နေဗျဳဒဝ်၊ ဖေဖဝ်ဝါရဳ ၅
နကဵုဗော်ပရေၚ်ဍုၚ်ကွာန် မလုပ်စိုပ်ပြိုၚ်ပ္ကာန်အာ ပ္ဍဲပေါဲရုဲမာဲကံၚ်ဇြဳပၞာန် မကၠောန်ဗဒှ်အာဂှ် ဒးရေၚ်တၠုၚ်အာ ပရေၚ်ဒစးဒုၚ်ပလေတ်ပလေတ် မနွံပၟိက်တံဏောၚ်ဂှ် က္ဍိုပ်သ္ကိုပ်ပၞာန် သ္ကိုပ်ပၞာန်ဇၞော် မေန်အံၚ်လှာၚ် ဟီုရ။
ကြဴနူပပဵုပ္တိုန်အာယုက်ကာတၟေၚ် ၆ ဂိတုတုဲ ပ္ဍဲကဵုကောံဓရီုပ္ညဳပ္ညပ်ကမၠောန် ဂကောံအလဵုအသဳကၟိန်ဍုၚ် မကလေၚ်ဒက်ပ္တန်လဝ်ဂှ် စပ်ကဵုပရေၚ်ကၠောန်ဗဒှ်ပေါဲရုဲမာဲတုဲ ဟီုဏာလဝ်ရ။
သွက်ဂွံစန်ဒက်မာဲဂှ် ပရေၚ်ဂီုကၠီု ကေုာံ ပရေၚ်ညိၚ်ဝတ် ဒးနွံဏောၚ်တုဲ လ္ပာ်ကံၚ်ဇြဳပၞာန် ညံၚ်ပေါဲရုဲမာဲဂွံအံၚ်ဇၞးဂှ် ကိစ္စမ္ဒးပလေဝ်ပလေတ်တံဂှ် ဒးရေၚ်တၠုၚ်အာ ဗွဲမဗဗွဲကဵုသၞောဝ်တံဏောၚ်ဂှ် သ္ဂးရ။
ဥူတာန်သဵုနာၚ် ညးလ္ၚတ်သ္ၚဳဂၠိပ်ပရေၚ်ဍုၚ်ကွာန်ဂှ် ဟိုတ်နူအခက်အခုဲတိဍာ်တံနွံဒၟံၚ်ဂှ်တုဲ ဂီုကၠီုကောန်ဗော်တံဂှ်လေဝ် ဒုၚ်ကဵုလျိုၚ်ဟွံမာန် ပ္ဍဲအကာဲအရာသာ်ဏံဂှ် စန်ဒက်ဟီုဂးကၠုၚ်ဒၟံၚ် ၜိုတ်လ္တူကျာရဂှ် သ္ၚဳဂၠိပ်လဝ်ရ။
“သာ်လဵုမှလေဝ် ကၠောန်မာန်ဟွံသေၚ်ပုဟ်။ မူဟိုတ်ရောတှ်ေ စပ်ကဵုပရေၚ်ဂီုကၠီုတုဲ ညးတံဒုၚ်ကဵုလျိုၚ်ဟွံမာန် ပ္ဍဲအကာဲအရာသာ်ဏံဂှ် နကဵုဗော်ဂမၠိုၚ် ဂွံစန်ဒက်မာဲဟီုဂှ် သာ်လဵုမှ ဒှ်ဟွံမာန်ပုဟ်။ ဒပ်ပၞာန်ညးတံရဂှ် နူဗ္ဒိုပ်ပၞာန် တိတ်မ္ၚးဟွံဂွံ ဒှ်ဒၟံၚ်တုဲ သွက်ဂွံကၠောန်အာပေါဲရုဲမာဲ နကဵုညး ပလေဝ်ပလေတ်ဒၟံၚ်တံ နွံရောၚ် မိက်ဂွံဟီုပ္တိတ်သာ်ဏံတုဲ စန်ဒက်ဟီုဂးကၠုၚ်ဒၟံၚ် ဂလာန်ဏံရ” သာ်ဝွံ သ္ဂးရ။
သ္ကိုပ်ဝန်ဇၞော် ရးဒေသ ကေုာံ တွဵုရးဂမၠိုၚ်၊ နကဵုညးတာလျိုၚ်ဂမၠိုၚ် သွက်ဂွံလ္ၚတ်လဝ်သၞောဝ် မဆက်စပ်ကဵုပေါဲရုဲမာဲတံ ဗွဲတြးဂှ်ကီု၊ ပရေၚ်ရုဲစှ်ပ္တိုန်အာ သွက်ကၠတ်ထဝ် ၃ တန်ဂှ်လေဝ် ဒးရေၚ်တၠုၚ်အာ ဗွဲမဗဗွဲကဵုသၞောဝ်ဏောၚ်ဂှ် က္ဍိုပ်သ္ကိုပ်ပၞာန် ဟီုရ။
ကံၚ်ဇြဳပၞာန် သီကေတ်အဝဵုကၟိန်ဍုၚ်တုဲ မ္ဒးဆေၚ်ဒၟံၚ်မုက်ကဵု ပေါဲဗ္တိုက်ပၠန်ဂတးတံဂှ် သၞာံ ၂၀၂၅ ဏံ ကၠောန်ဗဒှ်အာပေါဲရုဲမာဲဏောၚ် ဟီုကြီုကၠုၚ်ဒၟံၚ် မွဲဏှမွဲဏှကီုလေဝ် အခိၚ်မကၠောန်ဗဒှ်အာ ချိုတ်တ်ပၠိုတ်တ်ဂှ်တှ်ေ ဒဵုအခိၚ်လၟုဟ် ကဵုကတိပါၚ်ဟွံမာန်ဏီရ။
ဆ္ဂး သွက်ဂွံစန်ဒက်မာဲဂှ် ညံၚ်ဂွံကၠောန်လဝ်ပရေၚ်ပလေဝ်ပလေတ်တံဂှ်ကီု၊ ကိစ္စရုဲစှ်ပ္တိုန်အာ ပ္ဍဲကၠတ်ထဝ်တံဂှ် အခိၚ်ဒးကျကၠုၚ် ၉၀ ဍုၚ်ပြၚ်မှ ဟီုကၠုၚ်လဝ် ကုဗော်ပရေၚ်ဍုၚ်ကွာန်တံရ။
မာန်အံၚ်ပျဳသဵု ဥက္ကဌဗော်ဒဳမဝ်ကရေတ်တေတ်ကောန်ဂကူကရေၚ် မဂွံလဝ်အခေါၚ်ပ္တိုန်စရၚ်ဗော်ဂှ်တှ်ေ အကာဲအရာပရေၚ်ဂီုကၠီုသာ်လဵုဒှ်ဒှ် ဒးလုပ်စိုပ်ပြိုၚ်ပ္ကာန်အာပေါဲရုဲမာဲဂှ်ရ အရာမကၠောန်မာန်တံဂှ် ကၠောန်အာဏောၚ်ဂှ် ဟီုရ။
“နကဵုသၞောဝ်မ္ဂး ပိုယ်တံ ဒးလုပ်ပြိုၚ်အာပေါဲရုဲမာဲတွဵုဏောၚ်။ အကာဲအရာပရေၚ်ဂီုကၠီု ခိုဟ်တှ်ေခိုဟ်ဏောၚ်၊ ဟွံခိုဟ်တှ်ေ ဟွံခိုဟ်ပုဟ်။ ဆ္ဂး ပိုယ်တံဂှ်တှ်ေ အတိုၚ်လၟိဟ်မစၟတ်လဝ် ညံၚ်ဂွံဒှ်ဂှ် ဒးလုပ်ပြိုၚ်ဏောၚ်။ ကဆံၚ်တွဵုရးတှ်ေ အောန်အိုတ် ညးစၞးပိတၠ ဒးလုပ်ပြိုၚ်ဏောၚ်။ အရာဏံဂှ် ပိုယ်တံ ဒးရေၚ်တၠုၚ်အာရ။ ၜိုတ်အကာဲအရာဂီုကၠီုကဵုဂှ် မိက်ဂွံကၠောန်လေဝ် ကၠောန်ဏောၚ်၊ ဒၞါဲကၠောန်ပေါဲရုဲမာဲ ဟွံမာန်တံဂှ်လေဝ် နွံတှ်ေနွံဏောၚ်။ ပိုယ်တံဂှ်တှ်ေ ဗီုဇကုကဵုဇကု ရံၚ်အကာဲအရာဂီုကၠီုတုဲ အရာမကၠောန်မာန်ဂှ် ကၠောန်အာဏောၚ် စဳဇန်လဝ်ရ” သာ်ဝွံ သ္ဂးရ။
နကဵုဗော်ဂှ်တှ်ေ စပ်ကဵုပေါဲရုဲမာဲဏံတုဲ ဒစးဒုၚ်ပလေဝ်ပလေတ်လဝ် ၜိုတ်ဒးရးတုဲ ကောန်ဗော်ပြးဒၟံၚ်တံဂှ်လေဝ် ကလေၚ်ပကောံဒၟံၚ်ရောၚ် ညးဆက်ဟီုရ။
အခိၚ်လၟုဟ် ဟိုတ်နူကြုက်ပ္ညဳပ္ညပ်ကဵုတုဲ ကံၚ်ဇြဳပၞာန် ဒေါအ်လဝ်ပန်ပှော် ကုဒပ်ကဝ်က MNDAA တုဲ ဆက်တုဲလေဝ် ကုဒပ်တအာၚ် TNLA ၊ ဒပ်ရခေၚ် AA တံဂှ်လေဝ် သွက်ဂွံသဳကၠဳအာ အပ္ဍဲဂိတုဖေဖဝ်ဝါရဳဏံ နွံဒၟံၚ်ရ။
ပ္ဍဲကဵုကောံဓရီုဂီုကၠီုစဵုဒၞါတုဲကၠုၚ်တေံ စပ်ကဵုပေါဲရုဲမာဲ ညးတံမသ္ကိုပ်သ္ကကၠောန်ဗဒှ်အာဂှ်တုဲ ကလိဂွံလဝ် ထံက်ဂလာန်ဍုၚ်သ္အာၚ်တံတုဲဂှ် က္ဍိုပ်သ္ကိုပ်ပၞာန် ဟီုပ္တိတ်လဝ်ရ။
ဂကောံလ္ၚတ်မၚ်ရံၚ် အပ္ဍဲဍုၚ်၊ မ္ၚးဍုၚ်တံဂှ်လေဝ် သွက်ဂွံကဵုအခေါၚ်မၚ်ရံၚ်လ္ၚတ်တံဂှ် သဳကၠဳလဝ်ရောၚ် သ္ဂးရ။
ဍုၚ်လဵုရောဟီုဂှ် ဟွံဟီုပ္တိတ်လဝ်ကီုလေဝ် စပ်ကဵုပေါဲရုဲမာဲတုဲ ဍုၚ်ကြုက်ကဵု ဍုၚ်ရုယှာတံ ရီုဗၚ်ကဵုအာဏောၚ်ဂှ် လ္ပာ်ကံၚ်ဇြဳပၞာန် လလောၚ်ပ္တိတ်လဝ်ပရိုၚ် ကၞောတ်သၞာံတုဲကၠုၚ်တေံရ။
ဂကောံဇြဟတ်ပၠန်ဂတးတံဂှ်တှ်ေ ဂကောံပၞာန် ဂွံကၠောန်ဗဒှ်ပေါဲရုဲမာဲဂှ် အခေါၚ်အဝဵုလေဝ်ဟွံမွဲ အကာဲအရာပရေၚ်ဍုၚ်ကွာန်လၟုဟ်ဂှ်လေဝ် အကာဲအရာကၠောန်ဗဒှ်ပေါဲရုဲမာဲမာန်ဟွံသေၚ်ပုဟ်ဂှ် ဂကောံမသုန်ဂကောံ ပါလုပ်သီုကဵု NUG, CRPH တံ ထံက်ထ္ၜးလဝ်ရ။
ပလေဝ်ပလေတ်ဒၟံၚ် ဂွံကၠောန်ဗဒှ်ပေါဲရုဲမာဲ ဗွဲအဓမ္မဂှ်ဝွံ ပ္တဝ်ဒၟံၚ်က္ဍိုပ် ကုဍုၚ်ဗၟာ ဂွံထ္ကးဏောၚ်တုဲ ပဋိပက္ခတံရ ဂၠိုၚ်ကၠုၚ်တုဲ ကဵုပရေၚ်ဟွံညိၚ်ဝတ်အပ္ဍဲဒေသ ဂွံမံက်ဂတဝ်ကၠုၚ်ဏောၚ်ဂှ်ရ သွက်ဂွံဝေၚ်ပါဲအိုတ်ဂှ် ပ္တိတ်ကၠုၚ်တၚ်လောၚ်တြးပံၚ်တောဲတုဲ ဖ္တိုက်ဖ္အောဝ်လဝ် ဍုၚ်သ္အာၚ်ဂမၠိုၚ်ရ။
ဥူဇြဳတူမံၚ် ညးမၞုံအခေါၚ်ဟီုဂး ကမ္မတဳသ္ပစၞးကၠတ်ထဝ်ကၟိန်ဍုၚ် CRPH ဂှ် ဍုၚ်လ္ၚဵုတံဂှ်တှ်ေ သောၚ်ကလးအာ အကြေပ်အဂြတ်ဍုၚ်ဗၟာ နကဵုပေါဲရုဲမာဲဂွံဏောၚ် ထေၚ်ဒၟံၚ်အိုတ်တုဲ သွက်ဂကောံပၞာန်ဂှ် ဒှ်အာပၞော်လုပ်ပရေၚ်ဍုၚ်ကွာန်မာန်ရောၚ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
“အကြေပ်အဂြတ် ပယျဵုဟွံညိၚ်ဝတ်တံ သာတုဲက္တဵုဒှ်ကၠုၚ်မာန်ဏောၚ်ဟီုဂှ် သွက်ဂွံဝေၚ်ပါဲအိုတ်ဂှ် ပိုယ်တံ ဖ္တိုက်ဖ္အောဝ်လဝ် ဗွိုၚ်ဍုၚ်သ္အာၚ်တံရ။ ညံၚ်ဟွံဂွံထံက်ဂလာန် ကုပေါဲရုဲမာဲ ဂကောံပၞာန်ဂှ်ရ။ ပိုယ်တံ ထံက်ထ္ၜးဒၟံၚ် အရာတံဏံ အဓိကရ။ ဍုၚ်သ္အာၚ်လ္ၚဵုတံ ညာတ်ဒၟံၚ်ဂှ်တှ်ေ အကြေပ်အဂြတ်ဍုၚ်ဗၟာလၟုဟ်ဂှ် သောၚ်ကလးကဵုနဲကဲပေါဲရုဲမာဲဂွံဏောၚ် ညးတံ ထေၚ်ဒၟံၚ်အိုတ်ရ။ ဍာံဍာံဂှ် ညအ်ဂှ် ပၞော်တိတ်ပရေၚ်ဍုၚ်ကွာန်ဂကောံပၞာန်တံဟွံသေၚ် ဒှ်အာပၞော်လုပ်ပရေၚ်ဍုၚ်ကွာန်မာန်ဏောၚ်။ ပၞော်လုပ်ပရေၚ်ဍုၚ်ကွာန်ဟီုဂှ် ဒှ်အာပေါဲရုဲမာဲ မကလေၚ်ဂယိုၚ်ပ္တိုန် သၞောဝ်သ္ဇိုၚ် ၂၀၀၈ ဂှ်မာန်ဏောၚ်” သာ်ဝွံ သ္ဂးရ။
ညံၚ်ကၟိန်ဍုၚ်ပံၚ်ကောံဖေဝ်ဒရာဒဳမဝ်ကရေဇြဳ ဂွံမံက်ဂတဝ်ကၠုၚ်ဂှ် ဗ္တိုက်ပ္တိတ်ပရေၚ်ပၞာန်သီအဝဵုဂှ်တုဲ အဓာန်အနာဂတ်တေံ ပရေၚ်ဒပ်ပၞာန် မပါလုပ်ဒၟံၚ် ပ္ဍဲပရေၚ်ဍုၚ်ကွာန် ညံၚ်ဂွံအိုတ်အး မပါလုပ် တၚ်ဒတူလိုၚ်ပရေၚ်ဍုၚ်ကွာန် ၆ သာ်ဂှ် ဂကောံမသုန်ဂကောံ သီု NUG, CRPH တံပါလုပ်ဂှ် ဖျေံစၟတ်လဝ်ရ။
ဂကောံရပ်လွဟ်သီုဖအိုတ် ညံၚ်ဂွံစွံ သၟဝ်အုပ်ဓုပ်ကောပ်ကာဲ အလဵုအသဳကောန်အရာပ် မရုဲစှ်ပ္တိုန်လဝ် နကဵုနဲကဲဒဳမဝ်ကရေဇြဳဂှ် ပေၚ်ၚ်ကီု၊ သွက်ဂွံဗ္တိုက်ပလီု သၞောဝ်သ္ဇိုၚ် ၂၀၀၈ ကေုာံ သွက်ဂွံဗ္တိုက်သရိုဟ် အရာမပ္တိတ်ဒၟံၚ်ဇြဟတ် ညံၚ်ဂွံကလေၚ်ဂယိုၚ်ပ္တိုန်သၞောဝ်သ္ဇိုၚ်တံ ပါလုပ်ရ။
သွက်ဂွံချူခၞံ စၞောန်ပျး သၞောဝ်သ္ဇိုၚ်မဒုၚ်သ္ဇိုၚ်ကဵု သၞောတ်ဖေဝ်ဒရာ ကေုာံ ဒဳမဝ်ကရေဇြဳ ဂကောံမဆက်စပ်သီုဖအိုတ် မဒုၚ်တဲမွဲမာန်ဂှ်ကီု၊ ဗွဲမဗဗွဲကဵုသၞောဝ်သ္ဇိုၚ်တၟိဂှ် သွက်ဂွံဒက်ပ္တန် ကၟိန်ဍုၚ်ပံၚ်ကောံဖေဝ်ဒရာဒဳမဝ်ကရေဇြဳ မဒှ်ရ။
အပ္ဍဲပဋိပက္ခဏံ သွက်ညးမဒးဒုၚ်ကလိလောန်လဝ် အရာဟွံဗဗွဲကဵုသၞောဝ်တံဂမၠိုၚ် ပါလုပ်သီုကဵုပရေၚ်ပကီုပရာပ် မဒုၚ်သ္ဇိုၚ်ကဵုလ္တူလိၚ်၊ လ္တူတြုံဗြဴတံဂှ် ညံၚ်သ္ဂောံကလေၚ်ဂွံဗဗွဲဓဝ်ဂှ်ကီု၊ သွက်ဂွံထ္မံက်အာ လၟေၚ်ကမၠောန်ပရေၚ်ဗဗွဲဓဝ် အခိၚ်ကာလအပြံၚ်အလှာဲတံဂှ် စုတ်လဝ် ပ္ဍဲတၚ်လလောၚ်တြးဂှ်ရ။
ပရိုၚ်−သြၚ်လောန်တိုၚ်(မ်)
ဗီု−Social Media