ကိဗ်၊ မာတ် ၂၁
ဒၟါနူဍုၚ်ယူအေအဳ လုပ်ပ္ညဳပ္ညပ်ကဵုအကြာတုဲ ရုယှာ ကေုာံ ယူကရုၚ်တံ လှာဲဂတးလဝ် ဂၠုဲပၞာန် ၃၇၂ တၠဂှ် အလဵုအသဳၜါလ္ပာ် သ္ပဒတန်လဝ် ပ္ဍဲဂိတုမာတ် ၁၉ တေံရ။
ပ္ဍဲသၞာံ ၂၀၂၂ မံက်တေံ ကြဴနူရုယှာ ဗ္တိုက်ၜက်ၜေတ်ကၠုၚ် ယူကရုၚ်တုဲဂှ် ပရေၚ်လှာဲဂတး ဂၠုဲပၞာန်တံကဵု အရာမသှ်ေသၟေဟ် နူကဵုကောန်ပၞာန်မဒးပြဟ်လလုဲအာတံဂှ်ဝွံ ဒှ်ကၠုၚ်ပရေၚ်ပံၚ်တောဲမွဲ အကြာၜါဍုၚ်ဒှ်မံၚ်ပၞာန်ဏံဂှ်ရ။
သမ္မတအမေရိကာန် ဒဝ်နေဝ်ထြာမ် ကေုာံ သမ္မတရုယှာ ဗလာဒဳမာပူတေန်တံ သဳကၠဳတုဲ ဒဒှ်ရလှာဲဂတးလဝ်ကောန်ပၞာန်တံဂှ် နန်ကရေမ္မလေန် လလောၚ်တြးလဝ် ပ္ဍဲဂိတုမာတ် ၁၈ တေံရ။
ယူကရုၚ် လှဲပြံၚ်ကဵုလဝ် ကောန်ထံၚ်ရုယှာ ၁၇၅ တၠတုဲ ရုယှာဂှ်တှ်ေ ဗလးကဵုလဝ် ဂၠုဲပၞာန်ယူကရုၚ် ၁၇၅ တၠကဵု ကောန်ထံၚ်ယူကရုၚ် ကလိဂွံလဝ်ဝပ် မသ္ကာတ်မြဟ်တံဂှ် ဌာနဝန်ဇၞော်ကာစဵုဒၞါရုယှာ ဟီုလဝ်ရ။
ပၞောဝ်ကဵုပရေၚ်လှာဲဂတးဂၠုဲပၞာန်ဇၞော်အိုတ်ဂမၠိုၚ် ပရေၚ်လှာဲဂတးလၟုဟ်ဝွံ ပါလုပ်မွဲရောၚ် သမ္မတယူကရုၚ် ဗိုဝ်လိုဝ်ဒဳမာဇြဳလာန်သကဳ ဟီုလဝ်တုဲ ကောန်ပၞာန်ယူကရုၚ် ကလေၚ်ဗၠးကၠုၚ်တံဂှ် ရုယှာ ဖျေံလဝ်ဒုဟ်ဒဏ် နကဵုဂဗုတ်ရာဇဝတ် မဟွံဍာံပြတံဂှ်ရောၚ် ဟီုရ။
ကောန်ပၞာန်ယူကရုၚ် ကလေၚ်ဗၠးကၠုၚ် ပ္ဍဲဂိတုမာတ် ၁၉ တေံဂှ် ဒှ်ညးလုပ်လဝ်ပေါဲဗ္တိုက် ပ္ဍဲဍုၚ်မာရဳယောပူ သ္ကုတ်သၠုၚ်ကျာကၟိန်ဍုၚ်ဂှ်ရောၚ် သမ္မတဇြဳလာန်သကဳ ဟီုလဝ်ရ။
ဍုၚ်ဏံဂှ် ရုယှာဗ္တိုက်ၜက်ၜေတ်တုဲ သီဂွံလဝ် တုဲကၠုၚ်ဟွံလအ်ဏီရ။
သမ္မတဇြဳလာန်သကဳဂှ်တှ်ေ ဒဒှ်ရတၚ်ဂုန် ကုဍုၚ်ယူအေအဳ မလုပ်စိုပ်ပ္ညဳပ္ညပ်ကဵုအကြာတုဲ မအာတ်မိက်လဝ်ကဵု သွက်ဂွံလှာဲဂတး ဂၠုဲပၞာန်တံသီုဖအိုတ် နဒဒှ်ပရေၚ်ပ္ညဳပ္ညပ်ဒေါအ်ပန်ပှော်တံဂှ် ဟီုလဝ်တုဲ ဂၠုဲပၞာန်ယူကရုၚ်တံဂှ် ကလေၚ်ကော်ဖျဴ သီုဖအိုတ်ဏောၚ်ဂှ် ဟီုကြီုလဝ်ရ။
ဂၠုဲပၞာန်ရုယှာ ကလေၚ်ဗၠးကၠုၚ်လဝ်တံဂှ် ပလံၚ်ဗစိုပ်ဏာလဝ် ဍုၚ်ဗဴလာရုသ်တုဲ စၟဳတ်ကဵုဒၟံၚ်သီုစိုတ်၊ သီုပရေၚ်ထတ်ယုက်တံတုဲ ကဵုလဝ်အခေါၚ်ဆက်စၠောံ ကုမသကလောကောဒေံညးတံဂှ် ဌာနဝန်ဇၞော်ကာစဵုဒၞါရုယှာ ဟီုလဝ်ရ။
Ref: AFP