တၞၚ်သဳ၊ ဖေဖဝ်ဝါရဳ ၇
အပ္ဍဲပေါဲဗ္တိုက်ပွိုၚ်ဍုၚ်တၞၚ်သဳ ရးတၞၚ်သဳ ပေါဲဗ္တိုက်ၜါလ္ပာ်တံ မကလေၚ်သ္ကာတ်မြဟ်ဒၟံၚ်ဂှ် လ္ပာ်ကံၚ်ဇြဳပၞာန် ကလေၚ်တဝ်စၞေဟ်ဗ္တိုက်ဒၟံၚ်ကဵု ပၞာန်ကျာ ဗွဲမသ္ကာတ်မြဟ်ရောၚ် ဒပ်ပၠန်ဂတးတံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
စနူဂိတုဖေဖဝ်ဝါရဳ ၁ တုဲကၠုၚ်တေံတုဲ ပ္ဍဲကဵုကွာန် (ထုံမခါ) ကဵု ကွာန် (သိန်းခွန်) ပွိုၚ်ဍုၚ်တၞၚ်သဳဂှ် အကြာဒပ်ကံၚ်ဇြဳပၞာန်ကဵု ဒပ်ပံၚ်ကောံ ဂကောံဇြဟတ်ပၠန်ဂတးတံ ပေါဲဗ္တိုက်ၜါလ္ပာ် ကလေၚ်က္တဵုဒှ်ဒၟံၚ်ရ။
အပ္ဍဲပေါဲဗ္တိုက် မက္တဵုဒှ်လဝ် ပ္ဍဲဂိတုဖေဖဝ်ဝါရဳ ၃၊ ၄၊ ၅ တံဂှ် လ္ပာ်ကံၚ်ဇြဳပၞာန် ကၠုၚ်စိုပ်ထောံဏာလဝ်မခတိုဟ် နကဵုက္ၜၚ်ကျာ ဟွံအောန်နူ မသုန်ဝါရ။
လ္ပာ်ကံၚ်ဇြဳပၞာန် ဗ္တိုက်ထောံဏာလဝ်မခတိုဟ် နကဵုက္ၜၚ်ကျာကီုလေဝ် လ္ပာ်ဂကောံပၠန်ဂတးတံ ဇီုကပိုက်ကလိဂွံဝပ် ဟွံမွဲဏီပုဟ်ဂှ် ညးဒုၚ်တာလျိုၚ် ဂကောံဒပ်စဵုဒၞါညးဍုၚ်ကွာန်ခရိုၚ်ဗိက် ပကဖ ကိုဝ်လယံၚ် ဟီုရ။
ဒပ်ကံၚ်ဇြဳပၞာန် မဒးဂိဒၟံၚ် အပ္ဍဲပေါဲဗ္တိုက်ၜါလ္ပာ်ဂှ်ဝွံ ပ္ဍဲဂိတုဖေဖဝ်ဝါရဳ ၃ ဂှ် စံၚ်ပလီုဏာလဝ် သ္ၚိဒၟံၚ်ညးဒေသ ကွာန်(ထုံမခါ) ဟွံအောန်နူကဵု တြဴမရ။
ဒပ်ကံၚ်ဇြဳပၞာန် မပ္တိတ်ဒၟံၚ်ဇြဟတ် ဂွံကလေၚ်ထိၚ်ဒက် ဂၠံၚ်ပျဳထံၚ်သု တၞၚ်သဳ−မဝ်ဒံၚ်ဂှ်ဝွံ ပပ္တံနူသၞာံတုဲကၠုၚ် ဂိတုဒဳဇြေမ်ဗာ ၁၈ ဂှ်တုဲ ထ္ပက်ကရောၚ်ပၞာန် လုပ်စိုပ်ကၠုၚ် နကဵုဇြဟတ်လၟိဟ် ဗွဲမဂၠိုၚ်ဂၠေၚ်ရ။
ကရောံဒပ်ကံၚ်ဇြဳပၞာန် ထ္ပက်ကၠုၚ်ကရောၚ်ပၞာန်ဂှ် ဟိုတ်နူပေါဲဗ္တိုက်ၜါလ္ပာ်တံတုဲ ညးဒေသဂၠိုၚ်ကဵုလ္ၚီ နူကဵုကွာန်ဍာ်ဗု၊ ထုံမခါ၊ သိန်းခွန်၊ ချောၚ်းနှစ်ပေါက်၊ သိန္နောတံ ဒးပါဲဘဲပၞာန်တုဲ ဒဵုကဵုအခိၚ်လၟုဟ် စဴဌာန်ဒၟံၚ်ဟွံမာန်ဏီရ။
ပရိုၚ်−သြၚ်လောန်တိုၚ်(မ်)
ဗီု−Social Media