ၜဳကလေၚ်၊ ဨပရဴ ၂၀
ပ္ဍဲတွဵုရးဍုၚ်မန် ပွိုၚ်ဍုၚ်ၜဳကလေၚ် ပ္ဍဲကဵုကွာန်မေန်သဝ် ဘာလကျာ်မွဲမ ဒးဒုၚ်ထောံဖျေံမခတိုဟ်တုဲ ကောန်အရာပ်ၜါတၠ ချိုတ်တုဲ ၁၀ တၠပြၚ် ဇီုကပိုက်ကလိဂွံလဝ်ဝပ်ရောၚ် ဒပ်ပၠန်ဂတးဖျေံသ္ဇိုၚ်ဒေသတံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
တုဲကၠုၚ် ဂိတုဨပရဴ ၁၉ အခိၚ်နူဂယး ၜိုတ် ၁၁ နာဍဳ ပေါဲဗ္တိုက်ဟွံမွဲမွဲသာ် ဒပ်ကံၚ်ဇြဳပၞာန် ကၠုၚ်စိုပ်ထောံဏာလဝ်မခတိုဟ်ၜါမ လ္တူဘာလကျာ် ကွာန်မေန်သဝ် နကဵုက္ၜၚ်ကျာရ။
ဟိုတ်နူထောံလဝ်မခတိုဟ်ဂှ်တုဲ ညးဗြဴၜါတၠ အာယုက် ၅၀ သၞာံ နွံပ္ဍဲဘာလကျာ်ဂှ် ချိုတ်အာလဝ်တုဲ ခမဳသၚ် ကေုာံ ကောန်ထပိုယ် ၁၀ ဇကုပြၚ် ဇီုကပိုက်ကလိဂွံလဝ်ဝပ်ရောၚ် သ္ဂးရ။
ပ္ဍဲကဵုညးကလိဂွံလဝ်ဝပ်တံဂှ် ကောန်ထပိုယ်ကလိဂွံဝပ်မွဲဇကု ထပ်ဒးပဝ်အာပၠန် ဟီုဒၟံၚ်တံ နွံကီုလေဝ် နကဵုသြၚ်လောန်တိုၚ်(မ်) သ္ပဒတန်တၞဟ်ခြာ ဟွံမာန်ဏီရ။
ဟိုတ်နူဒပ်ကံၚ်ဇြဳပၞာန် ထောံလဝ်မခတိုဟ်တုဲ စမြိုၚ်ဘုတ်ဘာဂမၠိုၚ် မပါလုပ် သ္ၚိဗ္ဒါဲဘာလကျာ်ၜါမ ဒးတုဲလီုအာလဝ်ရ။
ကွာန်မေန်သဝ် ဒပ်ကံၚ်ဇြဳပၞာန် မထောံလဝ်မခတိုဟ်ဂှ်ဝွံ ဒှ်တိဍာ်အုပ်ဓုပ် ခရိုၚ်သဓီုဗော်သွးကောန်ဂကူကရေၚ် KNU တုဲ သၞာံတုဲကၠုၚ် ပ္ဍဲဂိတုမာတ်တုဲကၠုၚ်တေံဂှ်လေဝ် ဘာတန်လဒေါဝ် ကွာန်မေန်သဝ် ဒးဒုၚ်ထောံလဝ်မခတိုဟ်တုဲ စမြိုၚ်ဘာဂမၠိုၚ် ဇီုကပိုက်လီုလာ်အာလဝ်ရ။
ဒပ်ကံၚ်ဇြဳပၞာန်ဝွံ ဟိုတ်နူဘဲတိချဳတုဲ လလောၚ်တြးလဝ် ဒေါအ်ပန်ပှော် စဵုကဵုဂိတုဨပရဴ ၂၂ ကီုလေဝ် ပေါဲဗ္တိုက်ဟွံမွဲမွဲသာ် ဒၞါဲညးဍုၚ်ကွာန်ကောန်အရာပ်တံ မံၚ်တန်တဴတံဂှ် ထောံမံၚ်မခတိုဟ်ဗ္တိုက်ဒၟံၚ် အရိုဟ်ဒဒှ်တ္ၚဲရ။
ပရိုၚ်−သြၚ်လောန်တိုၚ်(မ်)
ဗီု−CJ