ဝါယှေန်တာန်၊ မာတ် ၂၀
အပ္ဍဲပရေၚ်သဳကၠဳတက်လဝ်ကျာကဵုဖုၚ် ပ္ဍဲဂိတုမာတ် ၁၈ တေံဂှ် ဒဝ်နေဝ်ထြာမ် ကေုာံ ပူတေန်တံ တုပ်လဝ်စိုတ် ညံၚ်ပရေၚ်ရုယှာ မဗ္တိုက်ဒၟံၚ်ပွန်ဇြဟတ်ဓာတ်ယူကရုၚ်တံ ဂွံဒေါအ်ဒေၚ်အာဂှ်ကီုလေဝ် တၚ်တုပ်စိုတ်ပရေၚ်ဒေါအ်ပန်ပှော် တၟံကၠံပေၚ်ၚ်ဂှ် ဟွံကလိဂွံလဝ်ရ။
က္ဍိုပ်သ္ကိုပ်အမေရိကာန် ကေုာံ ရုယှာတံဝွံ ဟီုဂးသဳကၠဳလဝ် ပွိုၚ်မွဲနာဍဳဘာ်ပြၚ်တုဲ ဒဒှ်ရစၟဳစလဝ် ညံၚ်ပရေၚ်ဆက်ဆောံၜါဍုၚ် ဂွံကလေၚ်ခိုဟ်တိုန်ကၠုၚ်ဂှ် သီုၜါလ္ပာ် ထ္မံက်ထ္ၜးလဝ်ရ။
ဆ္ဂး အပ္ဍဲပရေၚ်ဗ္တိုက်ၜက်ၜေတ်လဝ် ဍုၚ်ဇိုၚ်ဝုတ်ဒိုဟ် ဍုၚ်ယူကရုၚ် မဒှ်ဍုၚ်နွံပၟိက်ကဵုဍုၚ်ရးပလိုတ်တံဂှ် ဂလာန်အမေရိကာန်တံ ပ္တိုန်ထ္ၜးနၚ် ဂွံဒေါအ်ပန်ပှော် ပွိုၚ် ၃၀ တ္ၚဲဂှ် သမ္မတရုယှာ ဟွံတုပ်လဝ်စိုတ်ရ။
ပရေၚ်ဗ္တိုက်ဒၟံၚ် ပွန်ဇြဟတ်ဓာတ်ယူကရုၚ်တံဂှ် သွက်ဂွံဒေါအ်ဒေၚ်ပွိုၚ် ၃၀ တ္ၚဲဂှ် ပူတေန် တုပ်လဝ်စိုတ်တုဲ စၞောန်လဝ်ကဵုဒပ်ပၞာန်တုဲယျဂှ် နန်ကရေမ္မလေန် ဟီုရ။
က္ဍိုပ်သ္ကိုပ်ၜါတၠ တုပ်လဝ်စိုတ် ပရေၚ်ဂွံဒေါအ်ပန်ပှော် စပ်ကဵုစမြိုၚ်သ္ဇိုၚ် ကေုာံ ဇြဟတ်ဓာတ်တံဂှ်ကဵု သွက်ဂွံဆက်ရေၚ်တၠုၚ်အာ သ္ဂောံဂွံပရေၚ်ၜိုဟ်လလမ်ဂှ် သ္ၚိဗု ဟီုကၠုၚ်လဝ် ဗွဲတၞဟ်ခြာရ။
ဂလာန်အမေရိကာန် ပ္တိုန်ထ္ၜးကၠုၚ် သွက်ဂွံဒေါအ်ဒေၚ် ပရေၚ်ဗ္တိုက်ဒၟံၚ် စမြိုၚ်သ္ဇိုၚ်စပ်ကဵုဇြဟတ်ဓာတ်ရုယှာတံဂှ် ညးတံ ထံက်အာဂလာန်ဏောၚ် သမ္မတယူကရုၚ် ဗိုဝ်လိုဝ်ဒဳမာ ဇြဳလာန်သကဳ ဟီုလဝ်ကီုလေဝ် လ္ပာ်ရုယှာ သ္ပကၠုၚ်တၚ်အာတ်မိက်တၟိတၟိတုဲ ညံၚ်ပရေၚ်ပ္ညဳပ္ညပ် အမေရိကာန်က္ဍိုက်ပ်ဏံ ဂွံလဇုဲလဇ၊ ညံၚ်ယူကရုၚ် ဇြဟတ်ဂွံဍိုန်လျအာဂှ် ပ္တိတ်အာဇြဟတ်ရေၚ်တၠုၚ်အာဏောၚ်ဂှ် ကဵုလဝ်သတိရ။
သမ္မတဇြဳလာန်သကဳဂှ်တှ်ေ ဂလာန်ပ္တိုန်သာ်လဵုမွဲဟွံဟီု မပ္တဝ်အာက္ဍိုပ် လ္ပာ်ပရေၚ်ညိၚ်ဝတ်၊ ပရေၚ်ၜိုဟ်လလမ်တံဂှ်တှ်ေ ထံက်အာဂလာန်ဏောၚ်ဂှ် ဟီုတဴရ။
အပ္ဍဲပေါဲပၞာန်ပွိုၚ်ပိသၞာံဏံ ရုယှာ ဗ္တိုက်ကၠုၚ်လဝ် စမြိုၚ်သ္ဇိုၚ်ယူကရုၚ် မဆက်စပ်ကဵုဇြဟတ်ဓာတ်တံ ဗွဲမသ္ကာတ်မြဟ်ရ။
ယူကရုၚ် မဗ္တိုက်ထောံကၠုၚ်ဒၟံၚ်မခတိုဟ် ကုစမြိုၚ်ကၠေၚ်ဍေန်ရုယှာတံဂှ်လေဝ် ဒဒှ်ရတုပ်လဝ်စိုတ် သွက်ဂွံဒေါအ်ကၠေံ ပရေၚ်ဗ္တိုက် စွံပွန်ကုဇြဟတ်ဓာတ်တံဂှ် နန်ကရေမ္မလေန် ဟီုရ။
ပေါဲသဳကၠဳပရေၚ်ၜိုဟ်လလမ်လှဲလးမွဲ ဂွံစကၠောန်အာ ပ္ဍဲဒေသဗၟံက်သ္ကုတ်လဒေါဝ်တေံလွာဲဂှ်လေဝ် က္ဍိုပ်သ္ကိုပ်ၜါဍုၚ်တံ တုပ်လဝ်စိုတ်ရောၚ် ထ္မံက်ထ္ၜးလဝ် ပ္ဍဲတၚ်လလောၚ်တြးသ္ၚိဗုတုဲ အကြာအမေရိကာန်ကဵု ရုယှာ ပရေၚ်ဆက်ဆောံခိုဟ်ကၠုၚ်မ္ဂး အကာဲအရာခိုဟ်ကၠုၚ်တၟာဂလိုၚ်မာန်ရောၚ် ဟီုရ။
ဆ္ဂး တၚ်နၚ်အဓိက သွက်ပရေၚ်ၜိုဟ်လလမ်ဂှ်တှ်ေ အရီုဗၚ်ပရေၚ်ပၞာန်ဍုၚ်ပလိုတ်တံ၊ အရီုဗၚ်ထံၚ်ပရိုၚ် မကဵုဒၟံၚ်ယူကရုၚ်တံဂှ် ဒးဒေါအ်ဒေၚ်ကဵုဏောၚ် နန်ကရေမ္မလေန် ဟီုလဝ်ရ။
Ref: Agencies