ရေဝ်၊ ဖေဖဝ်ဝါရဳ ၅
တွဵုရးဍုၚ်မန် ပ္ဍဲဂၠံၚ်ပျဳထံၚ်သု ရေဝ်−ဇြပ်ဗုဂှ် လ္ပာ်ကံၚ်ဇြဳပၞာန် ရပ်စပ်ဇြဟတ်ဗွဲမဂၠိုၚ်တုဲ သၠုၚ်ပ္တိုန်လဝ်ပရေၚ်ဂီုကၠီုရောၚ် ညးဒေသတံကဵု ညးအာတရဴတံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ဒပ်ကံၚ်ဇြဳပၞာန်ဝွံ စနူဂိတုဂျာန္နဝါရဳ သတ္တာဟတုဲကၠုၚ်တေံတုဲ မွဲဒမြိပ်ဂၠံၚ် ဇြပ်ဗုကဵု ရေဝ်ဂှ် ဂလိုၚ်ပ္တိုန်လဝ် သၞေဟ်ကၚ်စၟဳတ်တၟိတံတုဲ ပ္ဍဲကဵုသၞေဟ်ကၚ်စၟဳတ် မၞုံဒၟံၚ်တံဂှ်လေဝ် ထပ်ဗပေၚ်လဝ်ဇြဟတ်ရ။
အတိုၚ်ဂလာန်ညးဒေသတံဂှ်မ္ဂး ကၠာတေံ ပ္ဍဲသၞေဟ်ကၚ်မွဲမွဲဂှ် ဇြဟတ် နူ ၁၀ တၠ ဂၠိုၚ်အိုတ် ၃၀ တၠရ နွံကီုလေဝ် ဗွဲကြဴဏံ မွဲမွဲသၞေဟ်ကၚ်ဂှ် ဗပေၚ်လဝ်ဇြဟတ် နူ ၂၀ တၠ စဵုကဵုဗ္ဒါဲ ၅၀ တၠရ။
မွဲလ္ပာ်ဂှ်ပၠန် ဒပ်ကံၚ်ဇြဳပၞာန်ဝွံ ပ္ဍဲကဵုဂၠံၚ်ရေဝ်−ဇြပ်ဗုဂှ် ဟွံကဵုကၠုၚ်သမ္တီမွဲသာ် လုပ်စိုပ်စၟဳတ်ဒၟံၚ်တုဲ စၟဳတ်ဒၟံၚ်ညးအာတရဴတံ သီုတၞးကာဒ်ကောန်ဍုၚ်၊ သီုကဵုဖုၚ်တံ မဒှ်ရ။
ပရေၚ်ဂီုကၠီုဂၠံၚ် ကံၚ်ဇြဳပၞာန်ဂှ် မ္ၚးနူကဵုဒပ်ကံၚ်ဇြဳပၞာန်ကဵု ဗၠာဲသၟိၚ်တံဂှ် ဒပ်မၚ်ပယျဵုကရေၚ် BGF ၊ ဒပ်စဵုဒၞါၜိုဟ်လလမ်ဂကူမန် ကေုာံ ဂကောံပၞာန်မၚ်ကွာန်တံလေဝ် ပံၚ်တောဲကၠောန်ၜိုတ်ဒၟံၚ်ရောၚ် ညးဒေသတံ ဟီုအိုတ်ရ။
ပ္ဍဲဂၠံၚ်ရေဝ်−ဇြပ်ဗုဂှ် လ္ပာ်ကံၚ်ဇြဳပၞာန် သၠုၚ်ပ္တိုန်ပရေၚ်ဂီုကၠီုတုဲ ပရေၚ်ကၟာတ်လဒဵုစၟဳတ်တံဂှ်လေဝ် ကၠောန်ကၠုၚ်ဒၟံၚ် ဗီုပၟိက်စိုတ်တုဲ တရဴလဇုဲလဇအာတံ နွံဒၟံၚ်ရောၚ် ညးအာတရဴတံ သ္ဂးရ။
ကၠာတေံ ပ္ဍဲကဵုသ္ကုတ်ဂၠံၚ်ရေဝ်−ဇြပ်ဗုဂှ် သၞေဟ်ကၚ်စၟဳတ်ကံၚ်ဇြဳပၞာန် နွံစ ၜိုတ် ၁၀ ရကီုလေဝ် ဗွဲကြဴဏံ သၞေဟ်ကၚ်စၟဳတ် နွံဒၟံၚ် ၂၀ ဟွံအောန်ဂှ် ဂွံတီကေတ် ဇရေၚ်ညးဒေသတံရ။
သွက်ဂွံကလေၚ်ထိၚ်ဒက် ဂၠံၚ်ရေဝ်−ဇြပ်ဗု ဂကောံဇြဟတ်ပၠန်ဂတးတံ မအုပ်ဓလီုလဝ်ဂှ်တုဲ ကံၚ်ဇြဳပၞာန်ဝွံ နူကဵုသၞာံ ၂၀၂၄ ကြပ်အိုတ်တုဲကၠုၚ်တေံဂှ် စပ္တိတ်ကၠုၚ်ဒၟံၚ်ဇြဟတ်ရ။
ဂကောံဇြဟတ်ပၠန်ဂတးတံဂှ်တှ်ေ ပ္ဍဲကဵုဂၠံၚ်ရေဝ်−ဇြပ်ဗုဂှ် ပေါဲဗ္တိုက်တံ သ္ကာတ်မြဟ်ကၠုၚ်မာန်တုဲ ပၟိက်ဟွံမွဲမ္ဂး လ္ပအာတရဴအိုတ်ညိဂှ် ကဵုလဝ်သတိရ။
ပရိုၚ်−သြၚ်လောန်တိုၚ်(မ်)
ဗီု−CJ