နေဗျဳဒဝ်၊ ဖေဖဝ်ဝါရဳ ၇
ဟိုတ်နူ ကဵုပၟတ်ဓာတ်လလဳပေၚ်ၚ်ဟွံမာန်ဂှ်တုဲ နကဵုတၠကမၠောန်အဇာဍောတ်၊ အဇာလဒေါဝ် MSME ဂမၠိုၚ် စုတ်သၞောတ်သဵုလာတုဲ သွက်ဂွံကၠောန်ကလောန်အိုတ်ဂှ် ဒုက္ဍိုပ်သ္ကိုပ်ပၞာန်သီအဝဵု ဒုသ္ကိုပ်ဗိုလ်ဇၞော် သဵုဝေန် ဟီုရ။
စပ်ကဵုပရေၚ်သ္ဂောံဂွံပၟတ်ဓာတ်လလဳ တၠကမၠောန်ဂမၠိုၚ် မပ္တိုန်ထ္ၜးကၠုၚ် ပ္ဍဲကောံဓရီုပ္ညဳပ္ညပ်ကမၠောန် သ္ဂောံကၠောန်ဗဒှ်ပေါဲပြိုၚ် ကေုာံ ပေါဲထ္ၜးဗၞိက် MSME ကဆံၚ်ကၟိန်ဍုၚ် မကၠောန်ဗဒှ်လဝ် ပ္ဍဲနေဗျဳဒဝ် ပ္ဍဲဂိတုဖေဖဝ်ဝါရဳ ၅ ဂှ်တုဲ ဒုက္ဍိုပ်သ္ကိုပ်ပၞာန် ဟီုဏာလဝ်ရ။
ဒုက္ဍိုပ်သ္ကိုပ်ပၞာန်ဂှ်တှ်ေ စုတ်ရပ်စပ်အာ သၞောတ်သဵုလာၚ်ဂှ်မ္ဂး သွက်ကမၠောန်ဂြောဝ်ဂတာညိညဂှ် ဂွံရပ်စပ်ဇြဟတ်ဓာတ်လလဳ ပေၚ်ၚ်မာန်တုဲ ဇြဟတ်ဓာတ် မပဵုဒၟံၚ်တံဂှ် သွံတြးအာ ဇရေၚ်ကၟိန်ဍုၚ်မာန်ရောၚ် သ္ဂးရ။
ပ္ဍဲရုၚ်သ္ကိုပ်က္ဍိုက်ပ်ပရေၚ်စဵုဒၞါဂှ်လေဝ် တုဲကၠုၚ်ၜါသၞာံတေံ စုတ်ရပ်စပ်ကၠုၚ်ဒၟံၚ် သၞောတ်သဵုလာ မၞုံ ၂၀ မဂ္ဂါဝက်ဂှ်တုဲ အပ္ဍဲပွိုၚ်မွဲသၞာံဘာ်ကၠုၚ်စိုပ်ဏံ ဒှ်အခိၚ်တမ်ပြေဏောၚ်ဂှ်ရ သြန်မ္ဒးအိုတ် သွက်သဵုလာတံဂှ်ဝွံ အပ္ဍဲမွဲၜါသၞာံဂှ် တမ်ဍေံပြေမာန်ရောၚ် ဒုက္ဍိုပ်သ္ကိုပ်ပၞာန် ဟီုရ။
တၠကမၠောန်မွဲတၠဂှ်တှ်ေ ကမၠောန် MSME တံဝွံ ဒးဓလိုက်ကၠုၚ်ဒၟံၚ်တမ်ရိုဟ်ဂၠိုၚ်ကၠုၚ် နူကဵုကၠာတေံ စဵုကဵုၜိုတ် ၇၀ တၟံကၠံဂှ်တုဲ နကဵုကမၠောန်ဍောတ်တ်ဂမၠိုၚ် ဂွံထပ်ဓလိုက်တမ်ရိုဟ် ဂၠိုၚ်နူဏံဂှ် ဒှ်ဟွံမာန်ပုဟ်ဂှ် ဟီုရ။
“ ဒးဟီုသောၚ်ၚ်မ္ဂး သာ်လဵုမှ ဒှ်ဟွံမာန်ပုဟ်။ ကၠောန်ပရေၚ်တဵုလွဳကဵုဒှ် ကၠောန်ပရေၚ်လွဳတိရစ္ဆာန်ဒှ်ဒှ် ဒးကေတ်ပၟတ်ဓာတ်လလဳ မဒှ်သ္ဇိုၚ်ဂှ်ဏောၚ်။ တမ်ရိုဟ်သ္ဇိုၚ် သြန်လှုဲတံ ဒးကေတ်ဏောၚ်။ လၟုဟ်ဂှ်တှ်ေ တမ်ရိုဟ်ဂှ် ဂၠိုၚ်တိုန်ကၠုၚ် စဵုကဵု ၇၀ တၟံကၠံရ။ ကမၠောန်ကွတ်စက်ဍောတ်တ် ပရေၚ်ကၠောန်ပ္တိတ်ဍောတ်တ်တံဂှ် ပရေၚ်ဓလိုက်တမ်ရိုဟ် ပ္ဍဲသဵုလာဏံဂှ်တှ်ေ ဒးရပ်စပ်အာဂၠိုၚ်နူကဵု ၂၀ ဆဏောၚ်ဟီုမ္ဂး သာ်လဵုမှ ဒှ်ဟွံမာန်ပုဟ်” သာ်ဝွံ သ္ဂးရ။
တၠကမၠောန်မွဲတၠပၠန်ဂှ်လေဝ် သၞောတ်သဵုလာဝွံ သွက်ကမၠောန်ဂြောဝ်ဂတာ ကမၠောန်ဍောတ်တ်တံဂှ် ခရိတ်အိုတ်ဂၠိုၚ်တုဲ ဟွံပြေပြံၚ်ပုဟ်ဂှ် ဟီုရ။
ဒုက္ဍိုပ်သ္ကိုပ်ပၞာန်ဂှ်တှ်ေ နကဵုအလုံဍုၚ်မွဲဂှ် ပရေၚ်ကၠောန်ပ္တိတ်ဇြဟတ်ဓာတ်လလဳ ၜိုတ် ၆၃၀၀ မဂ္ဂါဝက်ပြၚ် နွံကီုလေဝ် သ္ပဟိုတ်နူကဵုဟိုတ်နာနာသာ်တုဲ ဒေါအ်ဒေၚ်ဒၟံၚ်ကီု၊ ဟိုတ်နူလၟေၚ်ဒဒှ်ပရေၚ်ပကီုပရာပ်တံတုဲ ရုၚ်စက်မ္ဒးဒေါအ်ဇူဒၟံၚ် ပရေၚ်ကၠောန်ပ္တိတ်တံ နွံဂှ်ရ ပၟတ်ဓာတ်လလဳဂှ်တှ်ေ ကဵုအာ နကဵုအလန်ရမာန်ဂှ် ဒုၚ်လဝ်ဝန်ရ။
ဟိုတ်ဂှ်ရ နကဵုတၠကမၠောန် MSME ဂမၠိုၚ် ပ္ဍဲကဵုရးဒေသဇၞော် ကေုာံ တွဵုရး မဆေၚ်စပ်တံဂှ် ပ္ဍဲကဵုတိပလး ဒၞါဲဒေသအပိုၚ်အခြာကမၠောန်ကွတ်စက်တံ၊ ပ္ဍဲဒၞါဲတိပလး တိအရိုၚ်တၞဟ်ဟ်တံဂှ် ဗဂပ်စုတ်သဵုလာတုဲ ညံၚ်ဂွံဂွံဇြဟတ်ဓာတ်လလဳဂှ် ဒုက္ဍိုပ်သ္ကိုပ်ပၞာန် ဟီုကဵု တၠကမၠောန်ဂမၠိုၚ်ရ။
ပရိုၚ်−သြၚ်လောန်တိုၚ်(မ်)
ဗီု−MOI/CJ