ဝါယှေန်တာန်၊ မာတ် ၁၄
ကြဴနူသမ္မတထြာမ် လလောၚ်တြးကၠုၚ် ဒဒှ်ရကံက်အာအခေါန်ဖလှာ လ္တူဗၞိက်ပၠောပ်ဂမၠိုၚ် မပ္တံကဵုပသဲက္ဍာၚ်၊ ဖကောဝ် ကပေါတ်မလုပ်စိုပ်ကၠုၚ်အမေရိကာန်တံဂှ်တုဲ နကဵုသမဂ္ဂယူရောပ် EU ကေုာံ ကနေဒါတံ ကလေၚ်ပၠန်ကၠုၚ်တဲ နွံကီုလေဝ် သမ္မတထြာမ်ဂှ်တှ်ေ ဒဒှ်ရဂွံထပ်ကံက်ဂလိုၚ်ပ္တိုန်အာ အကံက်အခေါန်တံဂှ် ဟီုကြီုကၠုၚ်လဝ်ပၠန်ရ။
အစဳဇန်ကလေၚ်ပၠန်တဲဂှ်တှ်ေ ဂိတုဂတဏံ ထံပ်ကံက်ဂလိုၚ်ပ္တိုန်အာအခေါန်ဖလှာ အလုံဂၠးမွဲ ဍုၚ်နာနာတံဂှ်ဏောၚ်ဂှ် ထြာမ် ဟီုလဝ်ရ။
ပ္ဍဲဍုၚ်အမေရိကာန်ကီု ပ္ဍဲကဵုဍုၚ်အလုံဂၠးမွဲကီု အခိၚ်ဒှ်ဒၟံၚ်ဓဝိၚ်စပ်ကဵုပရေၚ်ဇီုကပိုက်ကၠုၚ်လ္တူပရေၚ်ပိုန်ဒြပ် ကေုာံ လ္တူညးရပ်စပ်စသုၚ်တံဂှ် ပေါဲပၞာန်ပရေၚ်သွံရာန်ဗၞိက် မဗချဳဓရိုက်ဏာ ဗွဝ်ဖျာပရေၚ်ဘဏ္ဍာဂှ် အသိၚ်သၠုၚ်တိုန်ကၠုၚ်ရ။
ပသဲက္ဍာၚ် ကေုာံ ဖကောဝ် လုပ်စိုပ်ကၠုၚ်အမေရိကာန်တံဂှ် ကံက်အာအခေါန် ၂၅ တၟံကၠံဏောၚ် ထြာပ် လလောၚ်တြးကၠုၚ်လဝ် ပ္ဍဲဂိတုမာတ် ၁၂ တေံရ။
လ္တူကပေါတ်ဗၞိက်ကြုက် မပၠောပ်ပ္တိုန်နၚ်တံဂှ်လေဝ် ကံက်အာအခေါန် ၂၀ တၟံကၠံဏောၚ် ထြာမ် လလောၚ်တြးလဝ်ရ။
ကြုက်ဂှ်တှ်ေ ပေါဲဗ္တိုက်ပရေၚ်သွံရာန်ဗၞိက်ဒှ်ဒှ် ပေါဲပၞာန်ဂကူသာ်လဵုဟွံဟီု ဗ္တိုက်အာကုအမေရိကာန် ဒဵုကၞောတ်တဲဏောၚ် ဟီုလဝ်ကီုလေဝ် ထြာမ် ကံက်ဂလိုၚ်ကၠုၚ်လဝ်အခေါန်ရ။
ပရေၚ်ထြာမ် ကံက်လဝ်အခေါန်ဂှ် အဳယူ ကေုာံ ကနေဒါတံ ခၠေဝ်ပလန်ကၠုၚ်ကီုလေဝ် ဍုၚ်ဗျိတိၚ်၊ အဝ်သတြေလျ၊ မက္ကသဳကိုဝ်၊ ဗရာဇြဳ ကေုာံ ဍုၚ်တၞဟ်သ္အာၚ် မပလံၚ်ပ္တိုန်ဒၟံၚ်ဖကောဝ် ပ္ဍဲအမေရိကာန် အဓိကတံဂှ်တှ်ေ ကလေၚ်ပၠန်ကၠုၚ်တဲဟွံမွဲဏီရ။
စနူဂိတုမာတ် ၁၃ တေံတုဲ ကံက်အာအကံက်ခေါန် လ္တူကပေါတ်ဗၞိက်အမေရိကာန် ၂၅ တၟံကၠံဏောၚ် သာ်ဝွံ ကနေဒါ လလောၚ်တြးလဝ်ရ။
အဳယူဝွံလေဝ် ပပ္တံနူဂိတုဨပရဴ ၁ တုဲ ကံက်ဂလိုၚ်ပ္တိုန်အာအခေါန်ဖလှာ လ္တူကပေါတ်ဗၞိက်အမေရိကာန်တံဏောၚ်ဂှ် လလောၚ်တြးလဝ်ရ။
အကံက်အခေါန်တံဏံဂှ်တှ်ေ သွက်ကမၠောန်ပရေၚ်ပိုန်ဒြပ်တံသၟးဟွံက သွက်ညးစသုၚ်ရပ်စပ်တံဂှ်လေဝ် သာတုဲပရေံစှ်ေကၠုၚ်လဝ်ဂှ် ဥက္ကဌအဳယူ ဗောန်ဒါ လေယာန် ဟီုလဝ်ရ။
ထြာမ် ကၠောန်ကၠုၚ်လဝ်သာ်ဏံ နကဵုတၚ်ရန်တၟံ သ္ဂောံသၠုၚ်ပ္တိုန်ပရေၚ်ကၠောန်ပ္တိတ် ပသဲက္ဍာၚ် ကေုာံ ဖကောဝ် ပ္ဍဲအမေရိကာန် သွက်ဍာ်ဇမၠိၚ်ဏောၚ် မဒှ်ရ။
Ref: BBC