ရေဝ်၊ ဖေဖဝ်ဝါရဳ ၈
ပ္ဍဲတွဵုရးဍုၚ်မန် ပ္ဍဲဗ္ဒိုပ်ဗၠာဲသၟိၚ်ၝောံဍုၚ်ရေဝ် လ္တူဍုၚ်ရေဝ်ဂှ် ကြဴနူက္တဵုဒှ်ပရေၚ်ပန်ပှော်တုဲ ကၟာတ်လဒဵုလဝ်ကောန်ဒုဟ်ဂမၠိုၚ် နူကဵုအခေါၚ်ဆဵုကၟုဲကဵု အခေါၚ်ပလံၚ်ဗစိုပ်စၞစသုၚ်တံ ဒဵုဟွံတီတ္ၚဲကလေၚ်ရုပ်သီဂှ် ဂွံတီကေတ် ဇရေၚ်ညးမစုက်လုက်ကဵု ဗ္ဒိုပ်ဗၠာဲသၟိၚ်တံရ။
တုဲကၠုၚ်ပ္ဍဲဂိတုဖေဖဝ်ဝါရဳ ၁ တေံ ပ္ဍဲဗ္ဒိုပ်ဗၠာဲသၟိၚ်ၝောံဍုၚ်ရေဝ်ဂှ် အခိၚ်ကၠုၚ်ပလံၚ်ပုၚ် ပ္ဍဲဗ္ဒမ်အချုက်တံဂှ် ကောန်ဒုဟ်ဂမၠိုၚ် ပၠံၚ်လွဟ်နူဒပ်ဗၠာဲသၟိၚ်တုဲ ပန်ပှော်ဂြိပ်တိတ်အာဂှ်တုဲ မ္ၚးနူကဵုကောန်ဒပ်ဗၠာဲသၟိၚ်တံဂှ် ကောန်ဒုဟ်တံလေဝ် ဇီုကပိုက်ချိုတ်အာလဝ်ရ။
ကြဴနူလၟေၚ်ဒဒှ်ဏံက္တဵုဒှ်တုဲဂှ် ဗ္ဒိုပ်ဗၠာဲသၟိၚ် ကၟာတ်လဒဵုကၠုၚ်လဝ် အခေါၚ်ဂြောဝ်ဂတာကောန်ဒုဟ်ဂမၠိုၚ် ဂွံဆဵုကၟုဲ၊ ဂွံပလံၚ်စၞစသုၚ် ကေုာံ ကၟာတ်လဒဵုလဝ်သီုကဵုဂဥုဲဇဗရ။
ဟိုတ်နူကၟာတ်လဒဵုလဝ် အခေါၚ်ဆဵုကၟုဲတံဂှ်တုဲ ဂြောဝ်ဂတာတံဂှ်တှ်ေ ဒှ်ဒၟံၚ်ဓဝိၚ် သွက်အန္တရာယ်လမျီုကောန်ဒုဟ်တံဂှ် နွံဒၟံၚ်ရ။
ကြဴနူဒှ်ပန်ပှော်တုဲဂှ် ညးသံသယနွံ ဒဒှ်ရပါလုပ်အပ္ဍဲပရေၚ်ပန်ပှော်တံကီု ညးမဒးဆေၚ်မုက် ကုဂဗုတ်ၝောံပိုဒ်ပကီုပရာပ်တံဂှ် ဆုဲပြံၚ်လဝ် ဇရေၚ်ကရောၚ်ပၞာန် ဒပ်ကံၚ်ဇြဳပၞာန်ဂှ် ညးမစုက်လုက်ကဵု ဗ္ဒိုပ်ဗၠာဲသၟိၚ်တံ ဟီုရ။
ပ္ဍဲပရေၚ်ပန်ပှော်ဗ္ဒိုပ်ဗၠာဲသၟိၚ်ၝောံဍုၚ်ရေဝ်ဂှ် ဒုဂအုပ်ဗၠာဲသၟိၚ် နာၚ်လွေန်ဥူ၊ အကြာပ်ဒပ်ဗၠာဲသၟိၚ် မျေတ်ထောန်၊ ကောန်ဒပ်ဗၠာဲသၟိၚ် ကျဝ်ဇြဲထက်ကဵု ကောန်ဒုဟ်မွဲတၠ ချိုတ်အာလဝ်တုဲ ကောန်ဒုဟ်ကလေၚ်ဒးဒုၚ်ရပ်လဝ်တံဂှ်တှ်ေ လ္ပာ်ကံၚ်ဇြဳပၞာန် ပန်ဂစိုတ်လဝ်ဂှ် ဂၠိုက်ဂၠါဲဂွံတီကေတ်ရ။
အပ္ဍဲအချုက်ဗ္ဒိုပ်ဗၠာဲသၟိၚ်ၝောံဍုၚ်ရေဝ်ဂှ် ကောန်အချုက် ဒးဒုၚ်ရပ်လဝ် နကဵုၝောံပိုဒ်ပရေၚ်ဍုၚ်ကွာန်၊ ၝောံပိုဒ်ပကီုပရာပ်တံကဵု ဂဗုတ်တၞဟ်ဟ်တံ နွံဒၟံၚ်ဗၞတ် ၁၀၀ ဂှ် ဂွံတီကေတ် ဇရေၚ်ညးမစုက်လုက်ကဵု ဗ္ဒိုပ်ဗၠာဲသၟိၚ်တံရ။
ပရိုၚ်−သြၚ်လောန်တိုၚ်(မ်)
ဗီု−CJ