ဂျက်ဒါ၊ မာတ်(၁၃)
ကြဴနူအမေရိကာန်ကဵု ယူကရုၚ်တံ သဳကဳၠပ္ဍဲဇြဝ်ဒဳအာရေဗဳယျာတုဲဂှ် သွက်ဂွံဒုၚ်တဲ တၚ်တုပ်စိုတ် သွက်ဂွံဒေါံပန်ပှော် ကုရုယှာလွာဲဂှ် ပွိုၚ်(၃၀)တ္ၚဲ အမေရိကာန်တံ ပ္တိုန်လဝ်ဂလာန်ဂှ် ဒှ်ဒၟံၚ်ဒတုဲရဂှ် ယူကရုၚ်ဟီုဂးလဝ်ရ။
တၚ်အာတ်မိက်ဏံဂှ် ပ္တိုန်ဏာကဵုရုယှာတံရောၚ်ဂှ် ဝန်ဇၞော်ကာဍုၚ်သ္အာၚ်အမေရိကာန် မာကိုရူဗဳယိုဂှ် ဟီုဂးလဝ်တုဲ တန်တဴဒၟံၚ်ကဵု ရုယှာတံရဂှ် ဟီုဂးလဝ်ကီုလေဝ် နန်ကရေန်မလေန်ဂှ် ဟွံကလေၚ်သှ်ခၠေဝ်လဝ်ဏီရ။
သွက်ဂွံစန်ဒက် ညံၚ်ရုယှာတံ သ္ဂောံဒုၚ်ကၠုၚ်တဲ တၚ်ပ္တိုန်ဂလာန်ဏံဂှ် တန်တဴဒၟံၚ်ကဵုအမေရိကာန်တံရဂှ် သမ္မတအမေရိကာန် ဗိုလိုဒဳမာ ဇြဳလာန်သကဳဂှ် ဟီုဂးလဝ်ရ။
တုဲကၠုၚ်ပ္ဍဲဂိတုဖေဖဝ်ဝါရဳ (၂၈)ဂှ် သမ္မတအမေရိကာန် ထရာမ်ကေုာံ သမ္မယူကရုၚ် ဇြဳလာန်သကဳတံ အရေဝ်ဂၠိုၚ်လဝ်ညးသကအ် ပ္ဍဲသ္ၚိဗုဂှ်တုဲ ပ္ဍဲဂိတုမာတ် စၟတ်တ္ၚဲ(၁၁)ဂှ် ဆဵုဂဗလဝ်ညးသကအ် ပ္ဍဲဍုၚ်ဂျက်ဒါဂှ် ဒှ်ပရေၚ်ဆဵုဂဗ အကြာၜါဍုၚ်တံ အလန်ကၠာအိုတ်ရ။
ပ္ဍဲတၚ်ပံၚ်တောဲလလောၚ်တြးဂှ်တှ်ေ အမေရိကာန်တံ ကလေၚ်ပါ်ပရအ်ကဵု ပရိုၚ်ထံၚ်ပရိုၚ်တံ ကုယူကရုၚ်တံရောၚ်တုဲ ကလေၚ်ကဵုအာအရီုဗၚ် ပရေၚ်ဂီုကီၠုတံလွာဲဂှ်ရောၚ်ဂှ် ထ္မံက်ထ္ၜးလဝ်ရ။
စၟဳကေတ် ရုယှာတံ ဒုၚ်တဲကဵု တၚ်ပ္တိုန်ဂလာန်ဏံရောၚ်ဂှ် ဝန်ဇၞော်ရူဗဳယိုဂှ် ဟီုဂးလဝ် ပ္ဍဲပေါဲသောၚ်ကလးပရိုၚ် မၞုံပ္ဍဲဍုၚ်ဂျက်ဒါဂှ်ရ။
သွက်ဂွံဒေါံပရေၚ်ပန်ပှော် အကြာရုယှာကေုာံ ယူကရုၚ်တံလွာဲဂှ်တုဲ သွက်ဂွံကၠောန်သ္ပအာ ပရေၚ်ပ္ညဳပ္ညပ်ဂှ် အမေရိကာန် ဂစာန်ဒၟံၚ်ရ။
အခိၚ်လၟုဟ်ဂှ်တှ်ေ နအလဵုရုယှာတံ ဆန္ဒမိက်သ္ဂောံကဵုပေါဲပၞာန်တံဒေါံနွံဟာ ဟွံသေၚ်မ္ဂး မိက်ဂွံဆက်ဗ္တိုက်ဟာဟီုဂှ် ဒးထ္ၜးရဂှ် သမ္မတဇြဳလာန်သကဳဂှ် ဟီုရ။
စပ်ကဵုတၚ်ပ္တိုန်ဂလာန်ဏံတုဲ ၜိုန်ရရုယှာတံ ခၠေဝ်သှ်လဝ်ဗွဲမလုပ်သၞောဝ် ဟွံမွဲကီုလေဝ် အမာတ်ကၠတ်ထဝ်ရုယှာ သြဇာဇၞော်မံၚ် မွဲတၠဂှ် ကေတ်တၚ်တုပ်စိုတ်မ္ဂး သ္ဒးဒှ်အတိုၚ်ရုယှာတံသၞောတ်ဗ္ၜတ်လဝ်ဂှ်ရောၚ်တုဲ ဟွံကေတ်တၚ်တုပ်စိုတ် နကဵုတၚ်သၞောတ်ဗ္ၜတ်အမေရိကာန်တံရောၚ်ဂှ် ဟီုဂးလဝ်ရ။
Ref:BBC