မဝ်သကိုဝ်၊ ဂျာန္နဝါရဳ ၁၉
က္ဍိုပ်သ္ကိုပ်လ္ပာ်ဂကောံဒစဵုဒစး အလက်သဳ နာဗဴနဳ မစုတိအာလဝ်ဂှ် အခိၚ်ညးဒးဒုၚ်ဖျေံလဝ်ထံၚ်ဂှ် ဂလာန်ဗကန်နူညးဂှ် ဟိုတ်နူပလံၚ်ဗစိုပ်လဝ် မ္ၚးဏံတုဲ ကုညးရေၚ်တၠုၚ်ဂဗုတ်ပိတၠဂှ် ပ္ဍဲဂိတုဂျာန္နဝါရဳ ၁၇ တေံ ရုယှာ ဖျေံလဝ်ဒဏ်ထံၚ်သၞာံဇမၠိၚ်ရ။
အခိၚ်လၞိန်ဗပိန်ဒၟံၚ် ညးမဒစဵုဒစး အပ္ဍဲပရေၚ်ဗ္တိုက်ၜက်ၜေတ်ယူကရုၚ် လှဲလှဲလးလးဂှ် ဟိုတ်နူပြဝဏံ မမံက်တိတ်ကၠုၚ်ဂှ်တုဲ ဂကောံအခေါၚ်အရာမၞိဟ်ဂမၠိုၚ် မ္ဒးလကိုတ်တ္ၚဵုအာအိုတ်ရ။
မ္ၚးနူဖျေံကၠုၚ်ထံၚ် ကုညးတၠဂဗုတ်တံဂှ် လ္ပာ်ရုယှာ သၠုၚ်ပ္တိုန်အသိၚ် စၟဳတ်ပ္တိုန်ကၠုၚ်ရုၚ် ကုညးစၞးမဆေၚ်စပ်ကဵုသၞောဝ်တံဂှ်ဝွံ ဂကောံအခေါၚ်အရာမၞိဟ်တံ ဂွိၚ်ဒၟံၚ်အိုတ်ရ။
သၞာံတုဲကၠုၚ် ပ္ဍဲဂိတုဖေဖဝ်ဝါရဳ ပ္ဍဲကဵုထံၚ်စာတ် မၞုံဒေသအာတေခ်မွဲဂှ် က္ဍိုပ်သ္ကိုပ်ဂကောံလ္ပာ်ဒစဵုဒစးရုယှာ နာဗဴနဳ ဒးချိုတ်အာလဝ် နကဵုအကာဲအရာ သောၚ်ကလးဟွံမာန်တံဂှ်တုဲဂှ် ကုမၞိဟ်မဆက်စပ်ကဵုညးဂှ် နူကဵုနန်ကရေမ္မလေန်သမ္မတ ပ္တိတ်ကၠုၚ်ဒၟံၚ်ဇြဟတ် သွက်ဂွံကဵုဒုဟ်ဒဏ်ရ။
ဗာဒေန် ကပ်သေပ်၊ အလက်သဳ လေတ်သာ၊ အဳဂဝ် သာဂူနေန်တံဝွံ ဟိုတ်နူပါလုပ်လဝ် ပ္ဍဲကဵုဂကောံစိုပ်တၞုၚ်တၞးတံဂှ်တုဲ ဒဒှ်ရဒုဟ်ဒဏ်နွံဂှ် ရုၚ်သၞောဝ်ဓဝ် နွံဍုၚ်ပဳတူကဳ သ္ဂုတ်သွာတ်လဝ်ရ။
ဗာဒေန် ကပ်သေပ် မဒှ်ကောန်ဂကောံ ကေၚ်ကာသၞောဝ်ဓဝ်ဒယှ် နာဗဴနဳဂှ် ဒးဒုၚ်ဖျေံစၟတ်လဝ် ဒဏ်ထံၚ် ၅ သၞာံဘာ်တုဲ အလက်သဳ လေတ်သာဂှ်တှ်ေ ဒဏ်ထံၚ် ၅ သၞာံ၊ အဳဂဝ် သာဂူနေန်ဂှ်တှ်ေ ဒးဒုၚ်ဖျေံလဝ်ဒဏ်ထံၚ် ၃ သၞာံဘာ်ရ။
ဟိုတ်နူပရေၚ်ကဵုဒုဟ်ဒဏ် နူကဵုရုယှာ သာ်ဏံဂှ်တုဲ ဍုၚ်ပလိုတ်တံ ဒဒှ်ရဒေါသတိတ်ဒၟံၚ်အိုတ်ဂှ် ဂွံတီကေတ်ရ။
အခိၚ်နာဗဴနဳ ဒးဒုၚ်ဖျေံဒဏ်ထံၚ် ၁၉ သၞာံဂှ် မၞိဟ်အာစိုပ်ဆဵုဂဗလဝ်ကဵုညးဂှ် နွံဆညးရေၚ်တၠုၚ်ဂဗုတ်ပိတၠဏံဓဝ်ရ။
နာဗဴနဳ မဒှ်ညးဒစဵုဒစးပရေၚ်ဍုၚ်ကွာန် ကုသမ္မတပူတေန် အဓိကဂှ်တှ်ေ ပလံၚ်ဗစိုပ်လဝ်အရေဝ်ပရိုၚ်ညး ဇရေၚ်ဂၠးတိ နူကဵုညးရေၚ်တၠုၚ်ဂဗုတ်ညးမွဲကဆံၚ်ရ။
ညးရေၚ်တၠုၚ်ဂဗုတ်တံဏံဂှ်တှ်ေ ကဵုညးဂၠးတံဂွံမိၚ်လဝ် အရေဝ်ပရိုၚ်နာဗဴနဳ မပလံၚ်ဗစိုပ်လဝ်ဂှ် နူကဵုမဳဒဳယျာပရေၚ်မၞိဟ်တံ မွဲကဆံၚ်ရ။
ညးမစိုပ်ဒၟံၚ် ပ္ဍဲထံၚ်စာတ်ရုယှာတံ ပလံၚ်ဗစိုပ်အရေဝ်ပရိုၚ်ညးတံ၊ လိက်ညးတံ မ္ၚးဏံ နူကဵုညးရေၚ်တၠုၚ်ဂဗုတ်မွဲကဆံၚ်ဟီုဂှ် ဒှ်ပွဓမ္မတာ မလေပ်ကၠောန်တဴမွဲရ။
သမ္ဘာ နာဗဴနဳ ဒးပါဲဒလေတ်ဒၟံၚ်ဍုၚ်သ္အာၚ် မၞုံယၟု ယူလဳယာ နာဗဴနာယာဂှ်တှ်ေ ညးရေၚ်တၠုၚ်ဂဗုတ်ပိတၠဏံဝွံ ဒှ်ကောန်ထံၚ်ပရေၚ်ဍုၚ်ကွာန်တုဲ ထေက်ကဵုဒးဗလးလွာဲဂှ်ရောၚ် ဟီုလဝ်ရ။
စပ်ကဵုပရေၚ်ဖျေံစၟတ်ဒုဟ်ဒဏ်ဏံဂှ်တုဲ အမေရိကာန်၊ ပြၚ်သေတ်၊ ဂျာမနဳ ကေုာံ ဗျိတိၚ်တံ သီုဖအိုတ်ဂှ်တှ်ေ ပ္တိုန်ဒုဟ် ပါ်ပါဲလဝ်ရ။
အလဵုနာဗဴနဳလေဝ် ဒှ်ညးရေၚ်တၠုၚ်ဂဗုတ်မွဲတုဲ ညးဝွံ ဒးဒုၚ်ဗ္တိုက်လဝ် နကဵုဂျိလတေၚ်အရီုတုဲ ပွမချိုတ်အာလဝ် ပ္ဍဲထံၚ်ဂှ်လေဝ် ဒးချိုတ်အာလဝ် နကဵုအကာဲအရာ သ္ဇက်ဒးဒှ်သံသယခိုဟ်မွဲရောၚ် မဒှ်ရ။
Ref: CNA