂ ပြကောဋိကိုဋ်ပြၚ်တုဲ ၁၉ ပြကောဋိကိုဋ်ပြၚ်ဂှ်တှ်ေ ဟွံဂွံကံက်လဝ်စရၚ်ပုဟ်ဂှ် ကံၚ်ဇြဳပၞာန် ဒုၚ်လဝ်ဝန်ရ။
က္ဍိုပ်သ္ကိုပ်ပၞာန်ဂှ်တှ်ေ အတိုၚ်တၚ်နၚ်စရၚ်ကၟိန်ဍုၚ်ဂှ်မ္ဂး နကဵုလၟိဟ်မၞိဟ်ကၟိန်ဍုၚ် စှ်ေကၠုၚ်ဒၟံၚ်တုဲ နွံဒၟံၚ်ၜိုတ် ၅၁ ပြကောဋိကိုဋ်ပြၚ်ရဂှ် ဟီုရ။
ဣဏံဝွံ ဟိုတ်နူဒမြိပ်သၠးဂဝ်အောန်ကီု၊ ဒၟါနူဟိုတ်နာနာသာ်တုဲ မၞိဟ်တိတ်စ္ဍးဍုၚ်သ္အာၚ်တံ ဂၠိုၚ်ကၠုၚ်ကီု ကေုာံ ချိုတ်အာတံ နွံဂှ် သ္ဂးရ။ ဆ္ဂး ပရူပရာချိုတ်တ်ပၠိုတ်တ်ဂှ်တှ်ေ ဟီုစုတ်လဝ်ဂှ် ဟွံမွဲရ။
ဟိုတ်နူပၞာန်ထ္ပက်ပၠန်ဂတး အလုံဍုၚ်မွဲဂှ်တုဲ ကံၚ်ဇြဳပၞာန် မဒးဆေၚ်ဒၟံၚ်မုက်ကဵု ပရေၚ်ဇြဟတ်လေၚ်ဒိုက်ဂှ်ဝွံ ဂွံဗပေၚ်ဇြဟတ်ဂှ် ပ္ဍဲသၞာံ ၂၀၂၄ ဂိတုဖေဖဝ်ဝါရဳဂှ် ဂယိုၚ်ပ္တိုန်လဝ် သၞောဝ်စၟအ်ကောန်ဍုၚ် မ္ဒးယိုက်လျိုၚ်ပၞာန်ဂှ်ရ။
ဟိုတ်နူသၞောဝ်ဏံတုဲ သၟတ်လုပ်ပၞာန်ဂွံတံဂှ်ဝွံ တိတ်စ္ဍးအာဍုၚ်သ္အာၚ် နကဵုဂၠံၚ်မလုပ်သၞောဝ်ကီု သီုကဵုနဲကဲတတ်ကၠောံပယျဵုတံဂှ် နကဵုဂအုံဗွဝ်ရ။
သ္အာၚ်နူဂှ်ပၠန် ပ္ဍဲကဵုဒေသဗၠးၜး ကေုာံ တိဍာ်ဂကောံရပ်လွဟ်ကောန်ဍုၚ်အရၚ်တံ မထိၚ်ဒက်လဝ်တံဂှ် ဂြိပ်ဒဴအာတံလေဝ် နွံရောၚ် ဂကောံပၠန်ဂတးတံ သ္ဂးရ။
မွဲလ္ပာ်ဂှ်ပၠန် ဟိုတ်နူပန်ပှော်လွဟ်ဇၞော် ကေုာံ ဟိုတ်နူဗ္တိုက်ကဵုပၞာန်ကျာတံကီု သီုကဵုဒပ်ကံၚ်ဇြဳပၞာန်တံ ရပ်ဒက်ဂစိုတ်ဂယိုၚ် နကဵုနဲကဲနာနာသာ်တုဲ ညးဍုၚ်ကွာန်ဂၠိုၚ်ကဵုလ္ၚီ ဇီုကပိုက်ချိုတ်အာတံလေဝ် နွံဒၟံၚ်ရ။
အတိုၚ်စရၚ် ဌာနဝန်ဇၞော်ကံၚ်ဇြဳပၞာန် မကောပ်ကာဲပရေၚ်မၞိဟ်လုပ် ကေုာံ ဇြဟတ်ညးဍုၚ်ကွာန် မလလောၚ်ပ္တိတ်လဝ် ပ္ဍဲသၞာံ ၂၀၂၃ ဂိတုအံက်တဝ်ဗာ ၁ ဂှ်မ္ဂး ပ္ဍဲဍုၚ်ဗၟာ လၟိဟ်မၞိဟ်ချိၚ်ခယျဂှ်တှ်ေ ၅၆ ဒဿမ ၂ ပြကောဋိကိုဋ် နွံရ။
ဆ္ဂး ပ္ဍဲကဵုစရၚ်လၟိဟ်မၞိဟ် မကံက်ကပှ်လဝ်ပ္ဍဲသၞာံ ၂၀၂၄ ကၠာတဲဏံဂှ်မ္ဂး ဟိုတ်နူနွံဒၟံၚ် ၅၁ ဒဿမ ၃၁ ပြကောဋိကိုဋ်ပြၚ်ရဂှ်တုဲ အပ္ဍဲပွိုၚ်မွဲသၞာံဂှ် ယအ်စှ်ေအာ ၄ ပြကောဋိကိုဋ်ပြၚ်ရ။
က္ဍိုပ်သ္ကိုပ်ပၞာန်ဂှ်တှ်ေ ဒၟါနူလၟိဟ်မၞိဟ်အောန်စှ်ေကၠုၚ်တုဲ ကောန်ကလောန်အပ္ဍဲဍုၚ် အောန်စှ်ေကၠုၚ်ဂှ်ကီု ပ္ဍဲအရာကၠောန်ဗဒှ်ပေါဲရုဲမာဲဂှ်လေဝ် ဇီုကပိုက်ကၠုၚ်မာန်ရောၚ် ဟီုရ။
ညးလ္ၚတ်သ္ၚဳဂၠိပ်ပရေၚ်ဍုၚ်ကွာန် ဥူတာန်သဵုနာၚ်ဂှ်တှ်ေ ပ္ဍဲကဵုဒေသကံၚ်ဇြဳပၞာန် ထိၚ်ဒက်လဝ်တံဂှ် ပေါဲရုဲမာဲ မဒှ်သွက်ပၞော်တိတ်ပရေၚ်ဍုၚ်ကွာန်ဂှ်တှ်ေ ကၠောန်ဂွံအာကီုလေဝ် ထ္မံက်ထ္ၜးဆန္ဒညးဍုၚ်ကွာန်မာန်ဟွံသေၚ်ပုဟ်ဂှ် သ္ၚဳဂၠိပ်လဝ်ရ။
“’ပေါဲရုဲမာဲဂှ်တှ်ေ ဒှ်ပၞော်တိတ်ပရေၚ်ဍုၚ်ကွာန် မေန်အံၚ်လှာၚ်တုဲ ဗီုဒှ်ကဵုဒှ်ဂှ် ကၠောန်အာတွဵုဏောၚ်။ ဆ္ဂး ပေါဲရုဲမာဲ စှ်ေကဵုဗဗွဲဓဝ်တုဲ မထ္မံက်ထ္ၜးဆန္ဒညးဍုၚ်ကွာန်ဍာံဍာံပြပြမာန် ပေါဲရုဲမာဲညးဍုၚ်ကွာန် မလှဲလးမွဲဂှ် ဒှ်ဟွံမာန်ပုဟ်။ ပ္ဍဲဒေသညးထိၚ်ဒက်လဝ်လ္ၚဵုတံဂှ်တှ်ေ သၞောတ်ဗ္ၜတ်တုဲကၠောန်အာဏောၚ်။ ပေါဲရုဲမာဲ လှဲလးတုဲ မစှ်ေကဵုဗဗွဲဓဝ် အတိုၚ်ဗ္ၜတ်ဍုၚ်မွဲဂှ် ဗီုလဵုမှဒှ်ဟွံမာန်ပုဟ်။ ဆ္ဂး ညးဂှ်တှ်ေ ကၠောန်ဆၜိုတ်ဒှ်ရတုဲ ၜိုတ်ဆဇြဟတ်ထံက်ဂလာန်ညးတံ ဂွံလုပ်သၞောဝ်ဂှ် ဂ္စါန်အာဏောၚ်။ ညအ်ဂှ် လ္ပာ်ညးဍုၚ်ကွာန်တံဂှ်လေဝ် ဒစဵုဒစးအာ နူကဵုဒိုဟ်ဇဳဏောၚ်” သာ်ဝွံ သ္ဂးရ။
ပေါဲရုဲမာဲဂှ်တှ်ေ ပ္ဍဲကဵုဒေသဆန္ဒမာဲ အလုံဍုၚ်မွဲဂှ် သွက်ဂွံကၠောန်ဗဒှ်အာ ပ္ဍဲကဵုပွိုၚ်ဍုၚ် ၁၆၁ ပွိုၚ်ဍုၚ်ဂှ် ရန်လဝ်ရောၚ် သၞာံတုဲကၠုၚ် ပ္ဍဲဂိတုဒဳဇြေမ်ဗာတေံ လ္ပာ်ကဝ်မယှေန် ဟီုလဝ် ကုဗော်ပရေၚ်ဍုၚ်ကွာန်ဂမၠိုၚ်ရ။
ဣဏံဝွံ ပ္ဍဲကဵုဍုၚ်ဗၟာ ပွိုၚ်ဍုၚ်နွံ ၃၃၀ ဂှ် ကၠောန်ဗဒှ်အာ ၜိုတ် ၄၉ တၟံကၠံရမာန် မဒှ်ရ။ ဟိုတ်ဂှ်ရ ညးခါတ်အကာဲပရေၚ်ဍုၚ်ကွာန်တံဂှ်တှ်ေ ပေါဲရုဲမာဲဂှ်တှ်ေ ကၠောန်အာကဵုဒကုတ်ရမာန်ဏောၚ်ဂှ် သ္ၚဳဂၠိပ်လဝ်ရ။
အတိုၚ်လိက်ဒုၚ်စဳရေၚ် ဌာနဝန်ဇၞော်ကာစဵုဒၞါ NUG ဂှ်မ္ဂး နကဵုကံၚ်ဇြဳပၞာန် ပ္ဍဲကဵုပွိုၚ်ဍုၚ် နွံပ္ဍဲဍုၚ်ဗၟာဂှ် ၜိုတ် ၃၂ တၟံကၠံရ သှ်ေဒၟံၚ်တုဲ ၜိုတ်ပိဂအုံမွဲဂအုံရဂှ် အုပ်ဓလီုဟွံမာန်ရပုဟ်ဂှ် သ္ဂးရ။
က္ဍိုပ်သ္ကိုပ်ပၞာန်ဂှ်တှ်ေ ညံၚ်ဂွံဒှ်အကာဲအရာ ကၠောန်ဗဒှ်ပေါဲရုဲမာဲမာန်ဂှ် ဂ္စါန်တုဲဂွံရေၚ်တၠုၚ်အိုတ်ဂှ် ဖ္တိုက်ဖ္အောဝ်လဝ်တုဲ ကုကမၠောန်ပရေၚ်ညိၚ်ဝတ် ကေုာံ ပရေၚ်သၞောဝ်အုပ်လဒံတံဂှ်လေဝ် ဒစးဒုၚ်တုဲပလေဝ်ပလေတ်ဒၟံၚ်ရောၚ် ကဵုလဝ်သမ္တီရ။
ပရိုၚ်−သြၚ်လောန်တိုၚ်(မ်)
ဗီု−SAC