ပ္ဍဲပေါဲဗ္တိုက်သီဗ္ဒိုပ် ဗျူဟာမေဝ်ပလဳဂှ် သ္ကိုပ်ဗျူဟာ ကေုာံ သ္ကိုပ်တမ်ဒပ် ထောံလသာဗ္ဒိုပ်ဂြိပ်ဒဴ

ၜဳကလေၚ်၊ ဖေဖဝ်ဝါရဳ ၅

ပ္ဍဲပေါဲဗ္တိုက်သီဗ္ဒိုပ်ကံၚ်ဇြဳပၞာန် ဗျူဟာမေဝ်ပလဳကံၚ် ဖျေံသ္ဇိုၚ်ကွာန်မေဝ်ပလဳ ပွိုၚ်ဍုၚ်ၜဳကလေၚ် တွဵုရးဍုၚ်မန်ဂှ် လ္ပာ်ကံၚ်ဇြဳပၞာန်ဂှ် ကောန်ဒပ်ဗ္ဒါဲ ၂၀ တၠ ပါလုပ်သီုကဵုသ္ကိုပ်ဗျူဟာ ကေုာံ သ္ကိုပ်တမ်ဒပ်တံ ထောံလသာဗ္ဒိုပ် ဂြိပ်အာလဝ်ရောၚ် ဗျူဟာပၞာန် စၟတ် ၂၇ ဒပ်စဵုဒၞါညးဍုၚ်ကွာန် PDF လလောၚ်ပ္တိတ်လဝ်ရ။

ဗ္ဒိုပ်ဗျူဟာမေဝ်ပလဳကံၚ်ဇြဳပၞာန် ပၟိက်ဇၞော်တဴသွက်ပရေၚ်ပၞာန်ဂှ် ပ္ဍဲဂိတုဂျာန္နဝါရဳတုဲကၠုၚ်တေံ ဒပ်ပံၚ်ကောံ ဂကောံဇြဟတ်ပၠန်ဂတးတံ စဗ္တိုက်လဝ်တုဲ ပ္ဍဲဂိတုဖေဖဝ်ဝါရဳ ၁ ဂှ် သီဂွံလဝ် အလုံဗ္ဒိုပ်မွဲရ။

ပ္ဍဲပေါဲဗ္တိုက်သီဗ္ဒိုပ်ဂှ် သ္ကိုပ်ဗျူဟာကံၚ်ဇြဳပၞာန် ဒုသ္ကိုပ်ပၞာန်ဇၞော် တေအ်လွေန်ဥူ၊ သ္ကိုပ်တမ်ဒပ် ခမရ ၄၀၅ ဒုသ္ကိုပ်ဗိုလ်ဇၞော် သာၚ်သူရဌေတံ မပါလုပ် ကောန်ဒပ်ကံၚ်ဇြဳပၞာန် ဗ္ဒါဲ ၂၀ တၠ ထောံလသာဗ္ဒိုပ် ဒးဂြိပ်ဒဴအာလဝ်ရ။

အပ္ဍဲပေါဲဗ္တိုက်သီဗ္ဒိုပ်ဂှ် ဒုသ္ကိုပ်တမ်ဒပ် ဗိုလ်ဇၞော် ခနာၚ်၊ ဗိုလ်ဇၞော် ဇြဝ်မေန်တံမပါလုပ် ကောန်ဒပ်ကံၚ်ဇြဳပၞာန် ဗ္ဒါဲ ၄၀ တၠ ချိုတ်အာလဝ်တုဲ ဗိုလ်ဇၞော်ဒဝ်တာ ညးက္ဍိုက်ပ်ပၞာန်(ကဆံၚ်တတိယ) G3 မပါလုပ်ဂှ် ရပ်ဂွံလဝ် ဂၠုဲပၞာန် ၂၇ တၠရ။

သ္အာၚ်နူဂှ်ပၠန် နူကဵုကံၚ်ဇြဳပၞာန်ဂှ် သီဂွံလဝ် ဟံက်ဝေတ်ဇြာ ၁၂၂ မမ ပန်ခြာဇမ္ၚောဲဂှ်ကဵု မကမ်လွဟ်လက်နက် ဗွဲမဂၠိုၚ်ဂၠေၚ်တုဲ ဗက်ဗ္တိုက်သ္အးဒၟံၚ် ကောန်ဒပ်ကံၚ်ဇြဳပၞာန် မထောံလသာဗ္ဒိုပ် မဂြိပ်တိတ်အာတံဂှ်ရောၚ် ဗျူဟာပၞာန် စၟတ် ၂၇ ကဵုလဝ်သမ္တီရ။

ဗ္ဒိုပ်ဗျူဟာမေဝ်ပလဳ မဖျေံလဝ်ဒပ် နကဵုဇြဟတ်ပွဳပွူ ၁၀၀ ပြၚ်ဂှ်ဝွံ ပ္ဍဲအရာကဵုအရီုဗၚ်ပရေၚ်ပၞာန်  ကုဗျူဟာဘာပန် ဒပ်ပံၚ်ကောံ ဂကောံဇြဟတ်ပၠန်ဂတးတံ မကၟာတ်လဒဵုလဝ်ဂှ် ဒှ်ဗ္ဒိုပ်ဒပ်ပၟိက်ဇၞော်မွဲရ။

ပရိုၚ်−သြၚ်လောန်တိုၚ်(မ်)

ဗီု−CJ