ကအ်ကြိက်၊ ဂျာန္နဝါရဳ ၁၉
အပ္ဍဲသတ္တာဟဏံ ဗ္တိုက်သီဂွံလဝ် ဗ္ဒိုပ်ကရောၚ်ပၞာန်အံၚ်ဇေယျကဆံၚ်ကၟိန်ဍုၚ် ပ္ဍဲမုက်ပၞာန်တေံမွဲတုဲ သီဂွံလဝ် လွဟ်လက်နက်မကမ် ဗွဲမဂၠိုၚ်ဂၠေၚ်ရောၚ် ဒေသပၞာန်ရးသၠုၚ်ကျာ NUG လလောၚ်ပ္တိတ်လဝ်ပရိုၚ် ပ္ဍဲဂိတုဂျာန္နဝါရဳ ၁၈ တေံရ။
ပ္ဍဲကဵုဂၠံၚ်အာယှ ကအ်ကြိက်−ဗြဝတဳ တွဵုရးကရေၚ်ဂှ် ကရောၚ်ပၞာန်အံၚ်ဇေယျ ဆက်အာဂတဟွံဂွံ နွံဒၟံၚ်ပ္ဍဲဂၠံၚ်ဏံဂှ် ပ္ဍဲဂိတုဂျာန္နဝါရဳ ၁၂ တေံ ဒပ်ပံၚ်ကောံ ဂကောံဇြဟတ်ပၠန်ဂတးတံ လုပ်စိုပ်ဗ္တိုက်သီဂွံလဝ် ဗ္ဒိုပ်မုက်ပၞာန်မွဲရ။
အပ္ဍဲပေါဲဗ္တိုက်သီဗ္ဒိုပ်ဂှ် နူကဵုကံၚ်ဇြဳပၞာန်ဂှ် သီဂွံလဝ် လွဟ်ဍောတ် ၁၁ ဇကိုအ်၊ လွဟ်ဇၞော် မွဲဇကိုအ်၊ မာၚ် ကေုာံ မကမ်နာနာတုဲ ကပေါတ်အရပ်စပ်ပၞာန်တၞဟ်ဟ်တံဂှ်လေဝ် ဒပ်ပံၚ်ကောံပၠန်ဂတးတံ သီဂွံလဝ်ရ။
ဒေသပၞာန်သၠုၚ်ကျာ အလဵုအသဳညဳသၟဟ်ဂကူ NUG ပ္ဍဲကဵုတွဵုရးဍုၚ်မန်၊ ကရေၚ်၊ ရးတၞၚ်သဳ ကေုာံ ရးဗဂေါတံဂှ် နူဂိတုဂျာန္နဝါရဳ ၁၁ စဵုကဵု ၁၇ ဂှ် ပေါဲဗ္တိုက်ဆက်က္တဵုဒှ်ဒၟံၚ်ရ။
အပ္ဍဲပေါဲဗ္တိုက်ဂှ် လ္ပာ်ကံၚ်ဇြဳပၞာန် ၂၈ တၠ ချိုတ်အာလဝ်တုဲ ၄၅ တၠဟွံအောန် ဇီုကပိုက်ကလိဂွံလဝ်ဝပ်ရောၚ် ထ္မံက်ထ္ၜးလဝ် ပ္ဍဲတၚ်လလောၚ်တြး ဒေသပၞာန်သၠုၚ်ကျာ NUG ရ။
ပ္ဍဲကဵုပေါဲဗ္တိုက်ဗလးတိတံဂှ် ဟိုတ်နူဒးဂိဒၟံၚ်တုဲ ဒပ်ကံၚ်ဇြဳပၞာန်ဝွံ ကောန်အရာပ်တံလေဝ်ဟွံသှ်ေ နကဵုတၚ်ရန်တၟံနွံနွံ ကၠောန်သ္ပဗ္တိုက်ကၠုၚ်ဒၟံၚ်ပၞာန်ကျာတံဂှ်ရောၚ် ဒေသပၞာန်သၠုၚ်ကျာ NUG ကဵုလဝ်သတိရ။
ပရိုၚ်−သြၚ်လောန်တိုၚ်(မ်)
ဗီု−KNU