ကျာ်ထဝ်၊ ဖေဖဝ်ဝါရဳ ၈
တွဵုရးဍုၚ်မန် ပွိုၚ်ဍုၚ်ကျာ်ထဝ် ပ္ဍဲကဵုကွာန်အရာပ်တံဂှ် လ္ပာ်ကံၚ်ဇြဳပၞာန် စကော်ကၠုၚ်ဒၟံၚ် ညးလုပ်ယိုက်ဝန်ပၞာန်တံဂှ်တုဲ ညးမကလိဂွံလိက်ကော်ဘိက်တံ အပ္ဍဲပွိုၚ် ၁၅ တ္ၚဲ သွက်ဂွံပလံၚ်ပရိုၚ်အိုတ်ဂှ် စၞောန်ပ္ညုၚ်ကၠုၚ်ရောၚ် ညးဒေသတံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ပ္ဍဲဂကောံပံၚ်ကောံကံၚ်ဇြဳပၞာန် ဒပ်ကံၚ်ဇြဳပၞာန်၊ ပၞာန်မၚ်ကွာန် ကေုာံ အုပ်ဓုပ်ကွာန်အရာပ် မဆေၚ်စပ်တံ မပါလုပ်ဂှ်ဝွံ စနူဂိတုဖေဖဝ်ဝါရဳမံက်တုဲ ဗက်ပလံၚ်ဗစိုပ်ဒၟံၚ် လိက်ကော်ဘိက်သ္ဂောံယိုက်လျိုၚ်ပၞာန် ဇရေၚ်ညးဍုၚ်ကွာန်တံရ။
ပ္ဍဲအရာကော်ဘိက်သ္ဂောံယိုက်လျိုၚ်ပၞာန်တံဂှ် အပ္ဍဲပွိုၚ် ၁၅ တ္ၚဲ သွက်ဂွံပလံၚ်ပရိုၚ် ကုဂကောံကော်ဘိက်ဂွံလုပ်ပၞာန် ကဆံၚ်ပွိုၚ်ဍုၚ်တံဂှ် စၞောန်ကၠုၚ်လဝ်ရ။
အတိုၚ်ဂလာန် ညးဒေသကျာ်ထဝ်တံဂှ်မ္ဂး သွက်တန်ဗ္တောန်ကွတ်ပၞာန် လၟေၚ် (၁၀) ဂှ် မွဲအရာပ်မ္ဂး ပလံၚ်ဗစိုပ်ကၠုၚ် လိက်ကော်ဘိက် ဗွဲတွဵုမအောန် မၞိဟ်မသုန်တၠဂှ် ဂွံတီကေတ်ရ။
အခိၚ်လၟုဟ် သၟတ်ဗွဲမဂၠိုၚ် မကလိဂွံလိက်ဘိက်သ္ဂောံလုပ်ပၞာန်တံ ဒစးဒုၚ်ပါဲဒလေတ်ဒၟံၚ်တံ နွံတုဲ သၟတ်သှ်ေလ္ၚဵုတံဂှ်တှ်ေ မၚ်ရံၚ်ဒၟံၚ်အကာဲအရာနွံရောၚ် သ္ဂးရ။
အတိုၚ်သၞောဝ်ယိုက်လျိုၚ်ပၞာန်ဂှ်မ္ဂး ဇၟာပ်ညးအဝဲစိုပ်တုဲ လုပ်ပၞာန်ဂွံတံဂှ် အခိၚ်ကော်ဘိက်ကၠုၚ် သွက်ဂွံပ္တိုန်စရၚ်ဂှ် ညံၚ်ဂွံကၠုၚ်စိုပ်ဂှ်ကီု၊ ယဝ်ဟွံကၠုၚ်မ္ဂး ဂၠိုက်ဂၠါဲစၟဳတ်အာ ဇရေၚ်ဂြောဝ်ဂတာတံဏောၚ်တုဲ ညးကၠုၚ်ဟွံစိုပ်တံဝွံ ဒးဒုၚ်ဖျေံအာဒဏ်ထံၚ် စဵုကဵုပိသၞာံမာန်ရ။
အတိုၚ်သၞောဝ်ယိုက်လျိုၚ်ပၞာန် မစၞောန်ပျးလဝ် သၞာံတုဲကၠုၚ် ပ္ဍဲဂိတုဖေဖဝ်ဝါရဳ ၁၀ တေံဂှ်မ္ဂး ဇၟာပ်ကောန်ဍုၚ် အကြာအာယုက် ၁၈ စဵုစိုပ် ၃၅ ဟွံဒေါအ်ဟွံဂွံ ဒးယိုက်အာလျိုၚ်ပၞာန် အောန်အိုတ် နူ ၂ သၞာံ စဵုကဵု ၅ သၞာံ မဒှ်ရ။
သၞောဝ်ဏံဝွံ ကၠာဟွံဂွံစၞောန်ပျးနဲသၞောဝ်ဥပဒေတေံဂှ်ရ ရဲဂကောံကော်ဘိက်သ္ဂောံလုပ်ပၞာန်တံ ရပ်စပ်ကၠုၚ်နဲကဲနာနာသာ်တုဲ ပကောံကၠုၚ်ဒၟံၚ်ကောန်ဒပ် ပံက်ကၠုၚ်လဝ် တန်ဗ္တောန်ကွတ်ပၞာန် စဵုကဵု လၟေၚ် ၉ ရ။
ပရိုၚ်−သြၚ်လောန်တိုၚ်(မ်)
ဗီု−CJ